CHIHANDE CHACHINENE | UNAHASE KWIVWISHISA MBIMBILIYA
Mwomwo Ika Mwatela Kwivwishisa Mbimbiliya?
Lin wamuChina ambile ngwenyi: “Mbimbiliya yapwa himukanda uze vatachikiza kuvatu vavavulu. Oloze vatu vaze vahanjika lilimi lyaChinese kavautachikiza kanawako kaha nawa kavaumona kupwa waulemuko.”
Amit wamuIndia ambile ngwenyi: “Nge vyuma yahanjika mikanda yajila yamukwitava chami chaHindu kangwavivwishisako, kaha nanguhasa kwivwishisa ngachilihi Mbimbiliya Yajila?”
Yumiko wamuJapan ambile ngwenyi: “Mbimbiliya ngwayimona kupwa yayilemu numba tuhu yapwa himukanda wakushikulu. Ngwatachikiza nawa ngwami mukanda kana veji kuulandanga chikuma mukaye kosena. Oloze ami kanda lyehi nguumonengaho.”
Vatu vavavulu mukaye vamona Mbimbiliya kupwa yayilemu chikuma. Oloze kavatachikiza vyuma vyavivulu vyatwamamoko. Chakutalilaho, vatu vavavulu muAsia kavatachikiza vyuma vyavivulu vyatwama muMbimbiliyako. Kahomu mukiko chapwa namumafuchi muze mwalisala jiMbimbiliya.
Oloze munahase kulihulisa ngwenu, ‘Mwomwo ika ngwatela kufwila kwivwishisa Mbimbiliya?’ Kwivwishisa kanawa vyuma yahanjika Mbimbiliya nachimikafwa muvyuma vino:
-
Namupwa vakusuuluka, vakuwahilila
-
Namuhonesa ukalu wamutanga
-
Namuhonesa kulizakamina
-
Namuzamisa usepa wenu navakwenu
-
Namuzachisa kanawa jimbongo jenu
Chakutalilaho, tutalenu vyuma anganyalile Yoshiko wamuJapan hakwivwishisa Mbimbiliya. Katachikijile vyuma vyatwama muMbimbiliyako, ngocho asakile kuyitanga. Vyuma muka vyafuminemo? Ambile ngwenyi: “Mbimbiliya yinangukafwe ngupwenga nguwakusuuluka mukuyoya nakupwa nalutalililo lwakulutwe. Kangweshi nakwivwa cheka nge nguwamokomokoko.” Amit uze twavulukanga hakavanga naikiye aputukile kutanga Mbimbiliya. Ambile ngwenyi: “Ngwalikomokelele chikuma hakutachikiza nge muMbimbiliiya mwatwama vyuma vize vinahase kukafwa vatu vosena.”
Mbimbiliya yinakafwe vatu vavavulu. Shikaho nayenu nawa tangenunga Mbimbiliya mangana munganyale.
