CHIHULA 10
Vyuma Muka Vyakulutwe Yatufwelelesa Mbimbiliya?
“Vaka-kwoloka navakaheta mavu, kaha navakatwamangaho haya myaka yosena.”
“Mavu nawapwangako haya myaka yosena.”
“Mwata Wakulitulaho Yehova mwakamina kufwa haya myaka yosena, mwakahunda masoji kumeso avatu vosena.”
“Halwola kana, meso atupuputa nawakatona, kaha matwitwi atujika matwitwi nawakajikuka. Halwola kana, vaka-kumbilikita navakasambwojoka nge tupaji, malimi atumama nawakatwa jingunda. Mupambo namukajikuka meya, kaha mulikundu namukapwanga vana vatulwiji.”
“Mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako. Vyuma vyakulivanga vinafumuko lyehi.”
“Navakatunga jizuvo javo, kaha navakatwamangamo, navakalimanga mande amivinyo, kaha navakalyanga mihako yayo. Kaveshi kukatunga jizuvo javo mangana veka vakatwamengamoko, kaveshi kukalima mangana veka vakalyenga vyuma vanalimiko. Mwomwo makumbi avatu jami nawakavula nge makumbi amutondo, vaze ngwasakula navakalivwisanga kuwaha milimo yamavoko avo.”
