Ezekele 20:1-49
20 Jino mumwaka wakusokesa 7, mukakweji wamuchitanu, halikumbi lyakusokesa 10, vakulwane javaIsalele vamwe vejile nakutwama kumeso ami mangana nguvahulishile kuli Yehova.
2 Kaha Yehova ahanjikile kuli ami ngwenyi:
3 “Ove mwanamutu, hanjika kuli vakulwane javaIsalele ngwove, ‘Mwata Wakulitulaho Yehova nambe ngwenyi: “Muneza nakungwihula tahi? ‘Omu ngwayoya tu, kangweshi kumikumbulula havyuma namungwihulako.’+ Omu mukiko mwanambe Mwata Wakulitulaho Yehova.”’
4 “Ove mwanamutu, kutala unalizange kuvasopesa tahi? Kutala unalizange kuvasopesa nyi? Valweze vyuma vyaunyengwe valingilenga vakakuluka javo.+
5 Valweze ngwove, ‘Mwata Wakulitulaho Yehova nambe ngwenyi: “Halikumbi ngwasakwile Isalele,+ ngwalishingile* nawa kuli vaka-tanga* yaYakova, kaha ngwalijimbwile kuli vakiko mulifuchi lyaEjipitu.+ Ngwalishingile kuli vakiko nakwamba ngwami, ‘Ami yami Yehova Kalunga kenu.’
6 Halikumbi kana ngwalishingile ngwami nanguvalovola mulifuchi lyaEjipitu nakuvatwala kulifuchi ngwavatondelelele* lyakumbwambumuka mavele nauchi,+ lifuchi lyamwaza kuhambakana mafuchi osena.
7 Kaha ngwavalwezele ngwami, ‘Muvosena mbilenu vyuma vyaunyengwe vize munahake kumeso enu. Kanda namulipihisa namakombelo aunyengwe* amuEjipituko.+ Ami yami Yehova Kalunga kenu.’+
8 “‘“Oloze valikangile kuli ami, kaha kavasakile kungwivwililako. Kavambilile vyuma vyaunyengwe vahakile kumeso avoko, chipwe kuseza makombelo aunyengwe avaEjipituko.+ Ngocho ngwambile ngwami nanguvasolwela kulundundu yami nakuvakwachila utenu mulifuchi lyaEjipitu.
9 Oloze kangwalingile ngochoko mwomwo yalijina lyami, kuchina navalisaula kumeso avaka-mafuchi vaze vapwile nakutwama navo.+ Mwomwo ngwalijimbwile kuli vakiko* kumeso avaka-mafuchi omu ngwavalowele* mulifuchi lyaEjipitu.+
10 Ngocho ngwavalowele mulifuchi lyaEjipitu nakuvatwala mupambo.+
11 “‘“Ngwavahanyine jishimbi jami, nakuvalweza mazu ami akuyula,+ mangana weshowo mwawakavangiza ayoyenga.+
12 Ngwavahanyine nawa jisambata jami+ jipwenga hichinjikizo kuli ami navakiko,+ mangana vatachikize ngwavo ami Yehova yami muka-kuvajilika.
13 “‘“Oloze vaze vakuzuvo yaIsalele valikangile kuli ami mupambo.+ Kavakavangijile jishimbi jamiko, kaha nawa vakanyine mazu ami akuyula aze nawalingisa mutu ayoye kachi nge mwawakavangiza. Valumbilishile jisambata jami. Ngocho ngwambile ngwami nanguvasolwela utenu wami mupambo nakuvajiha.+
14 Oloze kangwalingile ngochoko mwomwo yalijina lyami, kuchina navalisaula kumeso avaka-mafuchi vaze vamwene omu ngwavalowele.*+
15 Ngwalishingile nawa kuli vakiko mupambo ngwami, kangweshi kukavatwala kulifuchi lize ngwavahanyineko,+ lifuchi lyakumbwambumuka mavele nauchi,+ lyamwaza kuhambakana mafuchi osena,
16 mwomwo vakanyine mazu ami akuyula, nakuhona kukavangiza jishimbi jami, nakulumbilisa jisambata jami, kaha nawa vajikile michima yavo kumakombelo aunyengwe.+
17 “‘“Oloze ngwavevwilile* keke, ngocho kangwavanongeseleko. Kangwavajihile mupamboko.
