HaMarch 23, vatu vakuheta ku 12 miliyoni chipwe kuhambakanaho navakeza kuKwanuka Kufwa chaMwata. Ava vatu kana navakalivwisa kuwaha kwivwilila kuchihande mwakahanjika ndumbwetu chize chalumbununa wana atuhana Yehova wandando yakusokola nakutokwa chize vatushika kukapwa nacho kulutwe. (Isa. 11:6-9; 35:5, 6; 65:21-23; Yowa. 3:16) Muka-kuhanjika chihande keshi ikiye kaha mwakahana unjiho halikumbi kanako. Oloze tuvosena tunahase kukahana unjiho hakukatambwokesa nachisambo vangeji jetu. (Loma 15:7) Talenu hajijila jimwe jino.

• Muchishishisa chakutwama nakuvandamina omu nachiputuka chilika, tambwokesenu nachisambo vangeji navaze vazeya kushipilitu

• Hakuzakama vatu vaze mwalanyine, mwatela nawa kusolwela chisambo navatu veka vaze vaneza mwomwo yakuvalanya kuli vandumbwenu. Twamenu hamwe navangeji mangana muzachishile hamwe Mbimbiliya namukanda wenu wamyaso

• Nge chihande chinakumu, kaha kamwatela kuya washiko mangana mukumbulule vihula navamihulisa vangeji. Nge kamweshi nalwola lwakulinga ngochoko mwomwo Zuvo yaWangana navayizachisa kuchikungulwilo chikwavo, kaha mwatela kuwahisa vyuma mangana mukavatambukile kumembo avo chakuzeneka kulangisa. Nge kamwejivile keyala yavoko, kaha munahase kuhanjika ngwenu: “Nguli nakusaka ngwivwenga omu munashinganyeka havyuma munevu. Tunahase kukaliwana ngachilihi mangana tukashimutwile?”