LIKUMBI limwe nachimene, Chimoteu apwile nakuya ungeji, oku ali nakushinganyeka vyuma mwakazata kulutwe. Vakwavo vatetekelele jila yize yapulasanyine mungalila yize atachikijile Chimoteu. Kutwala muze, vasezele nganda yaLusutala yize yapwilile muchinema hapili yakusalama. Chimoteu pamo apwile nakumwesamwesa hakushinganyeka omu naye nakaka yenyi vawahililile oku nawa vanalizakamina hakumumona ali nakuya. Kutala atelele kukinduluka mangana akavasalise cheka tahi?

Omu vapwile nakuya mujila, Paulu pamo atalilenga Chimoteu nakumusehesa. Numba tuhu atachikijile ngwenyi Chimoteu apwile wasonyi, oloze awahililile hakumona twima apwile nayo ou mukweze. Halwola kana Chimoteu apwile namyaka yakusemuka kafwe 20, kaha azangilenga Paulu nakumuvumbika chikuma. Ngocho alikachile nayou lunga watwima wakushishika nakuya ungeji wausuku kufuma kuLusutala. Vatambukile hamavu namumato nakulitalasana naukalu wauvulu. Chimoteu apwile nakuhuhwasana numba nge mwakakinduluka cheka kwimbo lyavo.

Vyuma muka vyakafwile ou mukweze afwile kulinga vyuma kana mukuyoya chenyi? Vyuma muka anganyalile hakulisula chenyi? Kaha vyuma muka natulinangula kulufwelelo lwaChimoteu?

Tuchitalenu havyuma vyasolokele muLusutala myaka yivali chipwe yitatu kunyima. Chasoloka nge Chimoteu atwaminenga munganda kana. Eyi nganda yapwile yayindende, kaha yapwilile kwauka wayo muchinema. Numba tuhu vatu vamunganda kana vatachikijile chiHelase, oloze vahanjikilenga lilimi lyavaLukanya. Likumbi limwe, munganda kana mwakatukile liuya. Kaposetolo Paulu naMbalanape, uze atambukilenga nenyi muumishonali vengilile munganda kana. Ava mishonali vavali vafumine kuIkonyume, nganda yayinene yize yalihachile naLusutala. Omu vapwile nakwambulila vatu muLusutala, Paulu amwene lunga umwe wakutenguka mahinji uze asolwele lufwelelo lwamwenemwene. Ngocho Paulu okile uze lunga mujila yakukomwesa.—Vilinga 14:5-10.

Kushikulu vatu vavavulu muLusutala vafwelelele muvishimo vyakwamba nge tulunga valumukilenga kupwa vatu nakwiza mungalila. Ngocho vaputukile kuvuluka Paulu ngwavo Helemese, kaha Mbalanape ngwavo Zeuse. Ava vaka-Kulishitu vakulinyisa vahonene kukanyisa vaze vatu kuvahana vimuna vakuvatula.—Vilinga 14:11-18.

Oloze vatu vamwe muLusutala vamwene ngwavo vyuma vyakukomwesa alingile Paulu naMbalanape kavyafumine kutulunga vamakuliko, oloze vyafumine kuli Kalunga wamuchano. Chakutalilaho, Yunese kaYuleya uze asombokele kuli lunga wakaHelase * uze kapwile muka-kwitavako, nanaye Lowise vawahililile hakwivwa vyuma ahanjikile Paulu naMbalanape. Vevwile mujimbu uze vaYuleya vakushishika vosena vapwile nakusaka kwivwa. Ou wapwile himujimbu wakuvuluka nge Meshiya ejile, kaha ateselemo upolofweto wauvulu uze vasonekele muVisoneka kutalisa kuli ikiye.

