Ezekele 16:1-63
16 Yehova ahanjikile cheka kuli ami ngwenyi:
2 “Ove mwanamutu, lweza Yelusalema vilinga vyaunyengwe ali nakulinga.+
3 Hanjika ngwove, ‘Mwata Wakulitulaho Yehova nambe kuli Yelusalema ngwenyi: “Mulifuchi lyaKanane mukiko wafumine nakusemukila. Iso apwile kaAmole,+ kaha noko apwile kaHete.+
4 Halikumbi wasemukile kavakutetele mulumbu woveko, chipwe kukusanyisa meya mangana utomeko. Kavakukwichile mungwa chipwe kukuvungila halihinako.
5 Naumwe wauchi akwivwililile keke mangana akulingile vyuma kaneviko. Naumwe wauchi akuteteleleko. Oloze vakumbilile muchipapa mwomwo vakuhungile halikumbi wasemukile.
6 “‘“Omu ngwapwile nakuhita, ngwakumwene uli nakulipochinga mumanyinga ove muze wasavalile, kaha ngwambile kuli ove ngwami: ‘Yoyanga lika!’ Ngwambile kuli ove omu wasavalile mumanyinga ove ngwami: ‘Yoyanga lika!’
7 Ngwakuvulishile chikuma kwijiva nge mitondo yili nakusoka muchipapa, kaha wakolele nakupwa ushinalyapwevo nakuvwala vimbilingwa vyamwaza chikuma. Mavele ove emanyine chicha, kaha jikambu jove jasuhwile, oloze wapwile lika uselesele.”’
8 “Mwata Wakulitulaho Yehova nambe ngwenyi, ‘Omu ngwapwile nakuhita, ngwakumwene unakolo nakutamo kukuzanga. Ngocho ngwatanduwile uvwalo wami* nakufwika usonyi wove.+ Ngwalishingile lushingo nakulikasa nove chivwasano, kaha wapwile uwami.
9 Ngwakusanyishile nawa meya nakukukosongola manyinga ove, nakukuwavisa maji.+
10 Ngwakuvwikile uvwalo wakutonga kanawa, nakukuvwika nawa mendelo alilambu.* Kaha ngwakujingilikile lihina lyamwaza nakukuvwika uvwalo wandando yayinene.
11 Ngwakuwahishile navimbilingwa hakukuvwika maseka kumavoko ove, nausanga mushingo yove.
12 Ngwakuvwikile nawa kazeya hamuzulu wove, natupata kumatwitwi ove, namuchama wamwaza kumutwe wove.
13 Waliwahishilenga lika naulu napalata, kaha wavwalilenga mahina amwaza, namahina andando yayinene, nauvwalo wakutonga kanawa. Walilenga unga wamwaza, nauchi, namaji, kaha wapwile uwamwaza chikuma.+ Ngocho watelemo kupwa umwangana.’”*
14 “Mwata Wakulitulaho Yehova nambe ngwenyi, ‘Wafumakanyine lika* kumafuchi eka+ mwomwo yakuwaha chove. Kuwaha chove chapwile chakukupuka mwomwo ngwahakile upahu wami hali ove.’”+
15 “‘Oloze waputukile kulitukwojola hakuwaha chove,+ kaha wapwile umuka-ujila mwomwo yalufuma lwove.+ Wavulishile vilinga vyove vyaujila hakulisavala naweshowo ahichilenga mujila,+ kaha kuwaha chove wachihanyine kuli vakiko.
16 Wambachile mahina ove nakuwatungisa vihela vyakulunduka vyamwaza kuze wapwile nakulingila ujila.+ Vyuma kana kavyatela kusolokako, kaha kanda navikasoloka chekako.
17 Wambachile nawa vimbilingwa vyamwaza vyaulu napalata vize ngwakuhanyine, wavitungile makombelo amalunga nakulinga nawo ujila.+
18 Kaha wambachile uvwalo wove wakutonga kanawa nakuuvwika makombelo kana. Wawahanyine maji ami navyuma vyami vyalivumba lyamwaza.+
19 Mbolo yaunga wamwaza yakuhaka maji nauchi, yize ngwakuhanyine ulyenga, wayihanyine kupwa wana walivumba lyalupengopengo* kumakombelo kana.+ Omu mukiko walingile.’ Omu mukiko mwanambe Mwata Wakulitulaho Yehova.”
20 “‘Wambachile nawa vana vamalunga navava vamapwevo vaze wasemene nayami+ nakuvahana kupwa wana wakuvatwila kumakombelo.+ Vilinga vyove vyaujila vinasweze.
21 Wajihile vana vami nakuvahana kupwa mawana hakuvalumba mukakahya.+
22 Omu walingilenga vilinga vyove vyaunyengwe naujila wove, kawanukile makumbi aze wapwile ushinalyapwevoko, omu wapwile uselesele nakulipochinga mumanyinga ove.
