•  Mazu aKujimbula 2

•  Vishina Vyavilemu VyamuMazu aKalunga 3-5

  •  Chihande 3

  •  Vishina VyamuMazu aKalunga 4

  •  Kutanga Mbimbiliya 5

•  Haka Muchima kuMulimo waKwambulula 6-14

  •  Kuputuka Kushimutwila naVatu 7

  •  Kukindulukila kuMutu 8

  •  Kunangula Vatu Vapwenga Tumbaji 9

  •  Kulumbununa Vyuma Mwafwelela 10

  •  Chihande 11

  •  Vyuma Namukashimutwila 12

  •  Jijila Jakwambulwilamo 13

  •  Kuzachisa jiVindiyo naMikanda 14

•  Chiyoyelo chaVaka-Kulishitu 15-16

  •  Chilongesa chaMbimbiliya chaChikungulwilo 16

•  Mazu aKukukulula 17

•  Kusangejeka naKwolola 18

•  Kulama Lwola 19

•  Nge Vanamitambukila Kuli Kalama Wakujinguluka 20

•  Chalumingo Chakukunguluka chaChihanda Chipwe chaNgalila 21

•  Chalumingo chaKwanuka Kufwa chaMwata 22

•  Kalama waKukunguluka chaChiyoyelo naMulimo 23

•  Cheyamani waKukunguluka chaChiyoyelo naMulimo 24

•  Muka-Kwolola Vakulwane naVaka-Kuzachila 25

•  Mashikola Akwavo 26

•  JiVindiyo 27

1. Jino jindongi najikafwa vosena vaze vali navihande haKukunguluka chaChiyoyelo naMulimo waVaka-Kulishitu. Vaka-kwambulula vosena vaze vanahane vihande, vatela kuhitukuka jindongi jinakuhanjika hachihande chavo jili muMukanda waKukunguluka chaChiyoyelo naMulimo, najize jili muno mufwomu shimbu kanda vahituluke chihande chavo. Vaka-kwambulula vosena vatela kulisuula kuhanjika vihande mushikola. Navaze nawa vanakukungulukanga lwola lwosena vanahase kuhana vihande, chikalu kaha nge vetavila vyuma yanangula Mbimbiliya nakutwama kweseka namwaya jishimbi javaka-Kulishitu jakwoloka. Kalama waKukunguluka chaChiyoyelo naMulimo, atela kushimutwila namutu mwasaka kulisonkesa mushikola uze kapwa muka-kwambululako mangana atachikize vyuma vize atela kutesamo nakumulweza numba nge natemo. Atela kushimutwila namutu kana oku uze eji kumunangulanga kwali (chipwe chisemi uze apwa muka-kwambulula kwali nge mutu kana kanyike). Vyuma atela kutwesamo vyapwa vyovimwe navize atela kutesamo mutu uze mwasaka kupwa muka-kwambulula wakuzeneka kumbapachisa.—od kapetu. 8 pala. 8.

2. Munyutu umwe. Chalumingo hichalumingo, hanyima yakwimba mwaso wakulivanga nakulomba, cheyamani waKukunguluka chaChiyoyelo naMulimo mwahanjikanga vyuma vize navilingisa vali mulizavu vapwenga napwipwi yakufwila kwivwilila kanawa kukukunguluka. Cheyamani atela kuhanjika vishina vize navinganyalisa chikuma chikungulwilo.

 3. Chihande: Minyutu 10. Mutwe wachihande navishina vivali chipwe vitatu navipwanga muMukanda waKukunguluka chaChiyoyelo naMulimo. Chihande kana vatela kuchihanjika kuli kalama chipwe muka-kuzachila wakulindunuka. Nge mukunoneka chakutanga Mbimbiliya chachalumingo hichalumingo muli mukanda wauhya, kaha mwatela kutalisa vindiyo yakujimbula mukanda kana. Muka-kuhanjika chihande mwavuluka vyuma vili muvindiyo vize vinalitombola nachihande. Oloze atela kuhanjika navishina vize vili mumukanda wakukunguluka. Nge kuli lwola, kaha atela nawa kuhanjika hamivwimbimbi yili mumukanda wakukunguluka yize vanahakemo mangana yilumbunune vishina navashimutwila. Nahase nawa kuhanjika hamikanda yikwavo vanenyikilako yize nayilumbununa vishina vili muchihande.

