CHIHANDE CHACHINENE | VYUMA NAVIMIKAFWA MUNGANYALE HAKUTANGA MBIMBILIYA
Mwomwo Ika Twatela Kutangilanga Mbimbiliya?
Jovy ambile ngwenyi: “Ngwashinganyekele ngwami Mbimbiliya yayikalu kwivwishisa.”
Queennie ambile ngwenyi: “Ngwamwenenga ngwami kutanga Mbimbiliya chinahase kungwivwisa uli.”
Ezekiel ambile ngwenyi: “Kumonomu yatohwa Mbimbiliya changulingishile nguhone kupwa nachipepa chakuyitanga.”
Kutala mwashinganyekaho lyehi kutanga Mbimbiliya, oloze hinamulitwamina mwomwo yavishinganyeka vyakufwana nganevi vyavatu tunavuluka helu tahi? Vatu vavavulu vamona kutanga Mbimbiliya kupwa hichiteli chipwe kwenyeka lwola. Namulinga ngachilihi nge namutachikiza jino ngwenu Mbimbiliya yinahase kumikafwa mupwenga vakuwahilila nakusuuluka mukuyoya chenu? Kaha nawa namulinga ngachilihi nge namuwana jijila jajashi jakutangilamo Mbimbiliya jize najimilingisa mulivwise kuwaha kuyitanga? Kutala namulisuula kuyitanganga mangana mumone vyuma munahase kunganyala tahi?
Achitalenu havyuma vyamwaza vahanjikile vamwe omu vaputukile kutanga Mbimbiliya.
Ezekiel, ou ali namyaka yakusemuka yamuji 20, ambile ngwenyi: “Kunyima ngwapwile kwijiva nge mutu uze ali nakutambukisa minyau chakuzeneka kwijiva okwo ali nakuya. Oloze kutanga Mbimbiliya chinangukafwe ngupwenga nakuyoya chamwenemwene. Mbimbiliya yatwama najindongi jakungukafwa mukuyoya chami chahakumbi hakumbi.”
Frieda, wamyaka yakusemuka yamuji 20, naikiye ambile ngwenyi: “ngwapwilenga namuchima wakulusuka. Oloze mwomwo yakutanganga Mbimbiliya ngunalinangula mwakuhonesela ukalu kana. Echi chinangukafwe ngulivwasane kanawa navatu, kaha nguli jino namasepa vavavulu.”
Pwevo umwe wamyaka yakusemuka yamuji 50 walijina lyaEunice ahanjikile kutalisa kuMbimbiliya ngwenyi: “Yinangukafwe ngupwenga ngumutu wamwenemwene nakwalumunako nawa jitato jami jajipi.”
Kutanga Mbimbiliya nachimikafwa mulivwise kuwaha kuyoya ngana mwavatu tunavuluka naveka vavavulu vaze vanalinginga ngocho. (Isaya 48:17, 18) Mbimbiliya nayimikafwa nawa (1) musakule kanawa vyakulinga, (2) mupwenga namasepa vamwenemwene, (3) muwane mwakulipikila naukalu wakuhomba, (4) mulinangule muchano waKalunga, chuma chize chapwa chachilemu chikuma. Vyuma yahanjika Mbimbiliya vyafuma kuli Kalunga, ngocho namunganyala nge namuvikavangizanga. Kalunga keshi kuhanjika vyuma vize navimihungumwisako.
Chuma chachilemu shina kuputuka kutanga Mbimbiliya. Vyuma muka navimikafwa muchiwane kupwa chachashi kuputuka kutanga Mbimbiliya nakulivwisayo kuwaha?
