Amose 4:1-13
4 “Ivwenu mazu awa, enu vitole vakuMbashane,Enu muli hapili yaSamaliya,+Enu mapwevo muli nakulyapula vaka-kukalikiza+ nakuyanjisa vaka-kuhutwa,Enu mweji kutumanga malunga* jenu ngwenu, ‘Tunehelenuko vyakunwa.’
2 Mwata Wakulitulaho Yehova nalishingi kujila chenyi, nambe ngwenyi,‘“Talenu! Makumbi ali nakwiza omu nangukamikoleka namalovo akusukikako nyama,Kaha vaze navakasalaho nangukavakoleka namalovo akulovesa vaishi.
3 Mutu himutu mwakalovokela mulihanya lyakembwe nakuchina.Kaha navakamitapwila kuHalamone.” Omu mukiko mwanambe Yehova.’
4 ‘Yenunga kuMbetele mukalingileko vilinga vyakuzombwojoka jishimbi,*+Yenunga kuNgilingale mukalingileko jishili jajivulu.+Twalenu vimuna jenu vakuvatula+ nachimene,Navyuma vyakusokesa mumakumi+ halikumbi lyamuchitatu.
5 Lumbenu mbolo yachimbalwila+ yawana wakusakwilila.Vilikenu kuvatu mawana enu akulisakila namuhana.Mwomwo evi vikiko mwazanga kulinga enu vaIsalele.’ Omu mukiko mwanambe Mwata Wakulitulaho Yehova.
6 Yehova nambe ngwenyi, ‘Ami ngwamiminyine vyakulya mujinganda jenu josena,Ngwalingishile nawa mujizuvo jenu josena muzeneke kupwa vyakulya.+Oloze enu kamwakindulukile kuli amiko.+
7 Kangwaminokeselele vula hatukweji vatatu shimbu kanda ngonde yakwahako.+Ngwanokeselenga vula munganda yimwe, oloze munganda yikwavo pimbi.Vula yanokelenga hamusuka umwe wamavu,Oloze hamusuka ukwavo kayanokelengako, ngocho homine chau.
8 Vatu vamujinganda jivali chipwe jitatu vatalyangililenga nalipwila nakuya kunganda yimwe vakanwe meya,+Oloze lipwila lyavo kalyavatukilengako.Chipwe ngocho, enu kamwakindulukile kuli amiko.’+ Omu mukiko mwanambe Yehova.
9 Yehova nambe ngwenyi, ‘Ngwaminehelele musana wakaza nakambukungulu.+Mwalimine matepa namande amivinyo amavulu,Oloze vambimba makumbi valilenga mikuyu yenu namilive yenu.+Chipwe ngocho, enu kamwakindulukile kuli amiko.+
10 Ngwaminehelele musongo wachihita nge uze wasolokele muEjipitu.+Ngwajihile vakweze jenu najipoko jamikwale+ nakumitambula tuvalu twenu.+Ngwamilingishile muhumbike livumba lyamuvilombo vyenu.+Oloze enu kamwakindulukile kuli amiko.’ Omu mukiko mwanambe Yehova.
11 Yehova nambe ngwenyi, ‘Ngwanongesele lifuchi lyenu,Nge muze ngwanongesele Sotome naNgomola.+Kaha mwapwile nge lukunyi luze vanafumisa hakakahya.Oloze enu kamwakindulukile kuli amiko.’+
12 Shikaho enu vaIsalele, evi vikiko nangulinga cheka kuli enu.Evi vikiko nangulinga cheka kuli enu.Enu vaIsalele, lizangenu muliwane naKalunga kenu.
13 Mwomwo ikiye atengele jipili,+ napeho.+Eji kulwezanga vatu vishinganyeka vyenyi,Eji kwalumunanga kumunyika chahalungulungu lyakucha kupwa milima,+Kaha eji kutambukanga havihela vyakulunduka vyahamavu.+Lijina lyenyi ikiye Yehova Kalunga wamayongomena.”
