Kanyike wapwevo wamyaka yakusemuka yiwana amwene miyengo yili nakulovola wishi hafakitoli, kaha uze wishi wasolokele jino nge himavwi. Kaha ashinganyekele ngwenyi fakitoli yikiko yeji kutunganga mavwi muutangatanga. Echi kulimbenja chayou kanyike chapwile kaha chachindende chize chinahase kusehesa vatu. Oloze kulimbenja chimwe chapwa chachinene, kaha chinahase kuhaka kuyoya chetu muukalu. Chakutalilaho, nge kamweshi kutanga kanawa vyuma vanasoneka hamutumwa wavitumboko, kaha chinahase kuneha ukalu waunene.

Kuhona kwivwishisa kanawa vyuma vyakushipilitu chinahase kuneha ponde yayinene chikuma. Chakutalilaho, vatu vamwe kavevwishishile vyuma anangwile Yesuko. (Yowano 6:48-68) Muchishishisa chakufwila kulinangula vyavivulu, vakanyine vyuma vyosena vize anangwile Yesu. Olwo luvinda kana enu vayaya!

Kutala mweji kutanganga Mbimbiliya mangana yimitwaminyine tahi? Chapwa chachilemu kulinga ngocho. Uno kuhona kwivwishisa vyuma namutanga chinahase kuneha ponde tahi? Cheji kusolokanga kuvatu vavavulu. Talenu havyukutalilaho vino vitatu.

• Vatu vamwe kavevwishisa kanawa mazu aYesu aze ambile ngwenyi: “Ivwenu woma [Kalunga] uze nahase kunongesa mwono namujimba muNgehena.” (Mateu 10:28) Vafwelela ngwavo Kalunga eji kuzangamisanga vatu vavilinga vyavipi mukakahya kahelo. Oloze Mbimbiliya yalumbununa hatoma ngwayo, “vafu kavatachikiza chuma numba chimweko,” ngocho kaveshi kuhasa kwivwa kukolako. (Muka-kwambulula 9:5) Kaha nawa Mbimbiliya yanangula ngwayo: “Kalunga ikiye zangi” ngocho keshi kuhasa kuyanjisa vatu mukakahyako. (WaYowano 1, 4:8; Yelemiya 7:31) Lizu lyachiHelase valumuna ngwavo “kakahya kaHelo” chipwe ngehena muMbimbiliya, lyatalisa kukunongesa ndolokoto. Shikaho twatela kwivwa woma [kulumbununa: ‘kuvumbika’] Kalunga mwomwo ikiye nahase kumona nge twatela kutambula kuyoya chahaya myaka yosena nyi chiku.

• Vatu vamwe kavevwishisa mazu akwamba ngwavo: “Vyuma vyosena vikwechi lwola vavitongwela, . . . kuli lwola lwakusemuka, nalwola lwakufwa.” Kaha vakukulula ngwavo Kalunga asakula lwola atela kufwa mutu himutu. (Muka-kwambulula 3:1, 2) Oloze mujimbu kana wahanjika havyuma vyeji kusolokanga mukuyoya chavatu kaha nawa wahanjika ngwawo nakufwa cheji kutuwananga. Mazu aKalunga nawa atulweza ngwawo vyuma tweji kusakulanga kulinga vinahase kukwata hakuyoya chetu. Chakutalilaho, tweji kutanganga muMbimbiliya ngwavo: “Kumwivwa Yehova woma nachisuhwisa kuyoya chamutu.” (Vishimo 10:27; Samu 90:10; Isaya 55:3) Mujila muka? Chakutalilaho, kumona Mazu aKalunga kupwa amalemu nachitulingisa tulihende kukulinga vyuma vyakuhenga vyakufwana nge utakwa naujila.—Wavaka-Kolinde 1, 6:9, 10.

• Vatu vamwe nawa kavevwishisa mazu amuMbimbiliya akwamba ngwavo melu namavu “vawalama vakawanongese nakakahya,” oloze vakiko vamba ngwavo Kalunga mwakanongesa mavu vene ano. (WaPetulu 2, 3:7) Kalunga ashika ngwenyi keshi kuketavisa mavu avene kuwanongesako. Kalunga “azamisa mavu havihela vyawo, kaveshi kukawaswenyesako haya myaka namyaka.” (Samu 104:5; Isaya 45:18) Shikaho navakanongesa katwamino kamyaka yino keshi mavu aveneko, navakakafumisako haya myaka yosena kwijiva nge vanakanongesa nakakahya ndolokoto. Melu nawa anahase kulumbununa mwilu chipwe utangatanga chipwe utwamo waKalunga. Kaha vyuma kanevi kaveshi kukavinongesako.

Nganomu munamono havyakutalilaho tunashimutwila lyehi, kakavulu vatu kavevwishisa vyuma veji kutanganga muMbimbiliyako. Mwomwo ika Kalunga etavishila vyuma vyangana visoloke? Vamwe vanahase kwamba ngwavo: ‘Nge Kalunga atwama namangana chikuma kaha nawa atachikiza vyuma vyosena, kachi atuhana mukanda uze vasoneka mujila yayashi uze vanahase kwivwishisa vatu vosena. Mwomwo ika kalingile ngochoko?’ Talenu vyuma vitatu vyalingisa vatu vahone kwivwishisa Mbimbiliya.

