Shinganyekenu munakumona vatu vawana vanatwame hatuvalu twavo vaze vali nakulaha najishindo. Vyuma munakuhumikiza vinahase kumyanukisa mujimbu mweji kutanganga muMbimbiliya. Kavalu watete utoma, vanakumutambukisa kuli Mwangana wamuhya uze vanavwiki muchama. Kaha munyima yenyi muli kavalu uchila, vanakumutambukisa kuli mutu anakufumisa kuunda hamavu hosena. Kufumaho nakwiza kavalu wamuchitatu wilava, muka-kumutambukisa nakwate vipezaliso mulivoko lyenyi vize vinakulumbununa mujimbu wakukeha chavyakulya. Kavalu wamuchiwana utomonoka, nemanyinako misongo yachihita naukalu weka, kaha uze anakumutambukisa ikiye Kufwa. Kaha fuka veji kuyanga vatu vosena yili nakumukavangiza chikuma munyima, ngocho vatu vavavulu vanakufwa chikuma.—Kusoloka 6:1-8.

Crystal ambile ngwenyi: “Ngwevwile woma chikuma omu ngwatangile mujimbu wavaka-kutambuka hatuvalu vawana. Ngwashinganyekele ngwami Likumbi Lyakusopesa linapandama chikuma, kaha hakuwana nge kangwapwile wakulizangako, ngocho ngwamwene ngwami kangweshi kuyovokako.”

Ed ambile ngwenyi: “Ngwalikomokelele chikuma hali ava vaka-kutambuka hatuvalu vawana. Omu ngwatachikijile jino kanawa ulumbunwiso wechi chakumwenesa, ngwamwene kulema chamujimbu kana.”

Kutala nayenu mwevwaho lyehi nganomu evwile Crystal hali ava vaka-kutambuka hatuvalu vawana vaze vavuluka mumukanda waKusoloka tahi? Nyi mwevwile ngana muze evwile Ed? Kala mweshomwo mwevwile, ava vaka-tuvalu vawana vavasolola mumukanda waKusoloka uze wapwa wamakumishilo muMbimbiliya. Kutala chakumwenesa kana chinahase kuminganyalisa nayenu tahi? Mujila muka? Kalunga atulweza ngwenyi tunahase kupwa vakuwahilila kachi nge natutanganga, nakulinangula, nakukavangiza vyuma vyosena vize vasoneka mumukanda kanou waupolofweto.—Kusoloka 1:1-3.

Numba tuhu vatu vamwe veji kwivwanga woma hakutanga mujimbu kanou, oloze kavausonekele utwivwise womako. Tuyokutuyoku nawa vatu vavavulu vawana nge mujimbu kanou weji kujikijisanga lufwelelo lwavo nakutalilila vyuma vyamwaza vinakwiza kulutwe. Nayenu munahase kwivwa mwomumwe. Tunamilombo mutange chihande chinakavangizaho.