Ezekele 10:1-22
10 Omu ngwatalile, ngwamwene chuma chimwe chasolokele nge lilolwa lyasafwila hautangatanga uze wapwile helu lyamitwe yavakeluve, kaha chuma kana chafwanyine nge litanda.+
2 Kalunga ambile kuli uze lunga avwalile lihina lyamwaza+ ngwenyi: “Ingila mutufumbo vakunyengumuka,+ mwishi yavakeluve, umbate makala akakahya+ aze ali mukachi kavakeluve nakuzalisa mavoko ove, uwamwangile hanganda.”+ Kaha ngwamumwene mwengila.
3 Vaze vakeluve vemanyine kuluhachi lwazuvo kuchilyo omu engilile uze lunga, kaha chipango chamukachi chosena chazalile nalivwi.
4 Upahu waYehova+ wafumine haze havakeluve nakuya muchikolo chazuvo. Ngocho zuvo yazalile nalivwi,+ kaha chipango chosena chamunyikile naupahu waYehova.
5 Chivumo chamavava avakeluve chevwakanyine namuchipango chakusali, kwijiva nge lizu lyaKalunga Wangolo Josena.+
6 Jino Kalunga alwezele uze lunga avwalile lihina lyamwaza ngwenyi: “Mbata kakahya mutufumbo vakunyengumuka, mukachi kavakeluve.” Uze lunga engilile nakwimana kuluhachi lwakafumbo.
7 Kaha keluve umwe olwele livoko lyenyi kukakahya kaze kapwile mukachi kavakwavo vakeluve.+ Ambachile kakahya kamwe nakukahaka mumavoko ayauze lunga avwalile lihina lyamwaza.+ Kaha uze lunga akambachile nakulovoka.
8 Vaze vakeluve vapwile navyuma vimwe vize vyasolokele nge mavoko amutu mwishi yamavava avo.+
9 Omu ngwatalile, ngwamwene tufumbo vawana kujihachi javakeluve. Kuluhachi lwakeluve hikeluve kwapwile kafumbo kamwe, kaha vaze tufumbo vapwile nakuvyakuma nge lilolwa lyakulusolite.+
10 Vaze tufumbo vawana vosena vapwile vakulifwana. Vasolokelenga kwijiva nge mukachi muli kafumbo kakwavo.
11 Omu vatambukilenga, vahashilenga kuya mumitamba yosena yiwana chakuzeneka kwalumuka, mwomwo vakavilenga kuze yatalishilenga mitwe yavakeluve chakuzeneka kwalumuka.
12 Mijimba yavakeluve yosena, jinyima javo, namavoko avo, namavava avo, natufumbo vavo vosena vawana, vyapwile nameso jingulwishi.+
13 Ngwevwile lizu lyatambakanyine vaze tufumbo ngwalyo, “Enu tufumbo nyengumukenu!”
14 Keluve hikeluve apwile navihanga viwana. Chihanga chakulivanga chafwanyine nge keluve, chamuchivali chafwanyine nge mutu, chamuchitatu chafwanyine nge ndumba, kaha chamuchiwana chafwanyine nge ngonga.+
15 Vaze vakeluve vazezukilenga helu. Vakeluve kana vakiko vene vaze vaka-kuyoya* ngwamwene kukalwiji Kevale.+
16 Omu vakeluve vatambukilenga, natufumbo vakujihachi javo nawa vatambukilenga. Kahomu vazundwilenga mavava avo mangana vazezuke helu, tufumbo kavalumukilenga chipwe kufuma kujihachi javoko.+
17 Omu vemanyinenga, navaze tufumbo nawa vemanyinenga. Omu vazezukilenga helu, natufumbo nawa vazezukilenga helu mwomwo shipilitu yize yapwile muli vaze vaka-kuyoya* yapwile mutufumbo.
18 Jino upahu waYehova+ wafumine muchikolo chazuvo nakuya helu lyavaze vakeluve.+
19 Kaha ngwamwene vakeluve navazundula mavava avo nakuzezuka helu. Omu vayile, tufumbo vapwile kujihachi javo. Vakemanyine kuchikolo chazuvo yaYehova chakumututuko, kaha upahu waKalunga kaIsalele wapwile helu lyamitwe yavo.+
20 Ava vakiko vaze vaka-kuyoya* ngwamwene mwishi yalitanda lyaKalunga kaIsalele kukalwiji Kevale.+ Ngocho ngwatachikijile ngwami vapwile vakeluve.
21 Vosena vawana vapwile navihanga viwana, namavava awana, kaha mwishi yamavava avo mwapwile vyuma vimwe vyasolokele nge mavoko amutu.+
22 Vihanga vyavo vyafwanyine nge vihanga vyavaze ngwamwene kukalwiji Kevale.+ Vatambukilenga oku vanatale mumwe kaha.+
Kwinyikila Chamwishi
^ Hepe., “Ou ikiye vene uze muka-kuyoya.”
^ Hepe., “shipilitu yauze muka-kuyoya.”
^ Hepe., “Ou ikiye uze muka-kuyoya.”