Achishinganyekenu omu evwile Chimoteu hakuvatambukila kuli Paulu. Chimoteu vamunangwile “kufuma kuukemba” azange mikanda yajila yaVisoneka VyachiHepeleu. (WaChimoteu 2, 3:15) Ngana mwanaye  nakaka yenyi, Chimoteu amwene ngwenyi Paulu naMbalanape vahanjikilenga vyuma vyamuchano hali Meshiya. Achishinganyekenu nawa hali uze lunga atengukile mahinji uze vokile kuli Paulu. Kufuma vene kuunyike, Chimoteu amwenenga kakavulu ou lunga natwame kukulo yajijila muLusutala. Oloze achishinganyekenu omu evwile Chimoteu hakumona ou lunga ali nakutambuka! Echi chikiko chakunywile Yunese, naLowise naChimoteu vapwenga vaka-Kulishitu. Visemi navakaka javatu makumbi ano vanahase kulinangula vyuma vyavivulu kuli Lowise naYunese. Kutala mwasaka kukafwa vanyike valinge vyuma vyamwaza tahi?

Vatu vaze valumukile nakupwa vaka-Kulishitu muLusutala vawahililile hakulinangula vyalutalililo vapwile nalwo vaka-kukavangiza Kulishitu. Oloze valinangwile nawa nge mutu uze mwapwa muka-Kulishitu mwakamona vihuli. VaYuleya vamwe vakuIkonyume nakuAndeyoka vaze vapwile vaka-kole vengilile muLusutala nakuzondola vatu mangana vafumbukile Paulu naMbalanape. Ngocho mayongomena avatu vaukenya aputukile kwasa Paulu malolwa nakumwandumwina hamavu. Kaha vamukokelele kuweluka wanganda hakushinganyeka ngwavo nafu.—Vilinga 14:19.

Oloze tumbaji vamuLusutala vajingilikile Paulu. Kaha vawahililile chikuma hakumona nakondomoka nakwingila cheka munganda. Lichako afumine muLusutala naMbalanape nakuya kuNdeleve nakwambulula mujimbu wamwaza. Kahomu valingile hivanatungu lyehi tumbaji, vakindulukile kuLusutala numba tuhu chapwile chaponde kulinga ngocho. Vyuma muka vyasolokele? Mbimbiliya yahanjika ngwayo: “Vazamikishile tumbaji, nakuvakolezeza vatwamenga lika mulufwelelo.” Achishinganyekenu omu evwile mukweze Chimoteu hakwivwa Paulu naMbalanape navanangula vaze vaka-Kulishitu ngwavo vyuma vapwile nakutalilila kulutwe vyapwile vyavilemu chikuma kuhambakana vihuli vapwile nakuhitamo. Vambile ngwavo: “Twatela kuhita muvihuli vyavivulu hakwingila muWangana waKalunga.”—Vilinga 14:20-22.

Chimoteu amwene omwo Paulu akavangijile mazu kana hakumika muvihuli mangana ambulile vatu mujimbu wamwaza. Ngocho Chimoteu atachikijile vene ngwenyi ise navatu vamuLusutala navamufumbukila hakukavangiza chakutalilaho chaPaulu. Oloze kasakile kwechelela kumufumbukila chimuhonese kuzachila Kalungako. Makumbi ano, kuli vanyike vavavulu vakufwana nge Chimoteu. Vasaka kulikata namasepa vaze vajikiza kulufwelelo vaze navavakolezeza nakuvakafwa kushipilitu. Kaha kaveshi  kwechelela kuvafumbukila chivahonese kuzachila Kalunga wamuchanoko.

Nganomu twavulukanga hakavanga, mwahichile myaka yivali chipwe yitatu numba Paulu atambukile cheka nganda yaLusutala. Achishinganyekenu kuwaha vevwile vaka-tanga yaChimoteu omu avatambukilile Paulu naShilase halwola kanelu. Paulu naikiye atela awahililile chikuma hakumona omu jafukilile mbuto jamuchano jize akuvile muLusutala. Awanyine Lowise namwanenyi Yunese vanapu vaka-Kulishitu vakushishika, ‘valufwelelo lwakuzeneka kulyonga’ luze lwamwivwishile chikuma kuwaha. (WaChimoteu 2, 1:5) Nyi ngachilihi mukweze Chimoteu?

Paulu awanyine ou mukweze nazovoloka chikuma kuhambakana muze amuwanyine halwola lwatete avatambukilile. Chimoteu “vamusangejekelenga kuli vandumbwetu” vamuLusutala navandumbwetu vamunganda yaIkonyume yize yapwilile jikilomita 32 kumututuko. (Vilinga 16:2) Uno vyuma muka vyamulingishile apwenga napuho kana?

