Eseta 3:1-15
3 Omu vyakumine vyumevi, Mwangana Ahaswelu azezwile Hamane+ mwanaHamateta kaAngange,+ amuhanyine ngolo jajivulu kuhambakana vakwavo vilolo apwilenga navo.+
2 Kaha vangamba jamwangana vosena vaze vapwilenga kuchikolo chamwangana, vafukaminenga hamavu nakulifukula kuli Hamane, mwomwo omu mukiko ahanjikile mwangana kutalisa kuli ikiye. Oloze Molotekai akanyine kufukama nakulifukula kuli ikiye.
3 Ngocho vangamba jamwangana vaze vapwilenga kuchikolo chamwangana vambile kuli Molotekai ngwavo: “Mwomwo ika unakanyina kwononoka lushimbi lwamwangana?”
4 Vamulwezelenga ngocho hakumbi hakumbi, oloze ikiye kavevwililileko. Jino vaze vangamba valwezele Hamane amone numba nge Molotekai vatela kumwecha atwalilile navilinga vyenyi nyi chiku,+ mwomwo avalwezele ngwenyi apwile kaYuleya.+
5 Omu Hamane amwene ngwenyi Molotekai nakane kufukama hamavu nakulifukula kuli ikiye, evwile matoto.+
6 Oloze Hamane amwene ngwenyi kacheshi kupwa chamangana kujiha* Molotekai ukawenyiko, mwomwo kwapwile navatu vakwavo vakumuyachi waMolotekai. Ngocho Hamane ajinyine kunongesa vaYuleya vosena, vatu vakumuyachi waMolotekai vaze vapwile muwangana waAhaswelu.
7 Mukakweji wakulivanga, kakweji waNyisane,* mumwaka wakusokesa 12+ wachiyulo chaMwangana Ahaswelu, vazachishile Pule+ (chipwe ngwetu Tutachikijilo) kumeso aHamane mangana vawane likumbi nakakweji vatelelele kunongesa vatu jaKalunga. Ngocho katachikijilo kaholokelele hakakweji wakusokesa 12, kakweji waAtale.*+
8 Jino Hamane ambile kuli Mwangana Ahaswelu ngwenyi: “Kuli vatu vamwe vanalimwange muli vatu+ vamujingalila jamuwangana wove,+ kaha jishimbi javo jalihandununa najeji javatu veka naveka vosena. Vatu kana kaveshi kwononoka jishimbi jayove mwanganako, kaha kacheshi kuwaha kuli ove mwangana kuvechako.
9 Kachi nge chinawahe kuli ove mwangana, kaha hana lushimbi lwakwitavisa kujiha vatu kana. Ami nanguhana vilolo jitalende* japalata 10,000 mangana vajihake muze mwakulamina vikumba vyamwangana.”*
10 Ngocho mwangana azulile kazeya kakatachikijilo+ kulivoko lyenyi nakukahaka kulivoko lyaHamane+ mwanaHamateta kaAngange+ uze apwile muka-kole wavaYuleya.
11 Jino mwangana ambile kuli Hamane ngwenyi: “Palata navatu vosena vili mumavoko ove, ngocho linga mweshomwo unamono ngwove munawahe.”
12 Ngocho vasanyikile vaka-kusoneka+ jamwangana halikumbi lyakusokesa 13 lyakakweji wakulivanga. Kaha vasonekele+ jishimbi jaHamane josena jize alwezele vasatalape jamwangana, navanguvulu vajingalila, navilolo javatu veka naveka. Kungalila hingalila vatumineko mukanda kweseka nomu vasonekela vasona javo, kaha vatu vosena vavasonekelele mumalimi avo. Mikanda kana vayisonekele mulijina lyaMwangana Ahaswelu, kaha vahakileko kazeya kamwangana kakatachikijilo.+
13 Mikanda kana vayitumine natunganda kujingalila jamwangana josena, kaha vahanyine lushimbi lwakujiha vaYuleya vosena, vakweze navakulwane, vanyike namapwevo nakuvalalisa mulikumbi lyangongo, likumbi lyakusokesa 13 lyakakweji wakusokesa 12, kakweji waAtale,+ nakutambula nawa luheto lwavo.+
14 Mazu apwile muze mumikanda vatelele kuwamona mujingalila josena kupwa hilushimbi, kaha vatelele kuvilika kuvatu vosena mangana vakalizange halikumbi lize.
15 Vaze tunganda vayile washiwashi+ nge muze avalwezele mwangana, kaha vahanyine luze lushimbi muzuvo yakukola* muShushane.*+ Mwangana naHamane vatwamine nakunwa vinyo, oloze vatu munganda yaShushane* vapwile muchimbalanganyi.
Kwinyikila Chamwishi
^ Hepe., “kukwata livoko hali.”
^ Tala Chihande B15.
^ Tala Chihande B15.
^ Talende yimwe yapwile jikilongalamu 34.2. Tala Chihande B14.
^ Chipwe pamo, “nangumbata jitalende japalata 10,000 javaze navazata mulimo kana nakujihaka muze mwakulamina vikumba vyamwangana.”
^ Chipwe “munganda yamwangana; muchihela chakukola.”
^ Chipwe “muSusa.”
^ Chipwe “yaSusa.”
