Eseta 8:1-17
8 Halikumbi lize, Mwangana Ahaswelu ahanyine zuvo yaHamane,+ muka-kole wavaYuleya+ kuli Lisano Eseta. Kaha Molotekai ejile kuli mwangana mwomwo Eseta alwezele mwangana usoko wavo naMolotekai.+
2 Mwangana azulile kazeya kenyi kakatachikijilo+ kaze atambwile kuli Hamane, kaha akahanyine kuli Molotekai. Jino Eseta atongwele Molotekai apwenga mukulwane kuzuvo yaHamane.+
3 Eseta ayile nakuhanjika cheka kuli mwangana. Afukamine kumahinji amwangana, alilile nakumulembelela mangana ahonese lupi luze ajinyine Hamane kaAngange kulinga kuli vaYuleya.+
4 Jino mwangana enyikile Eseta mbwechi yenyi yaulu,+ kaha Eseta akatukile nakwimana kumeso amwangana.
5 Eseta ambile ngwenyi: “Kachi nge chinawahe kuli ove mwangana, nge unangwivwila uselewa, kachi nge chinatemo kuli ove mwangana, nge unangwivwila kuwaha, yitavisa vasoneke lushimbi lwakwalumuna mazu amumikanda yaHamane+ mwanaHamateta kaAngange,+ yize asonekele mangana vanongese vaYuleya mujingalila jayove mwangana josena.
6 Mwomwo kangweshi kuhasa kumika hakumona lupi kanelu nalwiza hali vatu jamiko. Kangweshi kuhasa kumika hakumona vausoko wami navavanongesako.”
7 Ngocho Mwangana Ahaswelu ambile kuli Lisano Eseta naMolotekai kaYuleya ngwenyi: “Ngunahane zuvo yaHamane kuli ove Eseta,+ oloze Hamane vanamusukika hachitondo+ mwomwo ajinanga kunongesa* vaYuleya.
8 Shikaho soneka mweshomwo unamono ngwove munawahe hali vaYuleya. Usoneke mulijina lyamwangana nakuhakako kazeya kamwangana kakatachikijilo, mwomwo lushimbi luze vanasoneka mulijina lyamwangana nakuhakako kazeya kamwangana kakatachikijilo kaveshi kulwalumunako.”+
9 Ngocho vasanyikile vaka-kusoneka jamwangana halikumbi lyakusokesa 23 lyakakweji wamuchitatu, kakweji waShivane.* Kaha vasonekele mazu aMolotekai osena aze ahanjikile hali vaYuleya, navasatalape,+ navanguvulu, navilolo vajingalila+ 127 kufuma kuIndiya swi nakuEchopa. Kungalila hingalila vatumineko mukanda kweseka nomu vasonekela vasona javo, kaha vatu vosena vavasonekelele mumalimi avo. VaYuleya nawa vavasonekelele mulilimi lyavo, kweseka nomu vasonekela vasona javo.
10 Mikanda kana ayisonekele mulijina lyaMwangana Ahaswelu nakuhakako kazeya kamwangana kakatachikijilo.+ Kaha vayitumine natunganda vakutambukila hatuvalu vajimbushi vaze vapichila kuzata milimo yamwangana.
11 Muze mumikanda, mwangana etavishile vaYuleya mujinganda josena vakalikungulule mangana vakalwile myono yavo, oloze vakajihe nakulalisa vatu vamujingalila josena, namapwevo navanyike vaze navakavalukuka, kaha vakapupe nawa luheto lwavo.+
12 Vyuma vyosena evi vyatelele kusoloka halikumbi lyolimwe mujingalila josena jaMwangana Ahaswelu, halikumbi lyakusokesa 13 lyakakweji wakusokesa 12, kakweji waAtale.*+
13 Mazu apwile muze mumikanda vatelele kuwamona mujingalila josena kupwa hilushimbi. Kaha vatelele kuvilika kuvatu vosena mangana vaYuleya vakalizange halikumbi lize, vakajihe vaka-kole javo.+
14 Vaze tunganda vakutambukila hatuvalu vajimbushi vaze vazachishilenga kumilimo yamwangana, vayile washiwashi nge muze ahanjikile mwangana. Lushimbi kana valwambulwile namuzuvo yakukola* muShushane.*+
15 Jino Molotekai afumine kumeso amwangana oku navwale uvwalo wawangana ushikima utoma, namuchama waunene waulu, nachikuto chalihina lyamwaza lyaungonyi.+ Kaha vatu vamunganda yaShushane* vawahililile.
16 VaYuleya vosena vawahililile nakulisamba, kaha vavavumbikilenga.
17 Kaha kujingalila josena, nakujinganda josena, nakweshokwo lwahetele lushimbi lwamwangana, vaYuleya vawahililile nakulisamba, valingilenga viwanyino vyakulya. Kaha vatu veka naveka vavavulu vamulifuchi valivulukilenga kupwa vaYuleya+ mwomwo vatu kana vevwilenga vaYuleya woma.
Kwinyikila Chamwishi
^ Hepe., “mwomwo ajinanga kukwata livoko hali.”
^ Tala Chihande B15.
^ Tala Chihande B15.
^ Chipwe “namunganda yamwangana; namuchihela chakukola.”
^ Chipwe “muSusa.”
^ Chipwe “yaSusa.”
