CHIHANDE CHACHINENE | KALUNGA AMONA NGACHILIHI KULWA JITA?
Omwo Kalunga Amwene Kulwa Jita Kushikulu
Kushikulu omu vaIsalele vavayanjishilenga kuli vaka-kole javo, valombelenga kuli Kalunga avakafwe, oloze kavakafwile hahaze veneko. Ava vatu jenyi vavayanjishilenga kuvatu vamulifuchi lyangolo lyaEjipitu. (Kulovoka 1:13, 14) Hamyaka yayivulu, vaIsalele vavandaminyine Kalunga avayovole kuluyanjisa lwavaka-Ejipitu. Kutwala muze, lwola lwaKalunga lwakuvayovola lwahetele. (Kulovoka 3:7-10) Mbimbiliya yamba ngwayo Kalunga ivene ikiye alwile jita navaEjipitu. Anehele vipupu vyakulisezaseza muEjipitu, nakujiha mwangana wavaEjipitu nalizavu lyenyi lyamaswalale muKalungalwiji Uchila. (Samu 136:15) Chikupu vene Yehova Kalunga apwile “muka-kwasa jita wangolo” uze alwililile vatu jenyi jita.—Kulovoka 15:3, 4.
Hakuwana nge Kalunga alwile jita navaEjipitu, ngocho chasoloka nge Kalunga kamona jijita josena kupwa jajipiko. Shimbu jimwe Kalunga etavishile nawa vaIsalele valwenga jita. Chakutalilaho, avalwezele valwenga jita navaKanane vaze vapwile navilinga vyavipi chikuma. (Lushimbi lwamuchivali 9:5; 20:17, 18) Alwezele nawa Mwangana wavaIsalele Ndavichi alwenga jita navaFwilishite vaze vapwile nakuvayanjisa. Amulwezele mwakulwila jita kana, ngocho afungulwile vaka-kole jenyi.—Samwele 2, 5:17-25.
Eyi mijimbu yamuMbimbiliya yasolola nge omu vaIsalele vavayanjishilenga, Kalunga avetavishilenga valwenga jita mangana avakinge hohamwe nakwitava chamuchano. Oloze tutalenu vyuma vitatu vyasolokelenga omu valwilenga jijita kaneji etavishile Kalunga.
-
KALUNGA IKIYE ASAKWILENGA VAZE VATELELE KULWA JITA. Lwola lumwe Kalunga alwezele vaIsalele ngwenyi: “Enu kamweshi kulwa jita kaneyiko.” Mwomwo ika? Mwomwo Kalunga ikiye atelele kuvalwila jita kana. (Mijimbu 2, 20:17; 32:7, 8) Alingile ngocho nahalwola lweka, nganomu tunamono kumaputukilo achihande chino. Lwola lukwavo nawa, Kalunga alwezelenga vatu jenyi muIsalele valwenga jijita jize etavishile mangana vafungulule lifuchi lyavo lyalushiko nakulikinga.—Lushimbi lwamuchivali 7:1, 2; Yoshuwa 10:40.
-
KALUNGA IKIYE ATONGWELENGA LWOLA LWAKUPUTUKA KULWA JITA. Vangamba jaKalunga vavandaminyinenga lwola luze atongwele Kalunga numba vaputuke kulwa jita navaka-kole javo. Ngocho kavatelele kulwa jita shimbu kanda lwola kana luheteko. Kalunga kavevwililenga kuwahako nge navahokola lushimbi kana. Mbimbiliya yasolola nge vaIsalele vavajihilenga omu valwilenga jijita jize Kalunga ketavishileko. *
-
Numba tuhu Kalunga alwile jita navaKanane, oloze vatu vamwe vakufwana nge Lahave natanga yenyi kavanongeseleko
KALUNGA KESHI KWIVWILA KUWAHA KUFWA CHAVATU VOSENA KUHAKILAKO VENE NAVAKA-KUHUKA. Kuli Yehova Kalunga kukiko kwafuma kuyoya kaha nawa ikiye atengele vatu. (Samu 36:9) Ngocho kasaka vatu vafwengako. Oloze chaluvinda, vatu vamwe vasaka kuyanjisa vakwavo nakuvajiha. (Samu 37:12, 14) Hakusaka afumiseko vilinga kanevi vyavipi, Kalunga etavishilenga vatu jenyi valwenga jita navatu vakuhuka. Oloze myaka yosena yize vaIsalele valwilenga jita, Kalunga apwile “wakushipwokela kukwata utenu” kaha nawa evwililenga ‘keke’ vaka-kole javaIsalele. (Samu 86:15) Chakutalilaho, shimbu kanda vaIsalele valwenga jita nanganda yimwe, Kalunga avalwezelenga ‘vavilike mazu akuneha kuunda’ mangana vatu vamunganda kana vaseze vilinga vyavo vyavipi vazeneka kulwa navo jita. (Lushimbi lwamuchivali 20:10-13) Echi chasolwele nge Kalunga ‘keshi kwivwila kuwaha kufwa chamuka-kuhukako. Oloze asaka muka-kuhuka aseze jijila jenyi nakuyoya lika.’—Ezekele 33:11, 14-16. *
Vyuma tunashimutwila vinasolola nge kushikulu Kalunga amwene kulwa jita kupwa jila yakutamo yakukumishilamo luyanjisa navilinga vyavipi. Ikiye atongwelenga lwola lwakuputuka kulwa jita nakusakula vaze vatelele kulwa jita, keshi vatuko. Uno alwilenga jita hakufwila kujiha vatu tahi? Nduma, mwomwo ahunga ulyanyi. (Samu 11:5) Uno Kalunga alumwine vishinganyeka vyenyi kutalisa kukulwa jita omu Mwanenyi Yesu Kulishitu aputukile kwambulula mujimbu wamwaza mulikulukaji lyamyaka lyakulivanga tahi?
^ par. 7 Chakutalilaho, lwola lumwe vaIsalele vavafungulwile kuli vaAmaleke navaKanane hakulwa jita yize avakanyishile Kalunga. (Kulava 14:41-45) Kahomu mwahichile myaka yayivulu, Mwangana wakushishika Yoshiya naikiye alwile jita yize Kalunga ketavishileko, ngocho vamujihile.—Mijimbu 2, 35:20-24.
^ par. 8 VaIsalele kavavilikile mazu akuneha kuunda shimbu kanda valwenga jita navaKananeko. Mwomwo ika? Mwomwo vaKanane vavahanyine myaka 400 yakutela kwalumuka nakuseza vilinga vyavo vyavipi. Oloze kavalumukileko palanga nomu vaIsalele vejile nakulwa navo jita. (Kuputuka 15:13-16) Ngocho vavanongesele. Oloze vaze valumukile kavavanongeseleko.—Yoshuwa 6:25; 9:3-27.
