Chakavanga, tachikizenu ngwenu Kalunga eji kumona kuyanda chili mukaye, kaha afwila kukachifumisako. (Samu 72:13, 14) Atufwelelesa muMbimbiliya ngwenyi vaze vali ‘nakumona luyando, navakavanokesa.’ Lwola muka mwakalinga ngocho? “Halwola lwakusolola Mwata Yesu kufuma mwilu hamwe navangelo jenyi vangolo . . . hakuzangamisa vaze vazeneka kutachikiza Kalunga, navaze vanakane kwononoka kumujimbu wamwaza wakuvuluka Mwata wetu Yesu.” (Wavaka-Tesolonyika 2, 1:7, 8) Echi kusolola Yesu nachikapwako kulutwe. Mbimbiliya yavuluka ngwayo nachikapwako ‘hajita yahalikumbi lyalinene lyaKalunga Wangolo Josena,’ yize vavuluka nawa ngwavo Alamangetone.—Kusoloka 16:14, 16.

Hajita kaneyi yili nakwiza kulutwe, Kalunga keshi kukazachisa vatuko, oloze mwakazachisa Mwanenyi Yesu Kulishitu navangelo vangolo mangana vakalwe jita navaka-kole jenyi. Ava vaka-jita vamwilu navakakumisa luyanjisa lwosena.—Isaya 11:4; Kusoloka 19:11-16.

Noholyapwa Kalunga kalumuna vishinganyeka vyenyi kutalisa kukulwa jitako. Amona lika kulwa jita kupwa jila yimwe yakukumishilamo luyanjisa navilinga vyavipi.  Oloze ngana muze chinapunga kunyima, Kalunga kaha ikiye atongola lwola lwakulwa jita nakusakula vaze vatela kulwa jita kana. Nganomu tunamono muchihande chino, Kalunga atongola lyehi lwola lwakulwa jita yize nayikakumisa vilinga vyavipi nakulingilako vatu jenyi sambanjinga. Lwola kana luli kulutwe. Kaha asakula nawa Mwanenyi Yesu Kulishitu akalwe jita kana. Echi chasolola nge jijita vali nakulwa vatu makumbi ano kavajitavisa kuli Kalungako, chamokomoko navyuma navalwila jita kana.

Chakutalilaho, achishinganyekenu vasongo namutu vali nakuzunga oku sevo wauchiko. Jino hinavalitwamina chindende kuzunga mangana vatumine sevo shinga. Hakutumina sevo, umwe mwaputuka kuhana mulonga mukwavo ngwenyi ikiye aputukanga ndombo, kaha mukwavo ngwenyi ikiye angusangumunanga. Mutu himutu himwalembelela uze chisemi chavo mangana amuhakwile. Jino hanyima yakwivwilila kuli vosena vavali, sevo himwavalweza valitwamine kuzunga nakumuvandamina ezanga nakukumisa chihande chavo omu mwakinduluka. Ngocho vaze vana hinavavandamina. Oloze nakushimbula chiku, navaputuka cheka kuzunga. Omu mweza sevo mwapihilila nakuvazangamisa vosena vavali mwomwo yakuhona kumwivwilila.

Makumbi ano, vatu veji kulombanga kuli Kalunga kakavulu mangana avakafwe nge vali nakulwa jita nalifuchi likwavo. Oloze oholyapwa Kalunga keshi kukundwiza vaka-kulwa jitako. Mazu enyi ahanjika hatoma ngwawo: “Kanda namuhilwisa upi kumutu namilingi mwamupiko,” kaha nawa ngwawo, “Kanda namulinga sambanjingako.” (Wavaka-Loma 12:17, 19) Ngocho alweza vatu ‘vamuvandaminenga ikiye namuchima wakuunda’ akafumiseko vilinga vyavipi hajita yaAlamangetone. (Samu 37:7, kwinyikila chamwishi) Nge vaka-mafuchi navahona kulinga ngocho nakuputuka jino kulwa jita vavene, kaha Kalunga mwavamona nge vali nakazamuzamu. Ngocho eji kwivwinga kupihya. Kaha hajita yaAlamangetone mwakakwachila vaka-mafuchi kulundundu ‘nakukumisa jijita hamavu hosena.’ (Samu 46:9; Isaya 34:2) Eyo, jita yaAlamangetone yikiko nayikakumisa jijita josena.

Wangana waKalunga naukalinga chuma chamwaza hakufumisako jijita. Yesu ahanjikile vyafulumende kana omu alombele ngwenyi: “Wangana wove wizenga. Mwaya muchima wove mulingiwe mwilu, nahamavu nawa.” (Mateu 6:10) Wangana waKalunga kaweshi kukakumisa jita kahako, oloze naukafumisako navilinga vyavipi vize vyeji kunehanga jita. * (Samu 37:9, 10, 14, 15) Echi chikiko chalingisa vaka-kukavangiza Yesu vatalilile chikuma vyuma vyamwaza naukavalingila Wangana waKalunga.—WaPetulu 2, 3:13.

Uno Wangana waKalunga naukakumisa kuyanda, naluyanjisa, navilinga vyavipi mwaka uka? Upolofweto wamuMbimbiliya uze uli nakutesamo unakusolola nge tuli nakuyoyela ‘mumakumbi akukuminyina’ akatwamino kamyaka yino. (WaChimoteu 2, 3:1-5) * Shikaho, kalinwomu Wangana waKalunga unehe jita yaAlamangetone mangana yifumiseko upi uliko makumbi ano.

Nganomu twamonanga hakavanga, vatu vaze veji kukananga “kwononoka kumujimbu wamwaza wakuvuluka Mwata wetu Yesu” vakiko navakanonga hajita yamakumishilo yaAlamangetone. (Wavaka-Tesolonyika 2, 1:8) Oloze anukenu ngwenu Kalunga keshi kwivwila kuwaha kufwa chavatu vosena kuhakilako vene navaka-kuhuka. (Ezekele 33:11) Hakuwana nge “kazanga mutu numba umwe akanonge” hajita kaneyiko, ngocho asaka mujimbu wamwaza waMwata Yesu ‘vawambulule hamavu hosena, nakupwa unjiho kuli vaka-mafuchi osena’ shimbu kanda kukuma chizenga. (WaPetulu 2, 3:8, 9; Mateu 24:14; WaChimoteu 1, 2:3, 4) Eyo, mulimo wakwambulula uze vali nakuzata Vinjiho jaYehova mukaye kosena uli nakukafwa vatu vatachikize Kalunga, nakwononoka mujimbu wamwaza waYesu, nakuvalingisa vapwenga nalutalililo lwakukamona omu navakafumisako jijita.