Havyuma ‘vyamumikanda yajila’ vize naye nakaka yenyi vamunangwile “kufuma kuukemba,” hapwile navyuma vyakuhuhumuna vize vyasakiwa kuvakweze. (WaChimoteu 2, 3:15) Chakutalilaho, vamunangwile chishina chino: “Ngocho anukanga Tengi yove Wamunene hamakumbi aukweze wove.” (Muka-kwambulula 12:1) Mazu kana amulumbunukilile kanawa omu apwile jino muka-Kulishitu. Amwene ngwenyi jila yamwaza yakwanukilamo Tengi yenyi Wamunene shina kwambulula mujimbu wamwaza wakuvuluka Kulishitu MwanaKalunga. Chimoteu alinangwile chindende chindende mwakukumishila sonyi apwile nayo, nakupwa wakumika kwambulila vakwavo mujimbu wamwaza wakuvuluka Yesu Kulishitu.

Malunga vaze vapwile nakutwaminyina vikungulwilo vamwene omu Chimoteu apwile nakuzovoloka. Chakuzeneka kukakasana, vawahililile chikuma hakumona ou mukweze mwakafwa vakwavo nakuvakolezeza. Chachilemu chikumanyi shina Yehova naikiye amwene omu Chimoteu apwile nakuzovoloka. Ngocho ahwiminyine vatu vahanjike upolofweto uze wavulukile vyamulimo uze Chimoteu mwakazachila vikungulwilo vyavivulu. Kahomu Paulu atambukilile chikungulwilo muLusutala, amwene ngwenyi Chimoteu nahase kupwa mutu wamwenemwene wakutambuka nenyi mumulimo waumishonali. Kaha vandumbwetu muLusutala vetevilile. Vanangikile mavoko avo hali ou mukweze, kusolola nge vamutongwele azate mulimo wakulipwila waYehova Kalunga.—WaChimoteu 1, 1:18; 4:14.

Achishinganyekenu woma evwile Chimoteu hakumuhana mulimo kanou waunene! Oloze alizangile kuzata mulimo kana. * Uno ise wakuzeneka kwitava evwile ngachilihi hakumona mwanenyi navamuhana mulimo wakutambwojoka? Atela asakile mwanenyi akazate milimo yeka. Nyi ngachilihi naye nakaka yenyi? Kutala vawahililile oku vanalizakamina haponde mwamona ou mukweze tahi? Chapwile chakutamo vene kuwahilila nakulizakamina.

Chipwe ngocho, Chimoteu ayile naPaulu. Nganomu twamonanga kumaputukilo achihande chino, Chimoteu aputukile kuzata mulimo wakutambwojoka nakaposetolo Paulu. Asezele limbo lyenyi muLusutala nakupipa tunda yamalolwa nakufwavangila mumwila nakuya kuchihela chakuhona kutachikiza. Ava malunga vatatu vatambukile likumbi lyosena, kaha vahetele kuIkonyume. Chimoteu aputukile kutala omu Paulu naShilase vapwile nakulweza vandumbwetu muIkonyume vyuma vyavihya vize vyafumine kuLizavu lyaKutwaminyina muYelusalema, nakuvakafwa vazamise lufwelelo lwavo. (Vilinga 16:4, 5) Oloze awa apwile himaputukilo kaha.

Omu vakumishile kutambukila vikungulwilo vyamuNgalesha, ava vamishonali vasezele mikwakwa yamwaza yavaLoma yakwala malolwa, nakupipa tunda yayisuku yakuvatasana chihela chachinene chakusalama chaFwiluja mangana vayenga kunote nakumulauko. Hakukavangiza lika shipilitu yajila yaKalunga, vayile kuTolowa, kaha vanyinyine wato nakuya kuMasetonya. (Vilinga 16:6-12) Halwola kana Paulu amwene ngwenyi Chimoteu natemo kumuzachisa. Ngocho amusezele naShilase muMbeleya. (Vilinga 17:14) Amutumine nawa uka wenyi kuTesolonyika. Kahomu ahetele kuze, akavangijile chakutalilaho chaPaulu nakujikijisa vaka-Kulishitu.—Wavaka-Tesolonyika 1, 3:1-3.

