Eseta 2:1-23
2 Omu vyakumine vyumevi, Mwangana Ahaswelu+ atulishile matoto enyi, kaha anukile vyuma alingile Vashachi,+ nomu vayulile chihande chenyi.+
2 Jino vangamba jamwangana vahanjikile ngwavo: “Mwangana vamutondele vana vamapwevo vamwaza, vaze kanda valisavaleho lyehi namalunga.
3 Kaha mwangana atongole vatemesa mujingalila+ jamuwangana wenyi wosena vakungulule vana vamapwevo vamwaza vaze kanda valisavaleho lyehi namalunga nakuvaneha muzuvo yakukola* muShushane,* kuzuvo yamapwevo. Kaha vapwenga mumavoko aHengai+ chilolo wakuheuka wamwangana, muka-kulama mapwevo, kaha vavahane maji akuwahisa mijimba yavo.
4 Weshowo mwanapwevo navevwila kuwaha kuli mwangana, ikiye mwapwa lisano lyenyi muchishishisa chaVashachi.”+ Mazu vahanjikile awahile kuli mwangana, kaha alingile vene ngocho.
5 Kuzuvo yakukola* muShushane*+ kwapwile lunga umwe wakaYuleya. Lijina lyenyi apwile ikiye Molotekai+ mwanaYaile, Yaile mwanaShimei, Shimei mwanaKishe kaMbenjamine.+
6 Molotekai apwile havatu vaze vatwalile muufunge kufuma kuYelusalema hamwe naYekonyiya*+ mwangana wavaYuta, vaze Nevukataneza mwangana waMbavilone atwalile muufunge.
7 Molotekai ikiye alelele Hatasa* chipwe ngwetu Eseta mwana ndumbwaise walunga,+ mwomwo Eseta kapwile naise nanayeko. Ou mwanapwevo apwile wamwaza mujimba nachihanga. Omu afwile ise nanaye, Molotekai amumbachile nakumulela kupwa mwanenyi.
8 Omu valingile hivanavilika lyehi mazu amwangana nalushimbi lwenyi, vanehele vana vamapwevo muzuvo yakukola* muShushane* nakuvahaka mumavoko aHengai,+ kaha naEseta vamunehele kuzuvo* yamwangana nakumuhaka mumavoko aHengai, muka-kulama mapwevo.
9 Ou mwanapwevo evwishilenga Hengai kuwaha, kaha Hengai amwivwililile uselewa,* ngocho alongesele vyuma mangana vamuhane maji akuwahisa mujimba wenyi,+ nakumuhana kulya chamwaza. Atongwele vana vamapwevo 7 vakuzuvo yamwangana vamuzakame. Kaha amufumishile kuze apwile nakumutwala navangamba jenyi hamwe kuchihela chamwaza chakuzuvo yamapwevo.
10 Eseta kahanjikile vyuma vimwe hali vatu jenyi+ chipwe vausoko wenyiko, mwomwo Molotekai+ amukanyishile kulweza mutu vyuma kana.+
11 Kaha hakumbi hakumbi, Molotekai atambukilenga kulutwe lwachipango chazuvo yamapwevo mangana atachikize omu apwile nakuyoyela Eseta, navyuma vyalingiwilenga kuli ikiye.
12 Mapwevo vosena vavawahishilenga hatukweji 12. Vavakwichilenga maji amila+ hatukweji 6, kaha tukweji vakwavo 6 vavakwichilenga maji ambalasamu,+ namaji eka akulisezaseza, mwomwo omu mukiko valingilenga mapwevo hakuwahisa mijimba yavo. Omu mwanapwevo himwanapwevo akumishilenga tukweji kana, ayilenga kuli Mwangana Ahaswelu.
13 Omu alingile hanalizange lyehi kufuma kuzuvo yamapwevo nakuya kuzuvo yamwangana, vyeshovyo alombelenga vamuhanyinengavyo.
14 Ayile muzuvo yamwangana nachingoloshi, kaha nachimene ayile kuzuvo yamuchivali yamapwevo yize valaminenga kuli Shashangaze chilolo wakuheuka wamwangana,+ muka-kulama tulumbu twamasano. Kaha kakindulukile cheka kuli mwanganako kuvanga nge mwangana amwivwilanga kuwaha nakumusanyika ezenga.+
15 Omu lwahetele lwola lwaEseta lwakwingila muzuvo yamwangana, Eseta kalombele chuma numba chimweko shina vize kaha avulukile Hengai chilolo wakuheuka wamwangana, muka-kulama mapwevo. (Eseta vamwivwililenga uselewa kuli vosena vaze vamumwenenga.) Eseta apwile mwanaAvihayile ndumbwaise yaMolotekai. Kaha Molotekai amumbachile nakumulela kupwa mwanenyi.+
16 Eseta vamutwalile kuzuvo yaMwangana Ahaswelu mukakweji wakusokesa 10, kakweji waTevete* mumwaka wakusokesa 7+ wachiyulo chenyi.
17 Ngocho mwangana azangile Eseta kuhambakana vana vamapwevo vosena, amwivwilile uselewa* kuhambakana mapwevo vosena vaze vapwile kanda valisavaleho lyehi namalunga. Amuvwikile muchama wawangana kumutwe wenyi nakumulingisa kupwa lisano+ wakushisa Vashachi.+
18 Jino mwangana alingilile Eseta chiwanyino chachinene chakulya, asanyikile vilolo jenyi navangamba jenyi vosena kuchiwanyino kana. Asokwele vafunge vaze vapwile mujingalila jenyi, kaha ahanyinenga vatu mawana kweseka navyuma apwile navyo.
19 Molotekai atwamine kuchikolo chamwangana omu vavakungulwile kamuchivali mapwevo vaze vapwile kanda valisavaleho lyehi namalunga.*+
20 Eseta kahanjikile vyuma vimwe hali vatu jenyi chipwe vausoko wenyiko,+ nge muze amulwezele Molotekai. Eseta atwalileho lika kulinga vyuma amulwezelenga Molotekai, nge muze alingilenga halwola luze vamulelelenga.+
21 Hamakumbi aze atwaminenga Molotekai kuchikolo chamwangana, vilolo jamwangana vavali vaMbingitane naTeleshe, vaka-kulama kuvikolo vapihililile chikuma, kaha vasakile kujiha* Mwangana Ahaswelu.
22 Omu Molotekai atachikijile chuma kana, hahaze vene alwezele Lisano Eseta. Kaha Eseta nawa ayile nakulweza mwangana vyuma amulwezele Molotekai.
23 Vahehwojwele chihande kana, kaha vawanyine ngwavo mukiko vene, ngocho vaze malunga vavali vavasukikile hachitondo. Chihande kana vachisonekele mumukanda wamijimbu yamumakumbi aze hameso amwangana.+
Kwinyikila Chamwishi
^ Chipwe “munganda yamwangana; muchihela chakukola.”
^ Chipwe “muSusa.”
^ Chipwe “muSusa.”
^ Chipwe “Kunganda yamwangana; Kuchihela chakukola.”
^ Ulumbunwiso, “Muluta.”
^ Chipwe “kunganda.”
^ Chipwe “muSusa.”
^ Chipwe “munganda yamwangana; muchihela chakukola.”
^ Chipwe “amusolwelele zangi yakwilila.”
^ Tala Chihande B15.
^ Chipwe “amusolwelele zangi yakwilila.”
^ Chipwe “omu vakungulwile kamuchivali vana vamapwevo.”
^ Hepe., “kukwata livoko hali.”