 4. Vishina VyamuMazu aKalunga: Minyutu 10. Muka-kuhanjika chihande katela kuhanjika mazu akujimbula chipwe kukukulula chihandeko. oloze atela kaha kuhulisa vihula vaze vali mulizavu. Vatela kuchihanjika kuli kalama chipwe muka-kuzachila wakulindunuka. Muka-kuhanjika chihande atela kuhulisa vali mulizavu vihula vyosena. Kaha nawa nahase kusakula numba nge vatela kutanga jivesi josena vanenyikilako chipwe chiku. Vaze navakumbululaho vatela kuhanjika kaha mujisekondi 30 nakuneha mwishi.

 5. Kutanga Mbimbiliya: Minyutu 4. Echi chihande vatela kuchihanjika kuli muka-shikola walunga. Muka-shikola atela kutanga kaha chakuzeneka kuhanjika mazu akujimbula chipwe akukukulula. Cheyamani wakukunguluka atela kukafwa vandumbwetu vatangenga mwakwoloka, nakulamuna kanawa lilimi, nakushindakanya mazu, nakwalumuna lizu, nakuhwimina hwimina, nakutanga kweseka nomu vahanjikila. Kaha hakuwana nge kutanga Mbimbiliya chimwe nachipwanga chachihi chikwavo chachisuku, ngocho Kalama waKukunguluka chaChiyoyelo naMulimo atela kutachikiza uhashi wavatu vaze mwahananga vihande vyakutanga.

6. Minyutu 15. Echi chihanda nachikafwa vaka-kwambulula vosena vatachikize jijila jakushimutwilamo navatu, nakuhotola uhashi wavo wakwambulula nakunangula. Nge chinahase, navakulwane muchikungulwilo navakiko navavahananga vihande mushikola.Vaka-shikola vatela kuzachila hapunga yamumbuloshuwa yaLihakeho Kutanganga naKunangulanga chipwe yamumbuloshuwa yaZangenu Vatu Muvanangule Vapwenga Tumbaji yize nayipwanga muvipango kusongo yachihande chavo muMukanda waKukunguluka chaChiyoyelo naMulimo. Lwola lumwe, nakupwanga chihande chakushimutwila. Chihande kana navachihanjikanga kuli mukulwane muchikungulwilo chipwe muka-kuzachila wakulindunuka.—Talenu  palangalafu 15 mangana mutachikize jindongi jamwakuhanyina chihande kana.

 7. Kuputuka Kushimutwila naVatu. Echi chihande vatela kuchihanjika kuli muka-shikola wapwevo chipwe walunga. Muka-kukafwa atela kupwa mutu wausonyi woumwe chipwe tanga yenyi. Muka-shikola namuka-kumukafwa vanahase kutwama chipwe kwimana.—Nge munakusaka kutachikiza vyavivulu kutalisa kuli echi chihande, kaha talenu  palangalafu 12 na  13.

 8. Kukindulukila kuMutu: Echi chihande vatela kuchihanjika kuli muka-shikola wapwevo chipwe walunga. Muka-kukafwa atela kupwa mutu wausonyi woumwe. (km 5/97 li. 2) Muka-shikola namuka-kumukafwa vanahase kutwama chipwe kwimana. Muka-shikola atela kuhanjika vyuma vize atela kushimutwila namutu uze ambulilile haungeji watete.—Nge munakusaka kutachikiza vyavivulu kutalisa kuli echi chihande, kaha talenu  palangalafu 12 na  13.

