Ezekele 17:1-24
17 Yehova ahanjikile cheka kuli ami ngwenyi:
2 “Ove mwanamutu, hanjika kashimutwiji nakutela chishimo zuvo yaIsalele.+
3 Valweze ngwove, ‘Mwata Wakulitulaho Yehova nambe ngwenyi: “Kwapwile ngonga+ wamunene ukwechi mavava amanene, namangona amasuku amavulu aulombo wakulisezaseza uze ejile kuLevanone.+ Ambachile muketengo wahelu wamushitale.+
4 Avatwile muketengo kana nakuya nawo kulifuchi lyavaka-kusekasana,* kaha akauhakile munganda yavaka-kusekasana.+
5 Jino ambachile mbuto yimwe yamulifuchi kana+ nakuyitumba hamavu awilo. Ayitumbile kumeya amavulu mangana yisoke nakukola nge musombo.
6 Ngocho yakolele nakupwa muvinyo wawihi waunene.+ Mitango yawo yatalishile mukachi, miji yawo nawa yatanjilile kaha mwishi yawo. Muvinyo kana wasokele miketengo nakupwa namitango.+
7 “‘“Kwapwile nawa ngonga+ mukwavo wamunene uze apwile namavava amanene, namangona amasuku.+ Jino muvinyo uze wapwile hamuhanga watanjilile miji yawo kuli uze ngonga. Watalishile nawa mitango yawo kuli ikiye mangana autukumwinenga.+
8 Vautumbile hamavu amwaza, kwakamwihi nameya amavulu mangana usoke mitango, nakwima mihako, nakupwa muvinyo waunene.”’+
9 “Valweze ngwove, ‘Mwata Wakulitulaho Yehova nambe ngwenyi: “Kutala muvinyo kana naufukila nyi? Kutala kaveshi kuteta miji yawo+ nakulingisa mihako yawo yipole, namiketengo nawa yizuze?+ Nauma chau, ngocho kaweshi kusakiwa mutu wangolo chipwe vatu vavavulu kuutukulako.
10 Numba nge navautumbulula, kutala naufukila nyi? Kutala kaweshi kuma chau omu peho yakumututuko nayihuhwilaho nyi? Naumina haze hamuhanga vanautumbu.”’”
11 Yehova ahanjikile cheka kuli ami ngwenyi:
12 “Lweza vaze vakuzuvo yakulikanga ngwove, ‘Uno kamwamwene mwalumbunukila vyuma kaneviko tahi?’ Valweze ngwove, ‘Talenu! Mwangana waMbavilone ayile kuYelusalema, akambachile mwangana wayo navamyata jayo nakwiza navo kuMbavilone.+
13 Kaha ambachile mwana* umwe wakuwangana,+ alikashile nenyi chivwasano nakumushingisa lushingo.+ Ambachile nawa malunga vavalemu vamulifuchi nakuya navo,+
14 mangana wangana vawinyise, uzeneke kukwata ngolo, oloze nawa upwengako lika hakulama chivwasano chenyi.+
15 Oloze mwangana waYelusalema alikangile kuli mwangana waMbavilone+ hakutuma valuwa kuEjipitu vakatambule tuvalu+ nalizavu lyamaswalale.+ Kutala mwafukila numba? Uno mutu mwalinga vyuma kana navazeneka kumuzangamisa nyi? Kutala nahase kuhokola chivwasano nakuyovoka numba?’+
16 “‘Mwata Wakulitulaho Yehova nambe ngwenyi: “Omu ngwayoya tu, mwakafwila muMbavilone, muze atwama mwangana* uze amuswanyishile* hawangana, uze akwechi lushingo luze nalumbilisa, nachivwasano chize nahokola.+
17 Lizavu lyamaswalale vangolo navaka-jita vavavulu vaFwalo kaveshi kukamukafwa mujitako+ omu navakamulundwila mulundu nakumutungila kembwe mangana vakajihe vatu* vavavulu.
18 Nalumbilisa lushingo nakuhokola chivwasano. Hakuwana nge nalingi vyuma vyosenevi, keshi kuyovokako numba tuhu alishikile lushiko.”’*
19 “‘Shikaho Mwata Wakulitulaho Yehova nambe ngwenyi: “Omu ngwayoya tu, nangumuzangamisa hakulumbilisa lushingo lwami+ nakuhokola chivwasano chami.
20 Nangumutela lyoji lyami, kaha mwafwamo.+ Nangumutwala kuMbavilone nakumusopesela kuze mwomwo nahono kushishika kuli ami.+
21 Vaka-kuchinwojoka vahalizavu lyamaswalale jenyi vosena navakalindwomwoka kupoko yamukwale, kaha vaze navakasalaho navakavamwangila kumitamba yosena.*+ Ngocho namukatachikiza ngwenu ami Yehova yami ngunahanjika.”’+
22 “‘Mwata Wakulitulaho Yehova nambe ngwenyi: “Nangukavatula muketengo wahelu wamushitale+ nakuutumba. Kaha kumitango yawo nangukavatulako nawa muketengo+ nakuutumba hapili yayisuku.+
23 Nangukautumba hapili yaIsalele yayisuku. Mitango yawo nayikakola, kaha naukema mihako nakupwa mushitale waunene. Tujila vamiyachi yosena navakatwama mwishi yawo, mumuvule wamitango yawo.
24 Mitondo yamuchipapa yosena nayikatachikiza ngwayo ami Yehova yami ngunenyisa mutondo wausuku nakuzezula mutondo wawihi.+ Yami ngunomisa mutondo wautute nakulingisa mutondo wakuma usokolokele.+ Ami Yehova yami ngunahanjika nakulingamo.”’”
Kwinyikila Chamwishi
^ Hepe., “lyavaKanane.”
^ Hepe., “mbuto.”
^ Kulumbununa, Nevukataneza.
^ Ou vaswanyishile ikiye Zetekiya.
^ Chipwe “myono.”
^ Hepe., “numba tuhu ahanyine livoko lyenyi.”
^ Hepe., “kujipeho josena.”
