Eseta 9:1-32
9 Halikumbi lyakusokesa 13 lyakakweji wakusokesa 12, kakweji waAtale,*+ omu lwahetele lwola lwakulinga mwayile mazu amwangana nalushimbi lwenyi,+ omu vaka-kole javaYuleya valizangile kufungulula vaYuleya, vyuma vyalumukile, vaYuleya vakiko vafungulwile vaka-kole javo vaze vavahungile.+
2 VaYuleya valikungulwile hamwe mujinganda javo jamujingalila josena jaMwangana Ahaswelu+ mangana vanongese vaze vasakile kuvajiha. Kakwapwile mutu ahashile kwimana kumeso avoko mwomwo vaYuleya vevwishile vatu vosena muzuzu.+
3 Jino vilolo vajingalila vosena, navasatalape,+ navanguvulu, navosena vaze vatalilenga milimo yamwangana vakundwijilenga vaYuleya mwomwo vevwile Molotekai woma.
4 Molotekai apwile nangolo+ hali vaze vakuzuvo* yamwangana, kaha puho yenyi yahetele kujingalila josena mwomwo akwachilenga ngolo.
5 VaYuleya vajihile vaka-kole javo najipoko jamikwale, vavalingile mwosena muze vasakile.+
6 Kaha muzuvo yakukola* muShushane,*+ vaYuleya vajihilemo malunga 500.
7 Vajihile naPalashandata, naNdalafwone, naAsapata,
8 naPolata, naAtaliya, naAlitata,
9 naPalamashata, naAlisai, naAlitai, naVaizata.
10 Ava malunga 10 vapwile vana vaHamane, Hamane mwanaHamateta muka-kole wavaYuleya.+ Oloze omu valingile hivanavajihi lyehi, kavavapupile luheto lwavoko.+
11 Halikumbi lize, mwangana vamulwezele kuvula chavatu vaze vafwile muzuvo yakukola* muShushane.*
12 Jino mwangana ambile kuli Lisano Eseta ngwenyi: “Muzuvo yakukola* muShushane,* vaYuleya vanajihimo malunga 500 navana vaHamane 10. Nyi ngachilihi mujingalila jeka jamwangana?+ Vyuma vyeka muka mungulomba jino? Nangukuhanavyo. Vyuma vyeka muka uli nakusaka? Nangukulingilavyo.”
13 Ngocho Eseta ambile ngwenyi: “Kachi nge chinawahe kuli ove mwangana,+ kaha yitavisa vaYuleya vaze vali muShushane* nahamene valinge nge muze vanalingi lelo.+ Kaha yitavisa nawa vana vaHamane vamalunga 10 vavasukike kuchitondo.”+
14 Mwangana avetavishile valinge ngocho. Vahanyine nawa lushimbi muShushane,* kaha vana vaHamane 10 vavasukikile.
15 Jino vaYuleya muShushane* valikungulwile cheka halikumbi lyakusokesa 14 lyakakweji waAtale,+ kaha vajihile malunga 300 muShushane,* oloze kavavapupile luheto lwavoko.
16 VaYuleya vakwavo vamujingalila jamwangana navakiko valikungulwile hamwe, kaha valwilile myono yavo.+ Vajihile vaka-kole javo,+ vajihile vatu 75,000 oloze kavavapupile luheto lwavoko.
17 Chuma kana chalingiwile halikumbi lyakusokesa 13 lyakakweji waAtale. Jino halikumbi lyakusokesa 14 vanokele, kaha vasakwile likumbi kana kupwa hilikumbi lyakulya nakuwahilila.
18 VaYuleya muShushane* navakiko valikungulwile hamwe halikumbi lyakusokesa 13,+ nalyeli lyakusokesa 14.+ Jino halikumbi lyakusokesa 15 vanokele, kaha vasakwile likumbi kana kupwa hilikumbi lyakulya nakuwahilila.