 9. Kunangula Vatu Vapwenga Tumbaji: Echi chihande vatela kuchihanjika kuli muka-shikola wapwevo chipwe walunga. Muka-kukafwa atela kupwa mutu wausonyi woumwe. (km 5/97 li. 2) Muka-shikola namuka-kumukafwa vanahase kutwama chipwe kwimana. Muka-shikola atela kusolola nge aputukanga lyehi kutwaminyina chilongesa chaMbimbiliya. Katela kuhanjika mazu akujimbula chipwe akukukululako, kuvanga kaha nge chikiko chilongesa vanamuhane kuzachilaho. Vaka-shikola vaze navahanjikanga echi chihande, kavatela kufwila kutanga jipalangalafu josena vanenyikilakoko numba tuhu vanahase kulinga ngocho.

 10. Kulumbununa Vyuma Mwafwelela: Echi chihande vatela kuchihanjika kuli mutu walunga nge chinasolola ngwavo chihande, oloze nge chinasolola ngwavo chimweso, kaha vatela kuchihanjika kuli muka-shikola wapwevo chipwe walunga. Muka-kukafwa atela kupwa mutu wausonyi woumwe chipwe tanga yenyi. Muka-kuhanjika chihande atela kuzachisa mikanda vanenyikilako nakukumbulula kanawa chihula mujila yakuzangama. Muka-kuhanjika chihande nahase kusakula kuvuluka mikanda vanenyikilako muchihande chenyi chipwe chiku.

 11. Chihande: Echi chihande vatela kuchihanjika kaha kuli mutu walunga, kaha nawa atela kuchihanjika kwijiva nge hichihande kuchikungulwilo. Kachi nge echi chihande chinazame mumbuloshuwa yaZangenu Vatu havihande vyakuhakilako A, kaha muka-kuhanjika chihande atela kushindakanya mwakuzachishila visoneka kana mumulimo wamuwande. Chakutalilaho, nahase kulumbununa lwola lwamwaza lwakuzachisa chisoneka kana, naulumbunwiso wacho nomu mwakulijingishila namutu hachisoneka kana. Oloze nge chihande kana chinazame hachilongesa chimwe chamumbuloshuwa yaZangenu Vatu, kaha muka-kuhanjika chihande atela kushindakanya mwakuzachishila vishina kana mumulimo wamuwande. Nahase kushindakanya chakutalilaho vanazachisa muchishina chakulivanga chamuchilongesa chipwe kuzachisa kala chisoneka vanavuluka muchilongesa kana nge nachikafwa vatu.

   12. Vyuma Namukashimutwila: Vyuma vanashimutwila mupalangalafu yino neyi yinakavangizaho vatela kuvizachisa hakuhanjika chihande “[cha]Kuputuka Kushimutwila naVatu” “[nacha]Kukindulukila kuMutu.” Nge muka-kuhanjika chihande kavamuhanyine jindongi jekako, kaha atela kufwila kwazana muchano wawashi wamuMbimbiliya uze naukwata mutu ali nakushimutwila nenyi kumuchima, nakumulingisa akatwaleho kushimutwila nenyi haungeji ukwavo. Muka-kuhanjika chihande atela kusakula chihande chize nachikwata hakuyoya chavatu vamungalila yenyi. Nge nasake kaha nahase kuhana mutu mukanda chipwe kumutalisa vindiyo yimwe yamuVinoma vyaKuzachisa haKunangula. Mushishisa chakulamina mumutwe jila yimwe yakushimutwilamo navatu, vaka-kuhanjika vihande vatela kupwa nauhashi wakushimutwila navatu wakufwana nge, kusolwela vatu chisambo nakuhanjika mwahanjikila vatu.

   13. Jijila Jakwambulwilamo: Muka-shikola atela kuhanjika chihande chenyi kweseka nangalila yavo. Chakutalilaho:

1.  (1) KuZuvo hiZuvo: Eyi hijila yakwambulilamo vatu kuzuvo hizuvo—kuzachisa jijila jakufwana nge kutambukila vatu hajizuvo javo, chipwe kuvatumina shinga chipwe kuvasonekela mikanda—nakukindulukila kumutu uze mwashimutwilile nenyi omu mwapwile nakuzata kuzuvo hizuvo.

