Ezekele 12:1-28
12 Yehova ahanjikile cheka kuli ami ngwenyi:
2 “Ove mwanamutu, uli nakutwama navaze vamuzuvo yavaka-kulikanga. Vali nameso, oloze kaveshi kumonako, vali namatwitwi, oloze kaveshi kwivwako+ mwomwo vanapu zuvo yavaka-kulikanga.+
3 Ove mwanamutu, longejeka viteli vyove vize nauya navyo muundungo. Kaha uyenga muundungo namusana oku vali nakukumona. Fuma kwimbo lyove uyenga muundungo kuchihela cheka oku vali nakukumona, pamo naveuluka numba tuhu vanapu zuvo yavaka-kulikanga.
4 Namusana ulovole viteli vyove vize nauya navyo muundungo oku vali nakukumona, kaha nachingoloshi uyenga ngana mwamutu uze vali nakutwala muundungo oku vali nakukumona.+
5 “Tota wina hambango ulowelemo viteli vyove oku vali nakukumona.+
6 Haka viteli vyove hachifwiji nakuvilovola mumilima oku vali nakukumona. Fwika kumeso ove mangana uhone kumona hamavu, mwomwo ngunakulingisa kupwa uchinjikizo kuzuvo yaIsalele.”+
7 Ngocho ngwalingile nge muze vangulwezele. Namusana ngwalowele viteli vyami kwijiva nge nguli nakuya muundungo, kaha nachingoloshi ngwatotele wina hambango nalivoko lyami. Omu kwelavile ngwalowele viteli vyami nakuvimbata hachifwiji oku vali nakungumona.
8 Yehova ahanjikile cheka kuli ami nachimene ngwenyi:
9 “Ove mwanamutu, vaze vakuzuvo yaIsalele vakulikanga kavakuhulishileko ngwavo, ‘Vyuma muka uli nakulinga’ nyi?
10 Valweze ngwove, ‘Mwata Wakulitulaho Yehova nambe ngwenyi: “Ou mujimbu unapu wamwata+ wamuYelusalema navaze vakuzuvo yaIsalele vosena vali munganda kana.”’
11 “Valweze ngwove, ove unapu uchinjikizo.+ Navakavalinga nganomu unalingi ove. Navakaya muundungo, navakavatwala muufunge.+
12 Mwata uze ali muli vakiko mwakambata viteli hachifwiji chenyi nakulovoka mumilima. Mwakatota wina hambango nakulowelamo viteli vyenyi.+ Kaha mwakafwika kumeso enyi mangana akahone kumona hamavu.
13 Nangukamutela lyoji lyami, kaha mwakafwamo.+ Nangukamutwala kuMbavilone kulifuchi lyavaKalateya, oloze keshi kukalimonako. Kaha mwakafwila vene kuze.+
14 Vosena vaze ali navo, vaka-kumukafwa, namaswalale jenyi nangukavamwangila kumitamba yosena,+ kaha nangukasolomona poko yamukwale nakuvahangasana.+
15 Navakatachikiza ngwavo ami yami Yehova omu nangukavamwangila kuli vaka-mafuchi eka, nakuvasanjila kumafuchi eka.
16 Oloze nangukayovola vamwe kupoko yamukwale, nakuzala yakalombolombo, nakumusongo wachihita mangana vakambulule vilinga vyavo vyaunyengwe vyosena kuli vaka-mafuchi eka kuze navakaya. Kaha navakatachikiza ngwavo ami yami Yehova.”
17 Yehova ahanjikile cheka kuli ami ngwenyi:
18 “Ove mwanamutu, lyako kulya chove nakulichikimina, nakunwa meya ove nawoma nakulizakamina.+
19 Lweza vatu vamulifuchi ngwove, ‘Mwata Wakulitulaho Yehova nahanjika vyavaze vatwama muYelusalema, mulifuchi lyaIsalele ngwenyi: “Navakalya kulya chavo nakulizakamina, nakunwa meya avo nachiwomawoma, mwomwo lifuchi lyavo nalikasala ngundu+ haulyanyi wavaze vali nakutwamamo.+
20 Jinganda vatwamamo navakajinongesa, lifuchi nalikasala ngundu,+ kaha namukatachikiza ngwenu ami yami Yehova.”’”+
21 Yehova ahanjikile cheka kuli ami ngwenyi:
22 “Ove mwanamutu, uno aka kashimutwiji kenu kamuIsalele kakwamba ngwavo, ‘Makumbi ali nakuhita, oloze vyakumwenesa kavyeshi nakutesamoko’ kalumbunukila mulihi?+
23 Ngocho hanjika kuli vakiko ngwove, ‘Mwata Wakulitulaho Yehova nambe ngwenyi: “Nangulingisa aka kashimutwiji kakume, kaha kaveshi kukakahanjika cheka muIsaleleko.”’ Valweze ngwove, ‘Makumbi anapandama hakamwihi,+ kaha vyakumwenesa navitesamo.’
24 Kakweshi kukapwa cheka vyakumwenesa vyamakuliko, chipwe kutaha chakwonga* muzuvo yaIsaleleko.+
25 ‘Mwata Wakulitulaho Yehova nambe ngwenyi: “Ami Yehova nanguhanjika. Vyeshovyo nanguhanjika navikatesamo chakuzeneka kulangisa.+ Enu vakuzuvo yakulikanga, nanguhanjika vyuma hamakumbi enu+ nakuvilinga.”’”
26 Yehova ahanjikile cheka kuli ami ngwenyi:
27 “Ove mwanamutu, vaze vakuzuvo yaIsalele vali nakwamba ngwavo, ‘Chakumwenesa ali nakumona nachikatesamo kumakumbi akulutwe chikuma, kaha nawa vyuma ali nakupolofweta navikasoloka kumakumbi akulutwe chikuma.’+
28 Shikaho valweze ngwove, ‘Mwata Wakulitulaho Yehova nambe ngwenyi: “‘Kangweshi kulangisa kutesamo vyuma vyosena ngunahanjikako. Vyeshovyo ngunahanjika navitesamo.’ Omu mukiko mwanambe Mwata Wakulitulaho Yehova.”’”
Kwinyikila Chamwishi
^ Chipwe “chakutangisa.”
