Hakuyitanga mweji kwivwanga uli tahi? Nyi mweji kulivwisangayo kuwaha? Kutanga Mbimbiliya mwachimona ngachilihi? Echi chapendamina hajila namuyitangilamo. Tukekesenu havyuma mwatela kulinga mangana mulivwise kuwaha kutanga Mbimbiliya.

Sakulenu kuzachisa Mbimbiliya valumuna mulilimi lyalyashi. Nge namutanganga Mbimbiliya yize yatwama namazu amakalu chikuma chipwe akushikulu aze kamwejivako, kaha kamweshi kuhasa kulivwisa kuwaha kuyitangako. Ngocho zachisenu Mbimbiliya yize yikwechi mazu amashi kwivwishisa aze nawamikwata kumuchima. Kaha nawa yatela kupwa Mbimbiliya yize valumuna kanawa mujila yakwoloka. *

Zachisenu makina amakumbi ano. Makumbi ano Mbimbiliya yili nahamakina. JiMbimbiliya jimwe munahase kujitangila haInternet chipwe kuyitutulula muyitangile hakopyuta, nahamakina vavuluka ngwavo tablet, chipwe hajishinga. JiMbimbiliya jimwe jatwama natuvyuma tumwe tunahase kumikafwa muwane washi jivesi jeka jize jinakuhanjika hachihande chochimwe chipwe jize namwesekesa kujiMbimbiliya jeka. Nge mwachiwana kupwa chachashi kwivwilila kuhambakana kutanga, kaha Mbimbiliya yili nawa namumazu akukopa mumalimi amwe. Vatu vavavulu veji kulivwisanga kuwaha kwivwilila kumazu akukopa nge vali nakuya kumilimo, chipwe nge vali nakukosa, chipwe nge vali nakuzata milimo yeka yize nayivahana lwola lwakwivwilila. Nayenu munahase kweseka kuzachisa jila yize namusaka.

Zachisenu vinoma vyakumikafwa kulinangula Mbimbiliya. Evi vinoma vinahase kuminganyalisa chikuma omu namutanga Mbimbiliya. MuMbimbiliya  mwatwama jimapu jamafuchi jize jinahase kumikafwa mutachikize mafuchi namuwana hakutanga, nakumilingisa mutachikize vyuma vyasolokelenga. Vihande vyakufwana nganevi vili mumangazini yino, chipwe vize vyatwama hachihanda chakwamba ngwavo “Vyuma Yanangula Mbimbiliya” hakeyala ya jw.org, vinahase kumikafwa muwane ulumbunwiso wavihanda vyavivulu vize vahanjika muMbimbiliya.

Alumunenuko jila mweji kutangilangamo. Nge munamono ngwenu kutanga Mbimbiliya kufuma kusongo nakusongo nachipwa hichiteli, kaha munahase kuputuka namikanda yikwechi mijimbu yize mwasaka chikuma. Nge muli nakusaka kutachikiza kanawa vatu vaze vaya fuma muMbimbiliya, kaha tangenu mujimbu wamutu himutu. Talenu vyakutalilaho mulipwata lyakwamba ngwavo: “ Kuhehwojola muMbimbiliya Hakutachikiza Vatu Vavulukamo” vize navimikafwa mulivwise kuwaha kutanga Mbimbiliya. Nyi pamo munakusaka kuyitanga kweseka navihande chipwe kukavangiza mikanda yatwamamo. Sakulenu kala mutu muli nakusaka kutanga.