19 Shikaho vaYuleya vaze vatwaminenga mujinganda jamujingalila vasakwile likumbi lyakusokesa 14 lyakakweji waAtale kupwa hilikumbi lyakulya nakuwahilila.+ Lyapwile hilikumbi lyakuwahilila lize vatu valihanyinenga vyakulya.+
20 Molotekai+ asonekele vyumevi mumikanda, kaha ayitumine kuli vaYuleya vosena vaze vatwaminenga mujingalila jaMwangana Ahaswelu jize japwile mwakamwihi, najize japwile kwakusuku.
21 Avalwezele vanukenga likumbi lyakusokesa 14 lyakakweji waAtale, nalyeli lyakusokesa 15 mwaka himwaka.
22 Mwomwo hamakumbi kana vaYuleya vasokokele kuli vaka-kole javo, kaha mukakweji kana vawahililile mukutela kulyonyinga, valisambile mukutela kulishona.+ Vavalwezele vanukenga makumbi kana kupwa himakumbi akulya nakuwahilila aze vatu valihanyinenga vyakulya nakuhananga mawana kuli vaka-kuhutwa.
23 VaYuleya vetavilile kulinganga chiwanyino kana, navyuma vize avasonekelele Molotekai.
24 Mwomwo Hamane+ mwanaHamateta kaAngange+ muka-kole wavaYuleya ajinyine kunongesa vaYuleya.+ Azachishile Pule+ chipwe ngwavo Katachikijilo mangana avaluwanganyise nakuvanongesa.
25 Oloze omu ejile Eseta nakwimana kumeso amwangana, mwangana ahanjikile ngwenyi:+ “Lupi elu ajinyinanga vaYuleya+ lumukindulukile ivene,” kaha mazu kana vawasonekele. Ngocho vamusukikile kuchitondo+ navana venyi.
26 Shikaho vavulukilile makumbi aze ngwavo Pulime, kufuma kulizu lyaPule.*+ Jino mwomwo yavyumevi vasonekele mumukanda kanou, navize vamwene vavene, navize vyavawanyine,
27 vaYuleya navana vavo, navaze valipanjikile kuli vakiko,+ valikashile ngwavo navakanukanga awa makumbi avali nakulinganga vyuma vasoneka kutalisa kuli vakiko mwaka himwaka halwola vatongola.
28 Vavalwezele vanukenga nakulama makumbi kana muvisemunwino vyavo, namujitanga javo, namujingalila javo, namujinganda javo. VaYuleya kavatelele kuvulyama makumbi kana awa aPulimeko. Kaha vana vavo kavatelele kulitwamina kulinga chilika kanechiko.
29 Jino Lisano Eseta mwanaAvihayile, naMolotekai kaYuleya, vasonekele nangolo mukanda wamuchivali wakushindakanya vyuma vasonekele kutalisa kuPulime.
30 Kaha atumine mikanda yamazu amuchano, akuunda kuli vaYuleya vosena vaze vatwaminenga mujingalila 127+ jamuwangana waAhaswelu,+
31 yakuvalweza valamenga makumbi aPulime halwola vatongola nge muze vavalwezele kuli Molotekai kaYuleya naLisano Eseta,+ nge muze nawa valikashile vavene navana vavo ngwavo navalamanga makumbi kana,+ nakulijilikanga kulya,+ nakumulembelela Kalunga.+
32 Mazu ahanjikile Eseta ashindakanyine havyumevi vyakutalisa kuPulime,+ kaha vawasonekele mumukanda.
Kwinyikila Chamwishi
^ Tala Chihande B15.
^ Chipwe “vakunganda.”
^ Chipwe “munganda yamwangana; muchihela chakukola.”
^ Chipwe “muSusa.”
^ Chipwe “munganda yamwangana; muchihela chakukola.”
^ Chipwe “muSusa.”
^ Chipwe “Munganda yamwangana; Muchihela chakukola.”
^ Chipwe “muSusa.”
^ Chipwe “muSusa.”
^ Chipwe “muSusa.”
^ Chipwe “muSusa.”
^ Chipwe “muSusa.”
^ Chipwe “muSusa.”
^ “Pule,” kulumbununa “Katachikijilo.” Vulukiso yakwamba ngwavo “Pulime” (Tutachikijilo) yejile nakwimanyinako chiwanyino chavaYuleya chize valingilenga mukakweji wakusokesa 12 mukalenda yajila. Tala Chihande B15.
