Eseta 5:1-14
5 Halikumbi lyamuchitatu,+ Eseta avwalile uvwalo wenyi wawangana, kaha emanyine muchipango chamukachi chazuvo* yamwangana kuze kwakulitalasana nazuvo yamwangana. Mwangana atwamine halitanda lyenyi lyawangana muzuvo yenyi kwakulitalasana nachikolo chazuvo.
2 Omu mwangana amwene Lisano Eseta nemana muchipango, mwangana amwivwilile uselewa, kaha amwinyikile mbwechi yaulu+ yize yapwile mulivoko lyenyi. Ngocho Eseta apandamineko nakukwata kusongo yayize mbwechi.
3 Jino mwangana amuhulishile ngwenyi: “Uli nakusaka ika ove Lisano Eseta? Vyuma muka uli nakusaka kungulomba? Nangukuhana numba vene chimbwa chawangana wami.”
4 Eseta akumbulwile ngwenyi: “Kachi nge chinawahe kumeso ayove mwangana, kaha ukeze hamene naHamane+ kukulya chize ngunakuwahishila.”
5 Jino mwangana alwezele vatu jenyi ngwenyi: “Kalwezenu Hamane ezenga washiwashi mangana tulinge nge omu nahanjika Eseta.” Ngocho mwangana naHamane vayile kukulya chize awahishile Eseta.
6 Omu vapwile nakunwa vinyo, mwangana ambile kuli Eseta ngwenyi: “Vyuma muka uli nakusaka kungulomba? Nangukuhanavyo vene. Vyuma muka uli nakusaka? Nangukuhana numba vene chimbwa chawangana wami.”+
7 Eseta ambile ngwenyi: “Vyuma nguli nakusaka kukulomba shina evi:
8 Kachi nge ove mwangana unangwivwila uselewa, kaha nawa unamono ngwove chinawahe kumeso ove, ukeze hamene naHamane kukulya chize nangumiwahishila, kaha hamene nangukalinga nge omu unahanjika ove mwangana.”
9 Halikumbi lize Hamane ayile oku nawahilila mumuchima wenyi. Jino Hamane awanyine Molotekai ali kuchikolo chamwangana, kahomu amwene ngwenyi Molotekai nakane kukatuka nakumwivwa woma, Hamane apihililile naMolotekai.+
10 Oloze aunjishile muchima wenyi nakuya kuzuvo yenyi. Kaha asanyikile masepa jenyi napuwenyi Zeleshe.+
11 Hamane alitukwojwele kumeso avo hakupwa naluheto lwaluvulu, navana vavavulu,+ nomu vamuzezwile kuli mwangana nakumutohwesa hali vilolo navangamba jamwangana.+
12 Hamane ambile cheka ngwenyi: “Lisano Eseta nawa nasanyika kaha yami nguyenga namwangana kukulya nawahisa.+ Kaha nahamene nawa nangusanyika ngukapwe nenyi namwangana hamwe.+
13 Oloze vyuma vyosenevi kavyeshi nakungusuulwisako omu nguli nakumonanga Molotekai kaYuleya natwame kuchikolo chamwangana.”
14 Ngocho pwevo lyenyi Zeleshe namasepa jenyi vosena vambile kuli ikiye ngwavo: “Vajike chitondo chachisuku chajikuvite 50.* Kaha hamene nachimene ukalweze mwangana ngwove Molotekai vamusukikeho.+ Kahove ukaye tuhu namwangana nakulivwisa kuwaha kukulya navakamiwahishila.” Mazu kana awahile kuli Hamane, kaha vajikile chize chitondo.