Ezekele 14:1-23
14 Jino vakulwane javaIsalele vamwe vejile nakutwama kumeso ami.+
2 Kaha Yehova ahanjikile kuli ami ngwenyi:
3 “Ove mwanamutu, ava malunga vanajiki michima yavo kukulemesa makombelo avo aunyengwe,* kaha vanahake chimbunji chakuhukanyisa vatu valinge shili. Kutala ngwatela kuvetavisa vangwihule numba?+
4 Ngocho valweze ngwove, ‘Mwata Wakulitulaho Yehova nambe ngwenyi: “Kachi nge kaIsalele najiki muchima wenyi kukulemesa makombelo enyi aunyengwe, nakuhaka chimbunji chakuhukanyisa vatu valinge shili, kaha himweza nakwihula kuli kapolofweto, ami Yehova nangumukumbulula kweseka nakuvula chamakombelo enyi aunyengwe.
5 Nanguzuzwisa michima yavaze vakuzuvo yaIsalele nawoma* mwomwo vosena vanahanduka kuli ami nakulemesa makombelo avo aunyengwe.”’+
6 “Shikaho lweza vaze vakuzuvo yaIsalele ngwove, ‘Mwata Wakulitulaho Yehova nambe ngwenyi: “Kindulukenu, sezenu makombelo enu aunyengwe nakumbila vilinga vyenu vyavipi vyosena.+
7 Mwomwo kachi nge kaIsalele chipwe mwiza uze ali nakutwama muIsalele mwahanduka kuli ami nakujika muchima wenyi kukulemesa makombelo enyi aunyengwe, nakuhaka chimbunji chakuhukanyisa vatu valinge shili, kaha himweza nakwihula kuli kapolofweto kami,+ ami Yehova nangumukumbulula.
8 Mutu kana nangumutala nautenu nakumulingisa kupwa chakutalilaho nakashimutwiji, kaha nangumujiha afume muli vatu jami.+ Ngocho namukatachikiza ngwenu ami yami Yehova.”’
9 “‘Kachi nge kapolofweto vanamwongo nakuhanjika vyuma vimwe, ami Yehova yami ngunongo kapolofweto kana.+ Ngocho nangwolola livoko lyami nakumujiha afume muli vatu jami vaIsalele.
10 Navavazangamisa hamilonga yavo. Mulonga wayauze ehulanga naupwa woumwe namulonga wakapolofweto,
11 mangana vaze vakuzuvo yaIsalele vazeneke kuhanduka cheka kuli ami, nakuzeneka kulipihisa cheka hakuzombwojoka chavo jishimbi. Kaha navapwa vatu jami, ami nawa nangupwa nguKalunga kavo.’+ Omu mukiko mwanambe Mwata Wakulitulaho Yehova.”
12 Yehova ahanjikile cheka kuli ami ngwenyi:
13 “Ove mwanamutu, kachi nge lifuchi nalilinga shili kuli ami hakuhona kushishika, nangukolola livoko lyami nakuzangamisa lifuchi kana, kaha nangukakehesa vyakulya* vyamuze mulifuchi.+ Nangukatuma zala yakalombolombo mulifuchi kana+ nakunongesa vatu natunyama.”+
14 “Mwata Wakulitulaho Yehova nambe ngwenyi, ‘Numba nge ava malunga vatatu, Nowa,+ naNdanyele,+ naYopa,+ vapwanga mulifuchi kana, kachi vanayovola myono yavo kaha, mwomwo yakwoloka chavo.’”+
15 “‘Mokomoko kachi nge nangutuma tunyama vamuchipapa vahite mulifuchi kana nakujiha vatu,* nakulilingisa kupwa ngundu, ngocho vatu hinavahona kuhitamo mwomwo yatunyama kana,+
16 omu ngwayoya tu, numba nge ava malunga vatatu vapwangamo, kachi kaveshi kuyovola vana vavo vamalunga chipwe vamapwevoko. Kachi vanayovola myono yavo kaha, oloze lifuchi kana kachi nalipwa ngundu.’ Omu mukiko mwanambe Mwata Wakulitulaho Yehova.”
17 “‘Mokomoko kachi nge nanguneha poko yamukwale mulifuchi kana+ nakwamba ngwami: “Mulifuchi muhite poko yamukwale” mangana yijihe vatu natunyama,+
18 omu ngwayoya tu, numba nge ava malunga vatatu vapwangamo, kachi kaveshi kuyovola vana vavo vamalunga chipwe vamapwevoko. Oloze kachi vanayovola myono yavo kaha.’ Omu mukiko mwanambe Mwata Wakulitulaho Yehova.”
19 “‘Mokomoko kachi nge nanguneha musongo wachihita mulifuchi kana,+ nakusolola kulundundu yami hakujihamo vatu natunyama nakumwanga manyinga,
20 omu ngwayoya tu, numba nge Nowa,+ naNdanyele,+ naYopa+ vapwangamo, kachi kaveshi kuyovola vana vavo vamalunga chipwe vamapwevoko. Oloze kachi vanayovola myono yavo kaha, mwomwo yakwoloka chavo.’+ Omu mukiko mwanambe Mwata Wakulitulaho Yehova.”
21 “Ngocho Mwata Wakulitulaho Yehova nambe ngwenyi, ‘Omu mukiko nachikapwa omu nangukatuma vyuma vyakumizangamisa viwana+ muYelusalema. Nangukatuma poko yamukwale, nazala yakalombolombo, natunyama vavapi vamuchipapa, namusongo wachihita+ mangana vikajihe vatu natunyama.+
22 Oloze vana vamalunga navava vamapwevo vaze navakasalamo navakayovoka nakulovokamo.+ Navakeza kuli enu, kahomu namukamona jijila javo navilinga vyavo, namukalivendejeka halupi nahavyuma vyosena ngunanehe haYelusalema.’”
23 “Mwata Wakulitulaho Yehova nambe ngwenyi, ‘Navakamivendejeka omu namukamona jijila javo navilinga vyavo, kaha namukatachikiza ngwenu kangwazangamishile Yelusalema chakuzeneka mulongako.’”+
Kwinyikila Chamwishi
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Hepe., “Vaze vakuzuvo yaIsalele nanguvakwata mumichima yavo.”
^ Hepe., “nangukahokola jimbwechi jambolo yavo.” Pamo kutalisa kujimbwechi vatulikililenga mbolo.
^ Chipwe “vana.”