 Kutwala muze Paulu asonekele hali Chimoteu ngwenyi: “Kangweshi namutu weka ukwechi muchima nge wenyiko, uze mwazakama kanawa vyuma vyakutalisa kuli enu.” (Wavaka-Fwilipi 2:20) Puho yamwaza apwile nayo Chimoteu kayalijilile yiveneko. Oloze yafumine hakukilikita chenyi, nahakuzata milimo mukulinyisa nahakumika muvyeseko. Chikupu vene, Chimoteu apwa chakutalilaho chamwaza kuli vakweze makumbi ano. Anukenu ngwenu kupwa napuho yamwaza chapendamina hali enu vavene. Nge mwapwa muvakweze, kaha hakenu Yehova Kalunga kulutwe mukuyoya chenu nakusolwelanga vakwenu likoji nakuvavumbika mangana mutunge lijina lyamwaza.

Chimoteu azachile nasepa lyenyi kaposetolo Paulu hamyaka yakuhambakana 14. Naikiye amwenenga vihuli ngana mwaPaulu, oloze alivwishilenga nawa kuwaha vyuma vyavivulu. (Wavaka-Kolinde 2, 11:24-27) Lwola lumwe vamukashile mwomwo yalufwelelo lwenyi. (WavaHepeleu 13:23) Chimoteu azakaminenga nawa vandumbwenyi nakuvasolwela zangi ngana mwaPaulu. Shikaho Paulu amusonekelele ngwenyi: “Nguli nakwanuka masoji ove.” (WaChimoteu 2, 1:4) Chasoloka nge Chimoteu ‘alililenga navaze valililenga,’ nakuvevwila keke mangana avakolezeze nakuvavendejeka ngana mwaPaulu. (Wavaka-Loma 12:15) Ngocho nayetu tulingenunga mwomumwe.

Evi vikiko vyalingishile Chimoteu apwenga kalama wakulindunuka. Paulu kamuhanyine kaha mulimo wakutambukila vikungulwilo nakuvikolezezako, oloze amuhanyine nawa mulimo wakutongola malunga vaze vatelemo mangana vapwenga vakulwane navaka-kuzachila muvikungulwilo kana.—WaChimoteu 1, 5:22.

Paulu amuzangile chikuma ou mukweze, kaha amukafwilenga nakumuhuhumuna. Amukolezezele azachise kanawa wana wenyi wakushipilitu nakuzovoloka lika. (WaChimoteu 1, 4:15, 16) Amukafwile ahone kwechelela ukweze wenyi chipwe sonyi yimuhonese kumika hakulinga vyuma vyamwazako. (WaChimoteu 1, 1:3; 4:6, 7, 11, 12) Amulwezele nawa mwakuunjishila musongo wenyi wamujimo avijilenga lwola lwosena.—WaChimoteu 1, 5:23.

Hakuwana nge Paulu atachikijile ngwenyi apwile kwakamwihi nakufwa pamo mwomwo yakumusukika, ngocho atuminyine Chimoteu mukanda wamakumishilo. Mumukanda kana mwapwile mazu akumulembelela akwamba ngwavo: “Eseka nangolo jove wizenga washi kuli ami.” (WaChimoteu 2, 4:9) Chikupu vene, Paulu azangile chikuma Chimoteu, shikaho amuvulukilile ngwenyi “mwanami ngwazanga muli Mwata kaha nawa wakushishika.” (Wavaka-Kolinde 1, 4:17) Echi chikiko chamulingishile asanyike ou sepa lyenyi ezenga nakumumona shimbu kanda afwenga. Tuvosena twatela kulihulisa ngwetu, ‘Kutala vatu vasaka kungusanyika nguvavendejeke nge vali muukalu tahi?’

Uno Chimoteu ayile washi kuli Paulu tahi? Katwejivako. Oloze twatachikiza ngwetu lwola lwosena Chimoteu esekelenga nangolo jenyi josena kukolezeza nakuvendejeka Paulu navandumbwenyi veka. Vyuma vyosena alingilenga vyalitombwele nalijina lyenyi lyaChimoteu, lize lyalumbununa ngwavo, “Ou Avumbika Kalunga.” Kaha atusela chakutalilaho chamwaza chikuma chize twatela kukavangiza tuvosena, vakweze navakulwane.