2.  (2) Kwambulula Mukutulukila: Eyi hijila yakwambulilamo vatu mujimbu nge muli nakushimutwila kaha vihande vyeka. Munahase kwazana mujimbu wamuMbimbiliya navakwenu vaka-milimo chipwe vaka-shikola chipwe vatu mwatunga navo chipwe nge muli nakutambuka ungeji chipwe kala kweshokwo muli hakuzata milimo yenu yahakumbi hakumbi.

3.  (3) Kwambulwila Kuvihela Vyasanga: Eyi hijila yakwambulilamo vatu mujimbu kuzachisa tumatemba twakushindumuna, chipwe kwambulila kuvihela vyakusekasanyina chipwe mumikwakwa chipwe mumilemba yakuhemena chipwe kuukunjikilo wajiminyau chipwe kukala chihela kuze kuli vatu.

 14. Kuzachisa jiVindiyo naMikanda: Muka-kuhanjika chihande nahase kuzachisa vindiyo chipwe kala mukanda kweseka nomu vili vyuma. Kachi nge muchihande chenyi muli navindiyo chipwe nge nasakula kuzachisa vindiyo, kaha atela kaha kuyijimbula nakushimutwilaho chakuzeneka kuyitalisa.

15. Hakukumisa kwimba mwaso, muchihanda kanechi chaminyutu 15 namupwanga chihande chimwe chipwe vivali vize navikafwa vali mulizavu vazachisenga vyuma navalinangula muMazu aKalunga mukuyoya chavo. Vihande kanevi navavihanjikanga kuli tulama chipwe vaka-kuzachila vakulindunuka, oloze chihande chavinakusakiwa hachikungulwilo chenu vatela kuchihanjikanga kaha kuli kalama. Nge chihande chinasolola ngwavo kushimutwila, kaha muka-kuhanjika chihande nahase kuhulisa vali mulizavu vihula vikwavo kuhakila kuli vize vanasoneka lyehi. Atela kujimbula mukavatu chihande chenyi mangana apwenga nalwola lwakushindakanya vishina vyavilemu nakuhana nawa lwola vali mulizavu vazanemo. Nge muchihande chenyi muli nakwihwojola, kaha nachiwaha kuli uze vali nakwihwojola kuya nakuhanjikila kuutenda nge chinahase, muchishishisa chakutwama mulizavule.

  16. Chilongesa chaMbimbiliya chaChikungulwilo: Minyutu 30. Echi chilongesa vatela kuchitwaminyina kuli kalama uze natemo kutwaminyina. (Muvikungulwilo muze kamwatwama tulama vavavuluko, vanahase kuzachisa vaka-kuzachila vakulindunuka.) Lizavu lyavakulwane lyatela kusakula ndumbwetu uze natemo kutwaminyina Chilongesa chaMbimbiliya chaChikungulwilo. Vaze vanatemo vatela kutwaminyina kanawa chakuzeneka kulya lwola, vatela kushindakanya visoneka vize vinazame hachihande kana, nakukafwa vosena vakavangizenga vyuma vanalinangula. Vaka-kutwaminyina vatela kutanga nawa jindongi jize javuluka mwakutwaminyina chihanda chavihula nakukumbulula. (w23.04 li. 24, lipwata) Nge chihande chamuchalumingo kana munachishimutwila lyehi kanawa, kaha kamwatela kushimbwisa chilongesako. Nge chinahase, chalumingo hichalumingo mwatela kuzachisa vaka-kutwaminyina navaka-kutanga vakulisezaseza. Nge cheyamani waKukunguluka chaChiyoyelo naMulimo mwamba ngwenyi chilongesa chaMbimbiliya chachikungulwilo nachipwa mukavatu, kaha muka-kutwaminyina atela kutachikiza mwakulingila ngocho. Nahase kusakula jipalangalafu jimwe jize kavatela kutangako.