23 Lamba, lamba kuli ove havyuma vyosenevi vyavipi unalingi.’+ Omu mukiko mwanambe Mwata Wakulitulaho Yehova.
24 Walitungilile milundu navihela vyakulunduka mumeluka osena.
25 Watungilile vihela vyove vyakulunduka kuvihela vyasanga mujijila josena. Kuwaha chove wachilingishile kupwa chaunyengwe hakuhana mujimba wove* kuli weshowo mwahita mujila,+ kaha wavulishile vilinga vyove vyaujila.+
26 Walingile ujila navana vaEjipitu+ walihata navo vaze vakwechi peha yayipi,* kaha wangwivwishile kupihya navilinga vyove vyaujila vyavivulu.
27 Ngocho nangukuzangamisa, nakukehesa chazano chavyakulya vyove,+ kaha nangukuhana kuvana vamapwevo vavaFwilishite vaze vakuhunga+ vaze valikomokelele havilinga vyove vyaunyengwe mangana vakulinge mweshomwo vanasake.+
28 “‘Hakuwana nge kavakusuulwishileko, ngocho walingile nawa ujila navana vaAsulya.+ Oloze kawasuulukile chekako omu wakumishile kulinga navo ujila.
29 Kaha walingile nawa ujila nalifuchi lyavaka-kusekasana* navaKalateya,+ oloze chochimwe kawasuulukileko.’
30 Mwata Wakulitulaho Yehova nambe ngwenyi, ‘Muchima wove wambumbwile* chikupu* omu walingilenga vyuma vyosenevi nge muka-ujila wakuzunguma.+
31 Oloze omu watungile milundu yove kuvihela vyasanga mujijila josena, nakutunga nawa vihela vyakulunduka mumeluka osena, kawapwile nge umuka-ujilako mwomwo wakanyinenga kukwonda.
32 Ove unapu upwevo muka-ukoji uze eji kulisavalanga namalunga veka mukutela kulisavala nalunga lyenyi.+
33 Vatu veji kwondanga mapwevo vaka-ujila,+ oloze ove yove uli nakwonda vaze vali nakukwivwila peha.+ Kaha weji kuvongejekanga vezenga kuli ove kufuma kuvihela vyosena mangana valinge nove ujila.+
34 Ove walihandununa navakwenu mapwevo vaka-ujila. Naumwe wauchi eji kulinganga ujila ngana mwayoveko. Weji kwondanga malunga, oloze vakiko kaveshi kukwondako. Ove weji kulinganga mwauka wove.’
35 “Ngocho ove muka-ujila,+ ivwa vyuma nahanjika Yehova.
36 Mwata Wakulitulaho Yehova nambe ngwenyi: ‘Hakuwana nge unasolola peha yove hatoma, kaha nawa usonyi wove vanaumono omu unalinginga ujila natujila twove, namakombelo ove aunyengwe*+ osena aze walumbililenga manyinga avana vove,+
37 shikaho nangukungulula tujila twove vosena vaze unalisavalanga navo, vaze wazangile navaze kawazangileko. Nangukukungulwilavo kufuma kuvihela vyosena, kaha nangukuzula nakukuseza uselesele, ngocho navamona usonyi wove.+
38 “‘Nangukuzangamisa nganomu veji kuzangamisanga mapwevo vaka-ujila+ navaze vaka-kumwanga manyinga,+ kaha nangumwanga manyinga ove mwomwo yakulundundu nalisungu lyami.+
39 Nangukuhana mumavoko avo, kaha navapuzula milundu yove, nakushiula vihela vyove vyakulunduka.+ Navakuzula uvwalo wove+ nakumbata vimbilingwa vyove vyamwaza,+ kaha navakuseza uselesele.
40 Navakukungulwila lizavu,+ kaha navakwasa malolwa,+ nakukujiha najipoko javo jamikwale.+
41 Navocha jizuvo jove,+ nakukuzangamishila hameso amapwevo vavavulu. Ngocho nangukumisa ujila wove,+ kaha kaweshi kukonda cheka tujila twoveko.
42 Kulundundu yami nayikakuma,+ kaha nangukapeula utenu wami hali ove.+ Nangukaunda, kangweshi kukevwa cheka kupihyako.’
43 “Mwata Wakulitulaho Yehova nambe ngwenyi, ‘Hakuwana nge kawanukile makumbi aze wapwile ushinalyapwevoko,+ kaha nawa unangulingisa ngupihilile havyuma vyosenevi unalingi, ngocho nangukuzangamisa havilinga vyove. Kaweshi kukalinga cheka vilinga vyove vyaunyengwe vyosenako.