1. Kwivwishisa Mbimbiliya chasakiwa kupwa namuchima wakulinyisa nakufwila kulinangula muchano. Yesu ambile kuli ise ngwenyi: “Ove Tata,  Mwata wamelu namavu, ngunakwalisa kumeso avatu, mwomwo vyumevi unaviswekela vaka-mangana navaze vananguka, oloze unavisolola kuli vana vavandende.” (Luka 10:21) Mbimbiliya vayisoneka mujila yize nayikafwa vatu vaze vakwechi michima yamwaza vevwishise vyuma vyatwamamo. Vatu vakwechi muchima wakulivwimba, uze wavula chikuma kuvatu vashinganyeka nge vapwa “vaka-mangana navaze vananguka,” vakiko veji kuhonanga kwivwishisa vyuma yahanjika Mbimbiliya. Oloze vatu vaze veji kutanganga Mbimbiliya namuchima nge uze vatwama nawo “vana vavandende” wakulinyisa nakufwila kulinangula, vakiko veji kwivwishisanga Mazu aKalunga. Chikupu vene, Kalunga ajinyine kusoneka Mbimbiliya mujila yakulipwila.

2. Mbimbiliya vayisonekela vatu vaze vasaka Kalunga avakafwe vayivwishise kanawa. Yesu asolwele chikupu nge vatu vasakile kuvakafwa numba vevwishise vyuma apwile nakunangula. Uno vavakafwile ngachilihi? Yesu ambile ngwenyi: “Muka-kumikafwa, shipilitu yajila, yize Tata mwakatuma mulijina lyami, ou ikiye vene mwakaminangulanga vyuma vyosena.” (Yowano 14:26) Shikaho, Kalunga eji kuhananga shipilitu yenyi yajila, yize yapwa ngolo jenyi, mangana yikafwe vatu vevwishise vyuma navatanga muMbimbiliya. Chipwe ngocho, Kalunga keshi kuhana shipilitu yenyi kuli vatu vaze kavasaka kupendamina hali ikiye mangana avakafweko, evi vikiko vyeji kulingisanga vatu kana vahone kwivwishisa kanawa vyuma yahanjika Mbimbiliya. Shipilitu yajila yeji kukafwanga nawa vaka-Kulishitu vaze vakwechi chinyingi chikuma mangana vakafwe vatu vaze vali nakusaka kwivwishisa muchano.—Vilinga 8:26-35.

3. Mijimbu yimwe yamuMbimbiliya vanahase kuyivwishisa kuvatu halwola lwakutamo. Chakutalilaho, kapolofweto Ndanyele vamulwezele asoneke mujimbu umwe wavyuma navikasoloka kulutwe. Kangelo amulwezele ngwenyi: “Ove Ndanyele, sweka mazu awa, lamika katachikijilo kumukanda palanga nakumakumbi akukuminyina.” Hamyaka yayivulu yinahichimo, vatu vavavulu vanatangenga mukanda waNdanyele oloze vanahononga kwivwishisa mazu asonekele. Kaha naNdanyele ivene kevwishishile mwalumbunukilile vyuma vimwe asonekeleko. Ahanjikile ngwenyi: “Ngwavivwile, oloze kavyangulumbunukilileko.” Kutwala muze, vatu jino vevwishishile upolofweto waKalunga asonekele Ndanyele halwola luze atongwele ivene Kalunga. Kangelo ambile ngwenyi: “Ove Ndanyele, yakonga mwomwo mazu kana vatela kuwasweka nakuwalamika katachikijilo palanga nakumakumbi akukuminyina.” Veya vanahase kwivwishisa kanawa vyuma ahanjika Kalunga? ‘Naumwe wauchi hali vaka-kuhuka mwakatachikiza mazu kana. Oloze vaze vanangakana navakawatachikiza.’ (Ndanyele 12:4, 8-10) Ngocho Kalunga keshi kuhana ulumbunwiso wamazu amwe amuMbimbiliyako palanga nahalwola lwakutamo.

Uno vyuma vimwe vinasolokanga vinalingisanga vinjiho jaYehova vahone kwivwishisa kanawa Mbimbiliya tahi? Eyo. Oloze omu lwola atongwele Kalunga lwahetele lwakulumbununa kanawa vyuma, Vinjiho jaYehova valumwine vyuma vevwishishile hakavanga. Veji kufwilanga kulondezeza vaposetolo jaKulishitu vaze valumwine vishinganyeka vyavo nakwitavila vyuma avolwele Yesu.—Vilinga 1:6, 7.

Vyuma kevwishishile uze kanyike twavulukanga hakavanga kutalisa kujila eji kulitungilangamo mavwi, vyapwile kaha vyavindende. Oloze vyuma yanangula Mbimbiliya vyapwa vyavilemu chikuma mukuyoya chenu. Vyuma yahanjika Mbimbiliya vyapwa vyavilemu chikuma kuli kala mutu mwasaka kwivwishisa vyuma mwatanga muMbimbiliya hauka. Ngocho tondenu vatu vamikafwe mwivwishise vyuma muli nakutanga. Hulisenu vatu vaze veji kulinangulanga Mbimbiliya namuchima wakulinyisa, vaze vapendamina hashipilitu yajila yaKalunga yivakafwe vevwishise Mbimbiliya, vaze nawa venjikiza chikupu ngwavo tuli nakuyoyela mulwola luze Kalunga ali nakusaka vatu vevwishise kanawa Mbimbiliya. Kanda kulangisako, hulisenu Vinjiho jaYehova chipwe kutanga vyuma vili hakeyala yavo ya jw.org vize vahehwojola kanawa. Mbimbiliya yatufwelelesa ngwayo: ‘Kachi nge nausanyika kunangakana . . . , kaha naupwa nachinyingi chakumutachikiza Kalunga.’—Vishimo 2:3-5.