Amose 7:1-17
7 Evi vikiko angumwenesele Mwata Wakulitulaho Yehova: Atumine chendo chavambimba makumbi omu jimbuto jakukotokela* japwile nakusoka. Jimbuto kana jasokele omu valingile vanakambe lyehi mwila wamwangana.
2 Omu vambimba kana vamanyishile kulya vyuma vyakusoka hamavu, ngwambile ngwami: “Ove Mwata Wakulitulaho Yehova, vakonekele.+ Uno Yakova mwayoya* ngachilihi hakuwana nge apwa wakuhehela?”+
3 Ngocho Yehova alumwine vishinganyeka vyenyi.*+ Yehova ambile ngwenyi: “Vyuma kana kavyeshi kusolokako.”
4 Evi vikiko angumwenesele Mwata Wakulitulaho Yehova: Mwata Wakulitulaho Yehova anehele kakahya mangana avazangamise. Komishile mwambe, kaha kochele chimbwa chalifuchi.
5 Jino ngwambile ngwami: “Ove Mwata Wakulitulaho Yehova, kanda naulinga chuma kanako.+ Uno Yakova mwayoya* ngachilihi hakuwana nge apwa wakuhehela?”+
6 Ngocho Yehova alumwine vishinganyeka vyenyi.*+ Mwata Wakulitulaho Yehova ambile ngwenyi: “Navyevi nawa kavyeshi kusolokako.”
7 Evi vikiko nawa angumwenesele: Ngwamwene Yehova nemana hakembwe vatungile nalungoji lwakupimisa lwakuzezalala, kaha akwachile lungoji lwakupimisa lwakuzezalala mulivoko lyenyi.
8 Jino Yehova angwihwile ngwenyi: “Ove Amose, uli nakumona ika?” Kaha ngwamukumbulwila ngwami: “Nguli nakumona lungoji lwakupimisa lwakuzezalala.” Yehova ambile ngwenyi: “Nangupima vatu jami vaIsalele nalungoji lwakupimisa lwakuzezalala. Kangweshi kuvakonekela chekako.+
9 Vihela vyakulunduka vyaIsaka+ navakavipuzula, kaha vihela vyajila vyaIsalele navakavinongesa.+ Nangukakatukila vaze vakuzuvo yaYelovowame napoko yamukwale.”+
10 Jino kapilishitu Amajiya wakuMbetele+ atumine mazu kuli Yelovowame+ mwangana wavaIsalele ngwenyi: “Amose ali nakusaka kukufumbukila muno muIsalele.+ Vatu vanazeye kwivwilila kuvyuma ali nakuhanjika.+
11 Amose ali nakwamba ngwenyi, ‘Yelovowame mwafwa kupoko yamukwale, kaha vaIsalele navavafumisa mulifuchi lyavo nakuvatwala muufunge.’”+
12 Jino Amajiya ambile kuli Amose ngwenyi: “Ove muka-kumona vyakumwenesa, chinyina kulifuchi lyaYuta ukatondele vyakulya* vyove kuze nakupolofwetelako.+
13 Kanda naupolofwetela muMbeteleko,+ mwomwo chapwa chihela chajila chamwangana,+ kaha nawa hizuvo yawangana.”
14 Amose ambile kuli Amajiya ngwenyi: “Ami hakavanga kangwapwile ngukapolofwetoko, kaha nawa kangwapwa ngumwanakapolofwetoko. Oloze ngwapwile ngukafunga,+ kaha ngwawahishilenga nawa mikuyu.*
15 Oloze Yehova angufumishile kumulimo wakufunga utanga wamikoko. Yehova ambile kuli ami ngwenyi, ‘Yako ukapolofwete kuli vatu jami vaIsalele.’+
16 Shikaho ivwa mazu nahanjika Yehova: ‘Ove unambe ngwove, “Kanda naupolofweta vyuma navisolokela vaIsaleleko,+ kanda nawambulula+ vyuma navisolokela vaze vakuzuvo yaIsakako.”
17 Yehova nambe ngwenyi: “Pwevo lyove mwakapwa muka-ujila munganda, kaha vana vove vamalunga navava vamapwevo navakalindumuka kujipoko jamikwale. Lifuchi lyove navakalipulilalyo namukole wakupimisa, kaha ove naukafwila mulifuchi lyalipi. VaIsalele nawa navakavafumisa mulifuchi lyavo nakuvatwala muufunge.” ’”+
Kwinyikila Chamwishi
^ Kulumbununa, jimbuto jamuJanuary naFebruary.
^ Hepe., “mwakatuka.”
^ Chipwe “evwile kupihya.”
^ Hepe., “mwakatuka.”
^ Chipwe “evwile kupihya.”
^ Hepe., “ukalile vyakulya.”
^ Chipwe “kaha ngwapwile ngumuka-kutuvatuva jikuyu jakumisukumole.”
