Eseta 1:1-22
1 Jino hamakumbi aAhaswelu* uze ayulilenga jingalila 127+ kufuma kuIndiya swi nakuEchopa,*
2 hamakumbi aze atwaminenga halitanda lyenyi lyawangana muzuvo yakukola* muShushane,*+
3 mumwaka wamuchitatu wachiyulo chenyi, alingililile vilolo jenyi, navangamba jenyi vosena chiwanyino chachinene chakulya. Kaha maswalale javaPeleja,+ navaMete,+ navatu vavalemu, navilolo vajingalila vosena valikungulwile kumeso enyi,
4 avalwekesele luheto lwamuwangana wenyi, nakutohwa chaluvaji lwenyi, naulangaji wenyi. Avalwekeselevyo hamakumbi amavulu akuheta ku 180.
5 Omu akumine aze makumbi, mwangana alingile chiwanyino chamakumbi 7. Achilingilile vatu vosena vaze vapwile kuzuvo yakukola* muShushane,* vatu vavalemu navava vamokomoko. Achilingilile kuchipango chamilemba yakuzuvo yamwangana.
6 Kaha kwapwile mahina akusukejeka awanda wamwaza, nawawa ashikima, akukashilila namikole yalinyu lyamwaza, nayeyi yaungonyi kumakulu apalata nakujipanda jamamole. Kwapwile vitwamo vyaulu napalata hamalolwa akwala achila, nawawa atoma, nawawa ausungwa.
7 Vatu vavahanyinyine vinyo mujipasa* jaulu, kaha lupasa hilupasa lwapwile lwakulihandununa. Mwangana avalongeselele vinyo vyavivulu kweseka noho hakuminyine ngolo jenyi.
8 Vavahanyine lushimbi lwakwamba nge mutu himutu anwenga vinyo mweshomwo nasakila mwomwo mwangana alwezele vilolo vakuzuvo yenyi ngwenyi mutu himutu anwenga vinyo mweshomwo nasakila.
9 Kaha Lisano Vashachi+ nawa alingilile mapwevo chiwanyino chakulya kuzuvo* yaMwangana Ahaswelu.
10 Jino halikumbi lyakusokesa 7, Mwangana Ahaswelu awahililile mwomwo yavinyo anwine, kaha alwezele vilolo jenyi 7, vaMehumane, naMbijita, naHalavone,+ naMbingita, naAvangata, naZetale, naKalakase vaze vamuzachililenga
11 vanehe Lisano Vashachi kumeso amwangana oku navwale muchama* wawangana mangana alwekese vatu navilolo kuwaha chenyi, mwomwo apwile wamwaza chikuma.
12 Oloze Lisano Vashachi akanyinenga mazu amwangana akumusanyika aze vamulwezelenga kuli vilolo jamwangana. Ngocho mwangana apihililile nakwivwa matoto.
13 Kaha mwangana ashimutwilile navaka-mangana vaze vapwile nachinyingi chakutala havihande. (Mwomwo omu mukiko alingilenga mwangana, ahulishilenga vaze vatachikijile jishimbi nomu mwakuyulila vihande vatale havihande vyenyi.
14 Vatu vaze vamulwezelenga mangana vapwile Kalashena, naShetale, naAtamata, naTalashishe, naMelese, naMalasena, naMemukane, vilolo+ 7 vakuPeleja nakuMete vaze vapandaminenga kuli mwangana, vaze vapwile navihela vyavinene muwangana).
15 Mwangana avehwile ngwenyi: “Kweseka najishimbi, vyuma muka natulinga kuli Lisano Vashachi hakuwana nge nakane kwononoka mazu ayami Mwangana Ahaswelu aze vamulwezanga kuli vilolo jami?”
16 Jino Memukane ahanjikile kumeso amwangana, navilolo ngwenyi: “Lisano Vashachi kapihishile kuli mwangana kahako,+ oloze nakuli vilolo vosena, navatu vosena vaze vali mujingalila jaMwangana Ahaswelu.
17 Omu mapwevo vosena navatachikiza chuma nalingi ou lisano, navalumbilisanga malunga javo nakwamba ngwavo, ‘Mwangana Ahaswelu ngwetu asanyikile Lisano Vashachi, oloze akanyine kwiza.’
18 Ngocho mapwevo javilolo vakuPeleja nakuMete vaze navatachikiza chuma nalingi ou lisano, navalinganga mwomumwe kuli malunga javo, kaha nachineha sonyi kuvatu nakuvevwisa kupihya.
19 Kachi nge chinawahe kumeso ayove mwangana, kaha hana lushimbi mangana valusoneke hajishimbi javaPeleja navaMete jize kavalumunako.+ Lushimbi kana lwambenga nge, Vashachi kanda akeza cheka nakwimana kumeso aMwangana Ahasweluko. Kaha mwangana amutambule chihela chenyi nakuchihana kuli pwevo weka wamwaza kuhambakana ikiye.
20 Omu navevwa lushimbi lwove muwangana wove, mapwevo vosena navahananga kavumbi malunga javo, navava vavalemu navava vamokomoko.”
21 Mazu kana evwishile mwangana navilolo kuwaha, kaha mwangana alingile nge muze ahanjikile Memukane.
22 Ngocho mwangana atumine mikanda mujingalila jenyi josena,+ ngalila hingalila namukanda wayo kweseka nomu vasonekela vasona javo. Vatu vosena vavasonekelele mumalimi avo, kaha malunga vavalwezele vapwenganga nangolo* hali vaze vakujizuvo javo. Lunga hilunga ahanjikenga lilimi lyenyi.
Kwinyikila Chamwishi
^ Kulumbununa, Kaseleke I, mwanaNdaliu Wamunene. (Ndaliu Hishitapishishe).
^ Chipwe “nakuKushe.”
^ Chipwe “munganda yamwangana; muchihela chakukola.”
^ Chipwe “muSusa.”
^ Chipwe “muSusa.”
^ Chipwe “kunganda yamwangana; kuchihela chakukola.”
^ Chipwe “muvinoma; muviloso.”
^ Chipwe “kunganda.”
^ Chipwe “lihina lyakujinga kumutwe.”
^ Chipwe “vapwenganga vamyata.”
