Ezekele 11:1-25
11 Jino shipilitu yanguzundwile nakungutwala kuchikolo chazuvo yaYehova chakumutamba wakumututuko.+ Kuchikolo kana ngwamweneko malunga 25, kaha hali vakiko hapwile Yazanyiya mwanaAzule, naPelachiya mwanaMbenaya, vaze vapwile vilolo javatu.+
2 Kaha Kalunga ambile kuli ami ngwenyi: “Ove mwanamutu, ava vakiko malunga vali nakujina upi nakulweza vatu vyuma vyavipi muno munganda.
3 Vali nakwamba ngwavo, ‘Luno keshi lukiko lwola lwakutunga jizuvoko numba?+ Yino nganda* yinapu ndeho,*+ kahetu tunapu nyama.’
4 “Ngocho polofweta vyuma navisoloka kuli vakiko. Ove mwanamutu,+ polofweta.”
5 Jino shipilitu yaYehova yejile hali ami,+ kaha Kalunga ambile kuli ami ngwenyi: “Amba ngwove, ‘Yehova nambe ngwenyi: “Enu vakuzuvo yaIsalele munahanjika mwakwoloka, kaha ngunatachikiza vyuma muli nakushinganyeka.*
6 Munajihi vatu vavavulu muno munganda, kaha munazalisa jijila jayo navivimbi.”’”+
7 “Ngocho Mwata Wakulitulaho Yehova nambe ngwenyi, ‘Mijimba yakufwa yize munambili munganda yosena yikiko yinapu nyama, kaha nganda yikiko yinapu ndeho.+ Oloze enu navamilovolamo.’”
8 “Mwata Wakulitulaho Yehova nambe ngwenyi, ‘Munevu woma+ poko yamukwale, oloze ami nanguneha poko yamukwale hali enu.
9 Nangumilovola munganda kana, nakumihana mumavoko avaka-mafuchi eka, nakumizangamisa.+
10 Namulindumuka kupoko yamukwale.+ Nangumizangamishila mungiza yaIsalele,+ kaha namukatachikiza ngwenu ami yami Yehova.+
11 Nganda kayeshi kupwa ndeho kuli enuko, kahenu nawa kamweshi kupwa nyama muyikikoko. Nangumizangamishila mungiza yaIsalele,
12 kaha namukatachikiza ngwenu ami yami Yehova, mwomwo munakane kukavangiza jishimbi jami nakulinga mwaya mazu ami akuyula,+ oloze munalingi mwaya mazu akuyula avaka-mafuchi vaze vanamijingilika.’”+
13 Omu ngwakumishile kupolofweta, Pelachiya mwanaMbenaya afwile, kaha ngwafukamine chameso hamavu nakuhanjika nalizu lyakukanguka ngwami: “Mama lelo, ove Mwata Wakulitulaho Yehova, naujiha vaIsalele vosena vaze vanasaleho tahi?”+
14 Jino Yehova ahanjikile cheka kuli ami ngwenyi:
15 “Ove mwanamutu, vandumbwove navaze vakuzuvo yaIsalele vosena, vaze vali nalisesa lyakulanda cheka lifuchi, vanavalweze kuli vaze vatwama muYelusalema ngwavo, ‘Sosolokenu kuli Yehova. Lifuchi linapu lyetu, vanatuhanelyo kupwa luheto lwetu.’
16 Ngocho valweze ngwove, ‘Mwata Wakulitulaho Yehova nambe ngwenyi: “Numba tuhu ngunavatwale kwakusuku kuli vaka-mafuchi eka, nakuvamwangila kumafuchi eka,+ oloze kalinwaha ngupwenga nguchihela chavo chajila kumafuchi kuze vanayi.”’+
17 “Shikaho valweze ngwove, ‘Mwata Wakulitulaho Yehova nambe ngwenyi: “Nangukamikungulula kufuma kuvatu veka naveka nakumafuchi kuze vanamimwangila, nakumihana lifuchi lyaIsalele.+
18 Namukakinduluka mulifuchi kana nakufumisamo vyuma vyaunyengwe vyosena navilinga vyavipi vyosena.+
19 Nangukamilingisa mukalinunge hamwe,*+ kaha nangukahaka nawa shipilitu yayihya muli enu.+ Nangukamifumisa muchima wakukola nge lilolwa+ nakumihana muchima wauvwovu nge nyama,*+
20 mangana mukakavangizenga jishimbi jami nakulinga mwaya mazu ami akuyula nakuwononoka. Ngocho namukapwa muvatu jami, kahami nangukapwa nguKalunga kenu.”’
21 “‘Mwata Wakulitulaho Yehova nambe ngwenyi, “Vaze navakakachila lika kuvyuma vyaunyengwe nakuvilinga vyavipi nangukavazangamisa havilinga vyavo.”’”
22 Jino vaze vakeluve vazundwile mavava avo, tufumbo nawa vapwile kujihachi javo,+ kaha upahu waKalunga kaIsalele wapwile helu lyamitwe yavo.+
23 Jino upahu waYehova+ wafumine hanganda, wakemanyine hapili kumututuko wanganda.+
24 Kaha shipilitu yanguzundwile helu muchakungumwenesa chize ngwamwene kuhichila mushipilitu yaKalunga, yangutwalile kuli vatu vaze vapwile muundungo kuKalateya. Ngocho chakumwenesa chize ngwamwene chakumine.
25 Shikaho ngwaputukile kulweza vatu vaze vapwile muundungo vyuma vyosena vize angulwekesele Yehova.
Kwinyikila Chamwishi
^ Ikiko nganda yaYelusalema yize vaYuleya vashinganyekele ngwavo navapwa vakukingiwa munganda kana.
^ Chipwe “ndeho yakanwa kakanene.”
^ Chipwe “vyuma vyeji kwizanga mujishipilitu jenu.”
^ Hepe., “Nangukamihana muchima umwe.”
^ Kulumbununa, muchima wakusaka Kalunga avatwaminyine.