17. Minyutu 3. Cheyamani waKukunguluka chaChiyoyelo naMulimo mwahituluka muvishina vimwe vyavilemu munalinangula. Kaha nawa atela kuvuluka mukavatu vishina vyachalumingo nachizaho. Nge kuli lwola, kaha nahase kuvuluka vandumbwetu vaze navakapwa mushikola chalumingo nachizaho. Nge chinahase, kaha cheyamani atela kuvuluka vyakuvilika vyavilemu chipwe kutanga mikanda yayilemu hakukukulula. Vyakuvilika vyakufwana nge vyakuya muwande, nakuwahisa haZuvo yaWangana, kavatela kuvivilika kuutendako, oloze vatela kuvisoneka nakuvilamika haliliva lyamijimbu. Nge lwola lwakuvilika lunakehe, kaha cheyamani atela kulweza vandumbwetu vali navihande muchihanda chaChiyoyelo chaVaka-Kulishitu mangana vakeheseko lwola lwavihande vyavo. (Talenu  palangalafu 16 na  19.) Kukunguluka chatela kukuma namwaso nakulomba.

18. Omu nachikuma chihande hichihande chamuka-shikola, cheyamani waKukunguluka chaChiyoyelo naMulimo atela kuzachisa munyutu umwe mangana asangejeke nakwolola muka-shikola kuzachisa chilongesa vanamuhane kuzachilaho. Omu cheyamani mwasanyika muka-shikola, katela kuvuluka nambala yachilongesa ali nakuzachilahoko. Oloze hanyima yakuhanjika chihande, cheyamani atela kusangejeka muka-shikola nakuvuluka nambala yachilongesa apwanga nakuzachilaho navyuma vyamwaza natesamo, chipwe kulumbununa mujila yalikoji vyuma atela kukazachilaho muka-shikola. Cheyamani nahase nawa kuhanjika havyuma vyeka vyamwaza vize navinganyalisa muka-shikola navaze vali mulizavu. Nge muka-shikola mwasakiwa kumukafwa hachilongesa vanamuhane kuzachilaho chipwe havyuma vyeka, kaha cheyamani atela kulinga ngocho kupenge, pamo hakukumisa kukunguluka chipwe halwola lweka kuzachisa mbuloshuwa yaZangenu Vatu, nayaKunangulanga chipwe mukanda waShikola yaMulimo.—Talenu  palangalafu 19,  24, na  25 mangana muwane mijimbu yikwavo kutalisa kuli cheyamani waKukunguluka chaChiyoyelo naMulimo, namulimo wamuka-kwolola vakulwane navaka-kuzachila.

19. Vihande vyosena, namazu aze mwahanjika cheyamani waKukunguluka chaChiyoyelo naMulimo kavyatela kuhambakana halwola lwavyoko. Numba tuhu vihande vyamuMukanda waKukunguluka chaChiyoyelo naMulimo vili nalwola vyatela kukuma, muka-kuhanjika chihande nahase tuhu kusezako lwola lumwe kachi nge nakumisa kuhanjika vishina vyosena vyamuchihande chenyi. Kachi nge vaka-kuhanjika vihande vanali lwola, kaha cheyamani waKukunguluka chaChiyoyelo naMulimo chipwe muka-kwolola vakulwane navaka-kuzachila atela kuvakafwila kupenge. (Talenu  palangalafu 24 na  25.) Kukunguluka chosena kuhakilako vene namyaso nakulomba chatela kumbata ola yimwe naminyutu 45.

20. Nge chikungulwilo vanachitambukila kuli kalama wakujinguluka, kaha mwatela kukavangiza vihande vyosena vili muMukanda waKukunguluka chaChiyoyelo naMulimo, kufumisako kaha Chilongesa chaMbimbiliya chaChikungulwilo chize chili muchihanda chaChiyoyelo chaVaka-Kulishitu. Kalama wakujinguluka mwazachisanga minyutu 30 yachilongesa kanechi hakuhanjika chihande chamulimo. Shimbu kanda chihande chamulimo, cheyamani waKukunguluka chaChiyoyelo naMulimo mwahituluka vihande vize munalinangula, nakuvuluka vyachalumingo nachizaho, nakuvilika vyuma vize vili nakusakiwa, nakutanga mikanda yinakusakiwa kaha kufumaho mwasanyika kalama wakujinguluka. Omu nachikuma chihande chamulimo, kalama wakujinguluka mwakukulula kukunguluka namwaso uze nasakula. Kaha nahase kusanyika ndumbwetu weka alombe. Nge vanamitambukila kuli kalama wakujinguluka, kaha kakwatela kupwa vaka-shikola vaze navaya nakuhanjika vihande mukapete kekako. Lizavu lyachikungulwilo linahase kupwa nakukunguluka chavo halwola kalama wakujinguluka mwatambukila chikungulwilo chize chatala lizavu kana. Chipwe ngocho, lizavu kaneli lyatela kukevwilila kuchihande chamulimo chize mwakahanjika kalama wakujinguluka halwola natambukila chize chikungulwilo.

