Eseta 4:1-17
4 Omu Molotekai+ ejivile vyuma vyosena vize vyalingiwile,+ apihililile nakupula uvwalo wenyi, kaha avwalile vikeleyi nakulishikila uto. Ayile hakachi kanganda, kaha alilile nalizu lyakukanguka.
2 Ayile nakukumina kuchikolo chamwangana, mwomwo kakwapwile mutu ahambakanyinenga hachikolo chamwangana oku navwale vikeleyiko.
3 Kaha mujingalila josena+ muze vavilikile mazu amwangana najishimbi jenyi, vaYuleya valishonene chikuma, valijilikile kulya,+ kaha valilile jimbimbi. Vavavulu vasavalile muuto oku vanavwale vikeleyi.+
4 Omu vangamba jaEseta vamapwevo, navilolo jenyi vakuheuka vejile nakumulweza mujimbu kana, ahombele chikuma. Ngocho Eseta atumine uvwalo kuli Molotekai mangana avwale muchishishisa chakuvwala vikeleyi, oloze ikiye akanyine.
5 Jino Eseta asanyikile Hatake, chilolo wakuheuka wamwangana uze vatongwele mangana alamenga Eseta. Kaha alwezele Hatake ayenga akahulise Molotekai mangana amulweze vyuma vyapwile nakusoloka nomu vyatalikishile.
6 Hatake ayile kuli Molotekai kuchihela chasanga chamunganda chize chapwile kulutwe lwachikolo chamwangana.
7 Kaha Molotekai amulwezele vyuma vyosena vyasolokele kuli ikiye, nakumulweza nawa jimbongo+ jize Hamane ashikile kuhana kuchihela chakulamina vikumba vyamwangana mangana vajihe vaYuleya.+
8 Amuhanyine nawa mukanda vatumine kuShushane*+ uze wapwile nalushimbi lwakujiha vaYuleya. Amulwezele akaulwekese Eseta, akamulumbunwinewo nakulweza Eseta+ akaye kuli mwangana akamulembelele mangana akatetele vatu jenyi.
9 Hatake akindulukile nakulweza Eseta vyuma vyosena vize ahanjikile Molotekai.
10 Kaha Eseta alwezele Hatake akalweze Molotekai+ mazu ano ngwenyi:
11 “Vangamba jamwangana vosena navatu jenyi vamujingalila vatachikiza lushimbi elu ngwavo kachi nge pwevo chipwe lunga mwengila muchipango+ chamwangana chakuzeneka kumusanyika, vamujihe. Oloze kachi nge mwangana mwamwinyika mbwechi yenyi yaulu,+ kaha kaveshi kumujihako. Shikaho, ami kavangusanyikile kuli mwangana hamakumbi 30 anahichimoko.”
12 Omu Molotekai vamulwezele mazu ahanjikile Eseta,
13 ikiye akumbulwile Eseta ngwenyi: “Kanda naushinganyeka ngwove omu navajiha vaYuleya vosena ove nauyovoka mwomwo yakutwama kuzuvo yamwanganako.
14 Kachi nge nauhola kulu halwola luno, nakupwa weka mwakafwa vaYuleya nakuvayovola,+ oloze tachikiza ngwove ove navaze vakuzuvo yaiso namufwa. Iyaze natachikiza, pamo evi vikiko vakuhakila hachihela kana mangana ukafwe vatu halwola lwakufwana nge elu.”+
15 Jino Eseta akumbulwile Molotekai ngwenyi:
16 “Yako ukungulule vaYuleya vosena vali muShushane* nakuvalweza valijilike kulya+ hali ami. Hamakumbi atatu, ufuku namusana, kanda navalya nakunwako.+ Ami navangamba jami vamapwevo nawa natulitwamina kulya. Kufumaho nanguya kuli mwangana numba tuhu nanguhokola lushimbi hakulinga ngocho. Kachi nge nangufwa, kaha ngufwenga tuhu.”
17 Molotekai ayile kwenyi, kaha akalingile vyuma vyosena vize amulwezele Eseta.
