Mbimbiliya yapwa mukanda wakulipwila. Yikwechi vyuma vyakutukafwa vyakufuma kuli Tengi yetu. (WaChimoteu 2, 3:16) Mujimbu watwamamo unahase kutukafwa chikuma. Mbimbiliya yahanjika ngwayo: “Mazu aKalunga apwa amatonyi, kaha atwama nangolo.” (WavaHepeleu 4:12) Yikwechi ngolo jakutukafwa mukuyoya chetu mujijila jivali. Yatwama najindongi jakutukafwa mukuyoya chetu makumbi ano nakutukafwa tutachikize Kalunga navyuma ashika.—WaChimoteu 1, 4:8; WaYakova 4:8.

Kwalumuna kuyoya chenu oholyapwa. Mbimbiliya yinahase kumikafwa musakule vyakulinga. Yeji kutuhananga jindongi jamwaza.

•   Jamwakupwila nausoko wamwaza navakwetu.—Wavaka-Efwesu 4:31, 32; 5:22, 25, 28, 33.

• Jamwakupwila vakulikangula kumujimba namuvishinganyeka.—Samu 37:8; Vishimo 17:22.

• Jamwakupwila navilinga vyamwaza.—Wavaka-Kolinde 1, 6:9, 10.

• Jamwakuwanyina vyuma vyakumujimba.—Vishimo 10:4; 28:19; Wavaka-Efwesu 4:28. *

Valunga napwevo vavakweze vakulimbata vamuAsia vawahilila chikuma mwomwo yakuzachisa vyuma yanangula Mbimbiliya. Ngana mwavatu vavavulu vaze vanalimbate kalinwomu, navakiko veji kuchiwananga kupwa chachikalu kwalumunako vilinga vyavo namwakulihanjikishila namuka-mahyavo. Oloze vaputukile kuzachisa vyuma valinangwile muMbimbiliya. Vyuma muka vinafumumo? Vicent lunga uze ambata ambile ngwenyi: “Vyuma ngwalinangwile muMbimbiliya vyangukafwile nguwane mwakukumishila ukalu wetu muulo mujila yazangi. Kukavangiza vyuma yahanjika Mbimbiliya, chinatukafwe tuvosena tupwenga vakuwahilila.” Kaha puwenyi Annalou naikiye etavilile ngwenyi: “Kutanganga vyakutalilaho vyamuMbimbiliya chinatukafwe chikuma. Ngwapwa jino nguwakuwahilila nakusuuluka muulo wetu navyuma twalitomena kulinga mukuyoya chetu.”

Kufwila kutachikiza Kalunga. Vicent ambile cheka ngwenyi: “Kutanganga Mbimbiliya chinangukafwe ngupandame chikuma kuli Yehova kuhambakanomu ngwevwilenga kunyima.” Chishina nahanjika Vicent chachilemu chikuma, kutanganga Mbimbiliya nachimikafwa mutachikize kanawa Kalunga. Kulinga ngocho, nachiminganyalisa nakutachikiza kanawa Kalunga kupwa sepa lyenu. Kaha namumona omu Kalunga alumbununa lutalililo lwakulutwe, kutalisa kulwola luze namukalivwisa kuwaha “kuyoya chamwenemwene,” chize nachikelila haya myaka yosena. (WaChimoteu 1, 6:19) Chikupu vene, kakweshi mukanda weka munahase kuwana vyalutalililo kanako.

Kachi nge namuwanako lwola lwakutanganga Mbimbiliya, kaha nayenu munahase kunganyala. Kulinga ngocho nachimikafwa mukuyoya chenu nakumilingisa mutachikize kanawa Kalunga. Omu namutwalaho lika kutanga Mbimbiliya chinahase kumilingisa mulihulise vihula vyavivulu. Kaha mwatela kwanuka chilolo wakaEchopa uze ayoyele kafwe myaka 2000 kunyima. Apwile navihula vyavivulu kutalisa kuMbimbiliya. Omu vamuhulishile numba nge evwishishile kanawa vyuma apwile nakutanga nyi chiku, ikiye ambile ngwenyi: “Uno nanguhasa ngachilihi kuvitachikiza chakuzeneka mutu wakungulumbunwinavyo?” * Ngocho etavilile kumukafwa kuli mutu uze atelemo kupwa muka-kunangula Fwilipu uze apwile kambaji kaYesu. (Vilinga 8:30, 31, 34) Kachi nge nayenu nawa munakusaka kulinangula vyavivulu kutalisa kuMbimbiliya, kaha tuli nakumilomba musonekele Vinjiho jaYehova kuzachisa keyala yetu ya www.pr418.com chipwe kusonekela kuvihela vili kwakamwihi kweseka najikeyala vananoneka mumangazini yino. Munahase nawa kuhulisa Vinjiho jaYehova vali hakamwihi nayenu chipwe kuya kuZuvo yaWangana yamungalila yenu. Kanda namulangisako, putukenu kutanga Mbimbiliya mangana yimitwaminyine kukuyoya chamwenemwene.