44 “‘Tala! Weshowo eji kuhanjikanga tushimutwiji mwakahanjika kashimutwiji kano kupandama kuli ove ngwenyi: “Mwapwa naye namwanenyi!”+
45 Ove walifwana nanoko uze ahunga lunga lyenyi navana venyi. Walifwana nawa navandumbwove vamapwevo vaze vahunga malunga javo navana vavo. Nenu apwile kaHete, kaha senu apwile kaAmole.’”+
46 “‘Yayove wapwevo ikiye Samaliya+ uze ali nakutwama kunote* navana venyi.*+ Kaha songo yove wapwevo ikiye Sotome+ uze ali nakutwama kusulo* navana venyi.+
47 Kawakavangijile jijila javo nakulinga nawa vilinga vyavo vyaunyengwe kahako, oloze mulwola lwalundende kaha vilinga vyove vyakuhuka vyavulile chikuma kuvahambakana.’+
48 Mwata Wakulitulaho Yehova nambe ngwenyi, ‘Omu ngwayoya tu, ndumbwove Sotome navana venyi kavalingile vyuma vipwaha unalingi ove navana voveko.
49 Tala! Echi chikiko kuhenga chandumbwove Sotome: Ikiye navana venyi+ vapwile vakulivwimba,+ vapwile navyakulya vyavivulu,+ kaha nawa vatwaminenga mukuunda,+ oloze kavakafwilenga vaka-kuyanda navaka-kuhutwako.+
50 Vapwilenga vakulivwimba+ nakulinga lika vilinga vyaunyengwe kumeso ami,+ shikaho ngwavanongesele.+
51 “‘Kaha nawa shili nalingi Samaliya+ kayahetele namuchimbwa chashili yoveko. Vilinga vyove vyaunyengwe vinavulu chikuma kuhambakana vilinga vyavo, kaha vakiko vanasoloka jino kupwa vaka-kwoloka mwomwo yavilinga vyove vyaunyengwe vyosena.+
52 Ngocho navakwinyisa mwomwo unahakwila vandumbwove havilinga vyavo. Hakuwana nge vilinga vyove vyaunyengwe vinahambakana vilinga vyavo, ngocho vanapu vaka-kwoloka kukuhambakana ove. Shikaho ivwa sonyi, pwako uwakwinyisa mwomwo unalingisa vandumbwove vasoloke kupwa vaka-kwoloka.’
53 “‘Jino nangukakungulula vatu jaSotome navatu javana venyi vaze vali muufunge, navatu jaSamaliya navatu javana venyi vaze vali muufunge, kaha nangukavakungulwila hamwe navatu jove vaze vali muufunge,+
54 mangana ukapwe uwakwinyisa. Naukapwa uwakwinyisa mwomwo yavyuma unalingi hakuvavendejeka.
55 Ndumbwove Sotome navana venyi navakapwa ngana muze vapwile hakavanga, kaha ndumbwove Samaliya navana venyi navakiko navakapwa ngana muze vapwile hakavanga. Ove nawa navana vove namukapwa ngana muze mwapwile hakavanga.+
56 Ndumbwove Sotome kawamuvulukilenga numba hahandendeko hamakumbi walivwimbilenga,
57 shimbu kanda vilinga vyove vyakuhuka visoloke hatoma.+ Oholyapwa jino vana vaSulya navaze alihata navo vali nakukuhenda, kaha vana vavaFwilishite+ vaze vanakujingilika vali nakukusaula.
58 Navakuzangamisa havilinga vyove vyaunyengwe.’ Omu mukiko mwanambe Yehova.”
59 “Mwata Wakulitulaho Yehova nambe ngwenyi: ‘Nangukulinga kweseka navilinga vyove,+ mwomwo unalumbilisa lushingo hakuhokola chivwasano chami.+
60 Oloze nangukanuka chivwasano ngwalikashile nayove omu wapwile ushinalyapwevo, kaha nangukachizamisa cheka nayove kupwa chivwasano chahaya myaka yosena.+
61 Naukanuka vilinga vyove, nakwivwa sonyi+ omu naukatambula vayayove navasongo jove. Nangukakuhanavo vakapwe vana vove, keshi nge mwomwo yachivwasano choveko.’
62 “‘Kaha nangukazamisa chivwasano chami nayove, ngocho naukatachikiza ngwove ami yami Yehova.
63 Jino ove naukanuka vyuma unalingi, kaha naukevwa sonyi chikuma+ nakuhona kumbakula kukanwa kove omu nangukakulingila chakufwika hashili chamokomoko navyuma unalingi.’+ Omu mukiko mwanambe Mwata Wakulitulaho Yehova.”
Kwinyikila Chamwishi
^ Chipwe “chifunga chami.”
^ Chipwe “alilambu lyambau.”
^ Chipwe “watelemo kupwa hachihela chawangana.”
^ Hepe., “Lijina lyove lyatanjile.”
^ Chipwe “lyakusuulwisa; lyakwivwisa kuwaha.”
^ Hepe., “hakwazununa mahinji ove.”
^ Hepe., “vaze vakwechi mijimba yayinene.”
^ Hepe., “lyavaKanane.”
^ Chipwe “wazeyele.”
^ Chipwe pamo, “Ngwakukwachilile matoto amanene.”
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Hepe., “kulivoko lyove lyachilyo.”
^ Pamo kutalisa kujimbongi jize jajingilikile Samaliya.
^ Hepe., “kulivoko lyove lyachimoswe.”