21. Nge muli muchalumingo chakukunguluka chachihanda chipwe changalila, kaha kamwatela kupwa kukukunguluka chachikungulwiloko. Mwatela kwanukisa chikungulwilo ngwenu vihande vananoneka muchalumingo kana mwatela kulinangulavyo hauka chipwe mwatanga.

22. Kachi nge chilika chaKwanuka Kufwa chaMwata nachikapwa mukachi kachalumingo, kaha kakweshi kukapwa Kukunguluka chaChiyoyelo naMulimoko.

23. Kalama uze vanasakula kulizavu lyavakulwane ikiye mwapwa kalama waKukunguluka chaChiyoyelo naMulimo. Mwapwanga namulimo wakumona nge kukunguluka chili nakutambuka mukulonga kaha nawa vihande vanavihanjika kweseka najindongi. Atela kuzachila hamwe namuka-kwolola vakulwane navaka-kuzachila. Nge Mukanda waKukunguluka chaChiyoyelo naMulimo unalovoka lyehi, kaha kalama waKukunguluka chaChiyoyelo naMulimo atela kunonekela chimweza vihande vyosena mutukweji vavali. Vihande kana shina vyavaka-shikola, navihande vyeka vyamuMukanda waKukunguluka chaChiyoyelo naMulimo nakunoneka nawa vandumbwetu vaze navakapwa vacheyamani vahakukunguluka vaze vasakula kulizavu lyavakulwane. (Talenu  palangalafu 3-16 na  24.) Shimbu kanda ahane vihande vaka-shikola, atela kukekesa kanawa myaka ali nayo muka-shikola, nachinyingi chenyi nakumona nge ndumbwetu kana mwapwa wakukasunuka kuhanjika chihande kana. Atela kuzachisa vishina kanevi nahakuhana vihande vyeka kuli vandumbwetu. Vaka-shikola vosena vatela kuvahana vihande kuzachisa fwomu yaChihande chaKukunguluka chaChiyoyelo naMulimo waVaka-Kulishitu (S-89), shimbu kuchinasale vyalumingo vitatu. Kalama waKukunguluka chaChiyoyelo naMulimo atela kulamika lipapilo lyavihande vyosena vyahakukunguluka kanechi haliliva lyamijimbu. Lizavu lyavakulwane linahase kusakula mukulwane weka chipwe muka-kuzachila mangana amukafwengako. Oloze vakulwane kaha vakiko vatela kuhana vandumbwetu vihande vize kavyeshi vyamushikolako.

