Vihula VyamuMbimbiliya Vakumbulula
Uno vafu navakayoya cheka tahi?
Tengi uze atuhana kuyoya mwakasangula vafu chikupu
Kuli Yehova Kalunga kukiko kwafuma kuyoya. (Samu 36:9) Shikaho, chapwa chachashi kuli ikiye kusangula vafu. Mbimbiliya yatufwelelesa ngwayo Kalunga mwakalinga ngocho kulutwe. (Tangenu Vilinga 24:15) Mwomwo ika mwakalingila ngocho?
Hakuputuka, Tengi yetu ajinyine ngwenyi vatu vatwamenga hamavu haya myaka yosena. (Kuputuka 1:31; 2:15-17) Omu mukiko ajina noholyapwa. Eji kwivwanga kupihya chikuma hakumona vatu vali nakuyanda nakufwa.—Tangenu Yopa 14:1, 14, 15.
Uno vatu vaze navakasanguka navakatwama kulihi?
Uno Kalunga atengele vatu vatwamenga mwilu tahi? Nduma. Kalunga atengele vangelo vatwamenga mwilu, kaha vatu avatengele vatwamenga hamavu. (Kuputuka 1:28; Yopa 38:4, 7) Ngocho tuchitalenu havatu vaze asangwile Yesu. Vaze vatu asangwile vatwamine hano hamavu. Chochimwe nawa, navatu vavavulu vaze navakasanguka kulutwe navakatwama hano hamavu.—Tangenu Yowano 5:28, 29; 11:44.
Chipwe ngocho, Kalunga asakula vatu vavandende vaze mwakasangula mangana vakayoyele mwilu, kaha navakapwa namijimba yakushipilitu. (Luka 12:32; Wavaka-Kolinde 1, 15:49, 50) Vaze navakasangula nakuyoyela mwilu navakapwa vamyangana hamwe naKulishitu nakuyula mavu.—Tangenu Kusoloka 5:9, 10.