Ezekele 2:1-10
2 Ambile kuli ami ngwenyi: “Ove mwanamutu,* imana mangana nguhanjike nayove.”+
2 Omu ahanjikile kuli ami, shipilitu yengilile muli ami, kaha yangulingishile ngwimane+ mangana ngwivwenga Ou apwile nakuhanjika kuli ami.
3 Ambile lika kuli ami ngwenyi: “Ove mwanamutu, nangukutuma kuli vaIsalele,+ kumiyachi yavaka-kulikanga vaze vanalikange kuli ami.+ Vakiko navakakuluka javo vanazombwojokanga jishimbi jami palanga nakulikumbi lyalelo.+
4 Nangukutuma kuli vana vakulikanga, vakukakama michima,+ kaha ukavalweza ngwove, ‘Omu mukiko mwanambe Yehova Mwata Wakulitulaho.’
5 Numba vakevwilila chipwe vakakana kwivwilila, hakuwana nge vanapu zuvo yavaka-kulikanga,+ navakatachikiza ngwavo muli vakiko mwapwile kapolofweto.+
6 “Ove mwanamutu, kanda ukavevwa woma+ chipwe kwivwa woma vyuma navakahanjikako, numba tuhu vanakujingilika kuvikwata namingonga,*+ kaha nawa uli nakutwama muli tuvwanda. Kanda ukevwa woma vyuma navakahanjikako,+ chipwe kulizuzukila kumeso avoko+ mwomwo vanapu zuvo yavaka-kulikanga.
7 Ukavalweza mazu ami, numba vakevwilila chipwe vakakana kwivwilila, mwomwo vanapu vaka-kulikanga.+
8 “Ove mwanamutu, ivwilila vyuma nguli nakukulweza. Kanda naulikanga ngana mwazuvo eyi yavaka-kulikangako. Asama mukanwa, ulyenga chuma nangukuhana.”+
9 Kahomu ngwatalile, ngwamwene livoko vanalyolwela kuli ami.+ Muze mulivoko mwapwile mukanda wakuvunga.+
10 Auvungulwile kumeso ami, kaha wapwile wakusoneka nakulutwe nakunyima.+ Hamukanda kana vasonekeleho jingungu,* nakulishona, najimbimbi.+
Kwinyikila Chamwishi
^ Eyi vulukiso “mwanamutu” yinasoloka mapapa 93 mumukanda waEzekele.
^ Chipwe pamo, “numba tuhu ava vatu vanapu vakukakama michima kaha nawa vanapu nge vyuma vize vili nakukutuva.”
^ Chipwe “vasonekeleho myaso yakulishona.”