24. Kalama umwe mwapwanga cheyamani waKukunguluka chaChiyoyelo naMulimo muchalumingo chimwe, kaha muchalumingo chikwavo namupwanga kalama weka. (Muvikungulwilo muze kamwatwama tulama vavavuluko, vanahase kuzachisa vaka-kuzachila vakulindunuka.) Cheyamani kana mwapwanga namulimo wakuwahisanga mazu akujimbula nawawa akukukulula. Cheyamani mwajimbulanga vihande vyosena, oloze nge tulama vavandende, kaha nahase kuhananga navihande vyeka chikumanyi vihande vize muli jivindiyo vize kavyeshi nakusakiwa kushimutwila nalizavuko. Cheyamani katela kuhanjika mazu amavulu hakujimbula vihande chipwe hakusangejeka vaze vanavihaneko. Lizavu lyavakulwane lyatela kumona tulama vakulindunuka vaze vatela kuzata mulimo kana. Tulama vakulindunuka navazatanga mulimo kana muvyalumingo vyakulisezaseza. Kweseka nachikungulwilo chenu, kalama waKukunguluka chaChiyoyelo naMulimo vanahase kumuzachisa mapapa kakavulu kupwa cheyamani kuhambakana tulama vakwavo vakulindunuka. Nge kalama natemo kutwaminyina Chilongesa chaMbimbiliya chaChikungulwilo, kaha natemo kupwa cheyamani wakukunguluka. Oloze mwatela kwanuka ngwenu kalama uze mwapwa cheyamani atela kusangejeka vaka-shikola nakuvahana nakuvolola mujila yazangi. Cheyamani atela kumona ngwenyi kukunguluka chinakumu mulwola lwakutamo. (Talenu  palangalafu 17 na  19.) Nge cheyamani nasake, kaha nawa hautenda hali fwashi, kaha kwatela kupwako mayikolofwoni yeka mangana ajimbwileho chihande chinakavangizaho oku ndumbwetu mwahanjika chihande kana ali hautenda. Nge cheyamani nasake, kaha nahase kutwama kumesa yize yili hautenda hanyima yakujimbula chihande chamuka-shikola chakutanga Mbimbiliya navihande vyamuchihanda chaHaka Muchima kuMulimo waKwambulula. Echi nachimikafwa muhone kulya lwola.

25. Chapwa chakutamo kuzachisa kalama uze atachikiza kanawa kuhanjika vihande mangana azate mulimo kanou. Mulimo wamuka-kwolola vakulwane navaka-kuzachila naupwanga wakuhananga punga vakulwane navaka-kuzachila. Punga kana atela kuyihanyinanga kupenge nge namono ngwenyi chili nakusakiwa kulinga ngocho kweseka navihande vize navahanjika. Vihande kana vinahase kupwa vihande vyamuKukunguluka chaChiyoyelo naMulimo, navihande vyalikungumbuwa, nakutwaminyina chipwe kutanga haChilongesa chaKaposhi Kakutalila chipwe Chilongesa chaMbimbiliya chaChikungulwilo. (Talenu  palangalafu 19.) Nge muchikungulwilo muli tulama vavavulu vakulindunuka vaze nawa vatachikiza kunangula kanawa, kaha munahase kuzachisa vakulwane vakulisezaseza mwaka himwaka mangana vapwenga vaka-kwolola vakulwane navaka-kuzachila. Kachapwa chakutamo kuli muka-kwolola vakulwane navaka-kuzachila kukafwa vaka-kuhanjika vihande kala lwola navahana vihandeko.

26. Nge vaka-shikola vavavulu, kaha vikungulwilo vinahase kupwa natupete tuze vaka-shikola vakwavo navahanjikilangamo vihande. Mukapete hikapete mwatela kupwa muka-kukafwa kuhana punga wakulindunuka, chikumanyi uze apwa kalama. Nge chinahase, kaha muka-kuzachila wakulindunuka nahase kuzata mulimo kana. Lizavu lyavakulwane lyatela kusakula vandumbwetu vaze navazata mulimo kana nakumona nge chinatemo kuuhana kuli vandumbwetu vakulisezaseza chipwe chiku. Muka-kukafwa kuhana punga atela kukavangiza jindongi jili  mupalangalafu 18. Nge kuliko kapete, kaha vaka-shikola vatela kuvalweza vayenga mukapete kana hakukumisa chihanda chaVishina VyamuMazu aKalunga chize chatwama hachihanda chaVishina Vyavilemu VyamuMazu aKalunga. Kaha vatela jino kukinduluka muZuvo yaWangana nge vanakumisa chihanda chaHaka Muchima kuMulimo waKwambulula.

27. Jivindiyo jimwe jize vanasakula natujizachisanga hakukunguluka. Jivindiyo jakuzachisa mukachi kachalumingo namujiwananga haChisete cha JW Library^® app kuzachisa jishinga namakina akulisezaseza.

© 2023 Watch Tower Bible and Tract Society of Pennsylvania

S-38-LV 11/23