18 Ngwambile kuli vana vavo mupambo+ ngwami, ‘Kanda namukavangiza jindongi javakakuluka+ jenuko, chipwe kulama mazu avo akuyulako, chipwe kulipihisa namakombelo avo aunyengweko.
19 Ami yami Yehova Kalunga kenu. Kavangizenu jishimbi jami nakulama mazu ami akuyula.+
20 Jilikenu jisambata+ jami, kaha najipwanga chinjikizo kuli ami nayenu, mangana mutachikize ngwenu ami yami Yehova Kalunga kenu.’+
21 “‘“Oloze vana vavo valikangile kuli ami.+ Kavakavangijile jishimbi jamiko, kaha nawa kavalamine mazu ami akuyulako aze nawalingisa mutu ayoye kachi nge mwawakavangiza. Valumbilishile jisambata jami. Ngocho ngwambile ngwami nanguvasolwela kulundundu yami nakuvakwachila utenu mupambo.+
22 Oloze kangwalingile+ ngochoko mwomwo yalijina lyami,+ kuchina navalisaula kumeso avaka-mafuchi vaze vamwene omu ngwavalowele.*
23 Ngwalishingile nawa kuli vakiko mupambo ngwami nangukavamwangila kuli vaka-mafuchi eka, nakuvasanjila kumafuchi eka+
24 mwomwo kavakavangijile mazu ami akuyulako. Vakanyine jishimbi jami+ nakulumbilisa jisambata jami, valemeselenga* makombelo aunyengwe avakakuluka javo.+
25 Ngocho ngwavetavishile vakavangize jindongi jize kajapwile jamwazako, nakuvetavisa nawa valame mazu akuyula aze azenekele kuvalingisa vayoye.+
26 Ngwavechelele valipihise namawana avo hakulumba vana vavo vavatwatwa mukakahya+ mangana nguvanongese nakuvalingisa vatachikize ngwavo ami yami Yehova.”’
27 “Shikaho ove mwanamutu, hanjika kuli vaze vakuzuvo yaIsalele ngwove, ‘Mwata Wakulitulaho Yehova nambe ngwenyi: “Omu mukiko vangusawile navakakuluka jenu hakuhona kushishika kuli ami.
28 Ngwavatwalile mulifuchi lize ngwalishingile kuvahana.+ Kahomu vamwene jipili jajisuku namitondo yakujika mafwo,+ vaputukile kuhana vimuna vakuvatula namawana avo aunyengwe kuvyuma kana. Vahanyinenga vimuna vakuvatula kupwa wana walivumba lyalupengopengo* nakuhingunwinaho mawana avo avinyo.
