Ngwasemukilile mumbaka yimwe yayindende yamuPoland yize yapwilile kwakamwihi nangiza yalifuchi lyaGerman. Mumbaka kana mapwilenga mande namitondo yayivulu, ngocho ngwalivwishilenga kuwaha kuyoya. Visemi jami vasakile ngupwenga nachiyoyelo chamwaza, nakuhaka mangana kushikola, nakuzata milimo yayinene.

Omu ngwayile kuyunivesiti nakulinangula uchambamilonga munganda yaWrocław, ngwaputukile kumona ukalu mukuyoya chami. Ngwalikachilenga namasepa vavapi. Numbu tuhu nakumwaka ngwazangilenga ngunja, oloze omu ngwayile kuyunivesiti ngwayizangile jino chikuma mwomwo yamasepa jami. Ngwazangilenga lizavu lyavaka-kwasa ngunja lyamunganda yaWarsaw, kaha kusongo yachalumingo hichalumingo ngwavakavangijilenga kwosena kuze vayilenga nakwashila. Kaha twanwinenga chikuma wala, namaundu akupendesa, nakuzunga jindombo navatu vaze vakundwijilenga lizavu likwavo lyavaka-kwasa ngunja. Echi ngwachimwene nge nachikungukafwa nguvulyameko ukalu wamukuyoya. Chipwe ngocho, ngwatachikijile ngwami nge tupokola navangukasa, kaha kangweshi kulinangula uchambamilongako.

Ngwazangilenga kuya namasepa jami kujizuvo jakunwina wala neji jakukinyina. Kakavulu twazungilenga navatu mumikwakwa. Kaha tupokola vangukashilenga mapapa kakavulu, oloze ngwavahanyinenga majika kanwa nakungwecha. Ngwashinganyekele chikupu ngwami ngwalivwishilenga kuwaha kuyoya. Oloze ngwatachikijile ngwami vyuma ngwalingilenga vyapwile vyavipi. Ngocho Sondo hiSondo ngwayilenga kuchachi mangana ngupwenga nachivezu chamwaza.

Likumbi limwe mu 2004, Vinjiho jaYehova vavali vejile kuzuvo yami tushimutwile vyamuMbimbiliya, kaha ngwetavilile. Omu ngwalinangwile vyuma atela kulinga muka-Kulishitu wamuchano, chizevu chami chaputukile kunguyanjisa chikuma. Ngwatachikijile jino ngwami ngwatelelele kulitwamina kunwa wala, namaundu akupendesa, nakuzunga jindombo nakulitwamina nawa kulikata navatu vaze kavakavangiza jishimbi jamuMbimbiliyako. Numba tuhu ngwatachikijile ngwami ngwatelelele kwalumuka, oloze ngwatwalileho lika kulinga vyuma vyavipi.

Likumbi limwe naufuku kuyoya chami chalumukile omu ngwapwile nakuzunga namalunga 8. Malunga kana vanguvetele jikonyi navipambala  kumutwe nakunguseza kuswanga mumukwakwa. Omu ngwamwene ngwami pamo nangufwa, ngwalombele kuli Kalunga ngwami: “Ove Yehova ngukonekele hakuhona kukavangiza Mazu ove. Nge kangweshi kufwako, nangulinangulanga Mbimbiliya naVinjiho jaYehova nakwalumuna kuyoya chami.” Kutokwa nawa kangwafwileko, kaha ngwateselemo lushiko lwami lwakulinangula Mbimbiliya.

Kuheta mu 2006, ngwalukilile kuEngland mangana ngukatondetondeko jimbongo jakungukafwa nguhiluke kuPoland nakutwalililaho kulinangula uchambamilonga nakutambula ndingili. Omu ngwatwalilileho kulinangula Mbimbiliya, chisoneka chimwe changukwachile kumuchima. Kaposetolo Paulu asonekele ngwenyi: “Ngunamono nawa vyuma vyosena ngwami kavyeshi nanganyoko mwomwo yakukangana chachinyingi chakumutachikiza Kulishitu Yesu Mwata wami. Ngunatokesa vyuma vyosena mwomwo yaikiye, kaha ngunavimono kupwa nge majilo, mangana ngunganyale Kulishitu.” (Wavaka-Fwilipi 3:8) Kaposetolo Paulu apwile chambamilonga ngana mwayami kaha nawa apwile navilinga vyaulyanyi. (Vilinga 8:3) Oloze kutwala muze amwene ngwenyi jila yamwaza yakuyoyelamo shina kuzachila Kalunga nakulondezeza Yesu. Omu ngwashinganyekele hachakutalilaho chaPaulu, ngwamwene jino ngwami kuzata milimo yayinene nakuzunga jindombo kavyeshi kuneha kuwahililako. Ngwenjikijile chikupu ngwami nge Paulu alumwine kuyoya chenyi, kaha nayami ngunahase kulinga ngocho. Shikaho ngwajinyine kutwama muEngland, kaha kangwayile cheka kuyunivesitiko.

Omu ngwalinangwilenga vyaYehova, ngwapandamine chikuma kuli ikiye. Ngwawahililile chikuma hakutachikiza ngwami Yehova eji kukonekelanga vaze navapihilila nakwalumuka. (Vilinga 2:38) Kahomu ngwashinganyekele hachisoneka chaWaYowano 1, 4:16, chize chamba ngwacho “Kalunga ikiye zangi,” ngwamwene jino ovyo Kalunga ahungila jindombo.

Ngwevwile kuwaha hatwamiso yaVinjiho jaYehova. Chasolokele hatoma nge vafwila kukavangiza jishimbi jamuMbimbiliya jakayoyelo katoma. Ngocho ngwasakile kulikata navatu kanava vakuwahilila. Kuheta mu 2008, vangumbapachishile nakupwa nguChinjiho chaYehova hanyima yakukilikita chikuma nakwalumuna kuyoya chami.

Kulinangula Mbimbiliya chinangukafwe nguseze kuzunga jindombo, nakulitwamina kuzanga chikuma ngunja, nakulitwamina kunwa maundu akupendesa nawala. Yinangukafwe ngupwenga jino ngungamba yaKalunga uze evwila kuwaha kunangula vatu Mbimbiliya. Numba tuhu ngwazanga kutala ngunja, oloze kangwandupukilamo chikumako.

Oholili ngwambata Esther, mukwetu muka-Kulishitu, kaha ngwawahilila chikuma. Tweji kwivwanga kuwaha kunangula Mbimbiliya vatu vaze vahanjika lilimi lyaPolish kuno kunote yaEngland. Elu lukiko lwola lwatete kupwa nguwakuwahilila mukuyoya chami. Nguli jino nachivezu chitoma, kaha ngwasuuluka mukuyoya chami.