Eseta 6:1-14
-
Molotekai navamuvumbika kuli mwangana (1-14)
6 Mwangana kasavalile tulo* haufuku uzeko. Ngocho alwezele vatu vamunehele mukanda wamijimbu yamumakumbi aze,+ kaha vautangile kumeso amwangana.
2 Mumukanda kana vawanyinemo mazu ambulwile Molotekai akutalisa kuli vilolo jamwangana vavali vaMbingitane naTeleshe, vaka-kulama kuvikolo vaze vajinyine kujiha* Mwangana Ahaswelu.+
3 Jino mwangana ahulishile ngwenyi: “Vyuma muka vyamwaza vanamulingila Molotekai hachuma echi alingile?” Vangamba jamwangana vambile ngwavo: “Navimwe vanamulingila vyauchi.”
4 Jino ambile ngwenyi: “Iya ali muchipango?” Hamane ejile muchipango+ chakusali chakuzuvo* yamwangana mangana ahanjike namwangana vyakusukika Molotekai kuchitondo chize amujikilile.+
5 Kaha vangamba jamwangana vambile kuli ikiye ngwavo: “Hamane+ ikiye nemana muchipango.” Ngocho mwangana ambile ngwenyi: “Mulwezenu ezenga kuno.”
6 Omu ejile Hamane, mwangana ambile kuli ikiye ngwenyi: “Vyuma muka vatela kulingila lunga uze vanasake kutohwesa kuli mwangana?” Hamane alyambile mumuchima wenyi ngwenyi: “Mutu weka mukaze navatohwesa kuli mwangana kuhambakana yami?”+
7 Ngocho Hamane ambile kuli mwangana ngwenyi: “Lunga uze navasaka kutohwesa kuli mwangana,
8 vamumbachile uvwalo wawangana+ uze eji kuvwalanga mwangana, nakavalu uze eji kutambukilanga mwangana. Kavalu kana vamuvwike muchama wakulipwila kumutwe wenyi.
9 Uze uvwalo nakavalu vavihake mumavoko achilolo wamulemu wamwangana. Kaha uze lunga navasaka kutohwesa kuli mwangana vamuvwike uvwalo kana, vamunyinyise hakavalu nakumutambukisa muchihela chasanga chamunganda. Kaha vavilike kumeso enyi ngwavo, ‘Omu mukiko veji kulinganga kuli lunga uze navasaka kutohwesa kuli mwangana.’”+
10 Hahaze vene mwangana ambile kuli Hamane ngwenyi: “Anguhwisako! Mbata uvwalo nakavalu ulinge vyuma kana kuli Molotekai kaYuleya uze eji kutwamanga kuchikolo chamwangana. Linga vyuma vyosena unahanjika, kanda nauzombokelaho chuma numba chimweko.”
11 Ngocho Hamane ambachile uvwalo nakuvwika Molotekai,+ kaha amunyinyishile hakavalu nakumutambukisa muchihela chasanga chamunganda. Kaha avilikile kumeso enyi ngwenyi: “Omu mukiko veji kulinganga kuli lunga uze navasaka kutohwesa kuli mwangana.”
12 Kufumaho Molotekai akindulukile kuchikolo chamwangana, oloze Hamane alishonene, ayile washiwashi kuzuvo yenyi oku nalifwiki kumutwe.
13 Omu Hamane ambulilile pwevo lyenyi Zeleshe+ namasepa jenyi vyuma vyosena vyalingiwile kuli ikiye, masepa jenyi napwevo lyenyi Zeleshe vambile kuli ikiye ngwavo: “Kachi nge Molotekai ou ali lyehi nangolo kukuhambakana ove apwa wakutanga yavaYuleya,* kaha kaweshi kumuhasako, oloze ove yove navafungulula.”
14 Shimbu vapwile nakuhanjika mazu kana kuli ikiye, vilolo jamwangana vejile, vamumbachile nakuya nenyi kukulya chize awahishile Eseta.+
Kwinyikila Chamwishi
^ Hepe., “Tulo vamwangana vachinyine.”
^ Hepe., “kukwata livoko hali.”
^ Chipwe “chakunganda.”
^ Hepe., “wakumbuto yavaYuleya.”
