Ezekele 13:1-23
13 Yehova ahanjikile cheka kuli ami ngwenyi:
2 “Ove mwanamutu, polofweta vyuma navisolokela vapolofweto javaIsalele,+ nakuhanjika kuli vaze veji kupolofwetanga vyamumichima yavo+ ngwove, ‘Ivwenu vyuma nahanjika Yehova.
3 Mwata Wakulitulaho Yehova nambe ngwenyi: “Lamba kuli vapolofweto vavileya, vaze veji kulinganga mwaya michima yavo okunyi navimwe vanamono vyauchi.+
4 Ove Isalele, vapolofweto jove vanapu nge vamyumbwe mungundu.
5 Kamweshi kukaya nakutungulula haze hanapuzuka kukembwe yamalolwa yazuvo yaIsalele+ mangana Isalele akemane kujita halikumbi lyaYehovako.”+
6 “Vaze vali nakwamba ngwavo, ‘Yehova nambe ngwenyi,’ okunyi ami Yehova kangwavatumineko, vanamono vyakumwenesa vyamakuli nakupolofweta vyuma vyakwonga, kaha vali nakutalilila ngwavo vyuma vanahanjika navitesamo.+
7 Munamono chakumwenesa chamakuli, kaha nawa munapolofweta vyuma vyakwonga hakwamba ngwenu, ‘Yehova nambe ngwenyi,’ okunyi ami kangwahanjikile navimweko.”’
8 “‘Ngocho Mwata Wakulitulaho Yehova nambe ngwenyi: “‘Nangumifumbukila mwomwo munahanjika vyuma vyamakuli, nakumona nawa vyakumwenesa vyakwonga.’ Omu mukiko mwanambe Mwata Wakulitulaho Yehova.”+
9 Nangwolola livoko lyami nakuzangamisa vapolofweto vaze vali nakumona vyakumwenesa vyamakuli nakupolofweta vyuma vyakwonga.+ Kaveshi kukapwa havatu jami ngwafwelelako, chipwe kukavasoneka mumukanda wamajina avaze vakuzuvo yaIsaleleko, chipwe kukakinduluka kulifuchi lyaIsaleleko. Kaha namukatachikiza ngwenu ami yami Mwata Wakulitulaho Yehova.+
10 Nangukalinga vyuma kana mwomwo vanahungumwisa vatu jami hakwamba ngwavo, “Kuli kuunda!” okunyi kuunda chauchiko.+ Omu navatunga mbango yakuhona kukola, vakiko hinavayikwita pemba.’*+
11 “Lweza vaze vali nakukwita pemba hambango ngwove nayipuzuka. Nakunoka vula yamishilinjinji, navula yamalolwa, kaha navayipuzula kupeho yanyamanganda.+
12 Omu mbango kana nayipuzuka, navakamihulisa ngwavo, ‘Yize pemba mwakwichileho yili kulihi?’+
13 “Shikaho Mwata Wakulitulaho Yehova nambe ngwenyi: ‘Nanguhuhwisa peho yanyamanganda mwomwo yautenu wami, nakunokesa vula yamishilinjinji mwomwo yamatoto ami, nakunokesa nawa vula yamalolwa mwomwo yakulundundu yami.
14 Nangupuzula mbango yize munakwichi pemba, nakuyishiwila hamavu, kaha chihela chayo nachikekumuka. Namufwila munganda omu nayishiuka, kaha namukatachikiza ngwenu ami yami Yehova.’
15 “‘Omu nangukakumisa kusolwela yize mbango utenu wami navatu vaze vayikwichile pemba, nangukahanjika kuli enu ngwami: “Mbango yinapuzuka, kaha vaze vayikwitanga pemba vananongo.+
16 Vapolofweto javaIsalele vaze veji kupolofwetanga muYelusalema nakumona vyakumwenesa vyakuunda chamunganda kana okunyi kuunda chauchimo vananongo.”’+ Omu mukiko mwanambe Mwata Wakulitulaho Yehova.
17 “Ove mwanamutu, jika meso ove hali vana vamapwevo vavatu jove vaze vali nakupolofweta vyamumichima yavo, kaha polofweta vyuma navisoloka kuli vakiko.
18 Valweze ngwove, ‘Mwata Wakulitulaho Yehova nambe ngwenyi: “Lamba kuli mapwevo vaze veji kutonganga vikapa vyakuvwala hamavoko,* nakutunga nawa viwuva vyakumitwe yavatu vavivuvu vyakulisezaseza, mangana vazombe vatu! Uno muli nakuzomba vatu jami, nakusaka kulama myono yenu nyi?
19 Muli nakungusaula muli vatu jami mwomwo yamikamo yambale navihanda vyambolo.+ Muli nakujiha vatu jami vaze kavatela kufwako nakuseza vaze vatela kufwa hakwonga vatu jami vaze vali nakwivwilila kumakuli enu.”’+
20 “Shikaho Mwata Wakulitulaho Yehova nambe ngwenyi: ‘Enu mapwevo, nangwimanyina nakole vikapa vyenu vize mweji kuzombesanga vatu* kwijiva nge tujila, kaha nangukavipula kumavoko enu nakusuula vaze muli nakuzomba kwijiva nge tujila.
21 Nangukapula viwuva vyenu nakupululula vatu jami mumavoko enu, kaha kamweshi kukavazomba chekako. Ngocho namukatachikiza ngwenu ami yami Yehova.+
22 Munahombesa muka-kwoloka namakuli enu+ okunyi ami kangwamwivwishile chinyengoko,* kaha nawa munajikijisa muka-kuhuka+ azeneke kuseza vilinga vyenyi vyavipi mangana ayoye.+
23 Ngocho enu mapwevo kamweshi kukamona cheka vyakumwenesa vyamakuli chipwe kutahako.+ Nangupululula vatu jami mumavoko enu, kaha namukatachikiza ngwenu ami yami Yehova.’”
Kwinyikila Chamwishi
^ Kulumbununa, kutunga mbango yamukachi yakuhona kukola nakuyikwita pemba yisoloke nge yakukola.
^ Kulumbununa, vikapa vyavisava vavwalilenga mujikonekelo jamavoko.
^ Chipwe “myono.”
^ Chipwe “kukolako.”