29 Ngocho ngwavehwile ngwami, ‘Uno echi chihela chakulunduka mweji kuyangako chaka? (Chihela kana vachivuluka ngwavo Chihela Chakulunduka nakulelo lino.)’”’+
30 “Shikaho hanjika kuli vaze vakuzuvo yaIsalele ngwove, ‘Mwata Wakulitulaho Yehova nambe ngwenyi: “Kumana muchili nakulipihisa nganomu valipihishilenga vakakuluka jenu hakuhaka michima yavo kumakombelo aunyengwe nakulinga nawo ujila wakushipilitu nyi?+
31 Kumana noholili muchili nakulipihisa hakuhana mawana kumakombelo enu aunyengwe, hakulumba vana venu mukakahya nyi?+ Enu vakuzuvo yaIsalele, kutala ngwatela kumikumbulula havyuma namunguhulisa nyi?”’+
“Mwata Wakulitulaho Yehova nambe ngwenyi, ‘Omu ngwayoya tu, kangweshi kumikumbulula havyuma namungwihulako.+
32 Kaha nawa vyuma muli nakushinganyeka kavyeshi kusolokako, omu muli nakwamba ngwenu: “Tupwenu ngana mwavaka-mafuchi eka, ngana mwajitanga javaka-mafuchi eka jize jeji kulemesanga* mitondo namalolwa.”’”+
33 “Mwata Wakulitulaho Yehova nambe ngwenyi, ‘Omu ngwayoya tu, nangupwa ngumwangana wenu, kaha nangumiyula nalivoko lyami lyaundume, lyangolo, nakulundundu yami.+
34 Nangukamifumisa kuvatu veka naveka nakumikungulula nalivoko lyami lyaundume, lyangolo, nakulundundu yami kufuma kumafuchi kuze ngunamimwangila.+
35 Nangukamitwala mupambo yavatu veka naveka nakumisopesela kuze meso nameso.’+
36 “Mwata Wakulitulaho Yehova nambe ngwenyi, ‘Nganomu ngwasopesele vakakuluka jenu mupambo yalifuchi lyaEjipitu mukiko nangukamisopesa nayenu nawa.
37 Nangukamihichisa mwishi yambwechi yakafunga,+ nakulikasa nenu chivwasano.
38 Oloze nangukafumisa vaka-kulikanga muli enu navaka-kuzombwojoka jishimbi jami.+ Nangukavalovola mulifuchi lize vanazuzumana, oloze kaveshi kukengila mulifuchi lyaIsaleleko,+ kaha namukatachikiza ngwenu ami yami Yehova.’
39 “Enu vakuzuvo yaIsalele, Mwata Wakulitulaho Yehova nambe ngwenyi: ‘Yenunga mutu himutu nakuzachila makombelo enyi aunyengwe.+ Oloze nge namuzeneka lika kungwivwilila, kaha kamweshi kukasaula cheka lijina lyami lyajila navimuna jenu vakuvatula namakombelo enu aunyengweko.’+
40 “Mwata Wakulitulaho Yehova nambe ngwenyi, ‘Hapili yami yajila, hapili yayisuku yamulifuchi lyaIsalele+ hakiko namukanguzachila enu vakuzuvo yaIsalele muvosena.+ Nangukamivwila uselewa, kaha nangukatambula mawana enu najimbuto jenu jakulivanga kufuma kuvyuma vyenu vyajila vyosena.+
41 Omu nangukamifumisa kuvatu veka naveka nakumikungulula kufuma kumafuchi kuze ngwamimwangilile,+ nangukamivwila uselewa mwomwo yamawana enu alivumba lyalupengopengo,* kaha nangukalijilika muli enu kumeso avaka-mafuchi eka.’+
42 “‘Namukatachikiza ngwenu ami yami Yehova+ omu nangukamitwala mulifuchi lyaIsalele+ lize ngwalishingile kuhana vakakuluka jenu.
43 Namukanuka jijila jenu navilinga vyenu vyosena vize vyamipihishile,+ kaha namukalivwila unyengwe* mwomwo yavyuma vyavipi vyosena vize mwalingile.+
44 Kahenu vakuzuvo yaIsalele namukatachikiza ngwenu ami yami Yehova omu nangukalinga vyuma kana kuli enu mwomwo yalijina lyami,+ keshi nge mwomwo yavilinga vyenu vyakuhuka chipwe jijila jenu jajipiko.’ Omu mukiko mwanambe Mwata Wakulitulaho Yehova.”
45 Yehova ahanjikile cheka kuli ami ngwenyi:
46 “Ove mwanamutu, talisa meso ove kusulo uvilike nakupolofweta kuchipapa chakusulo.
47 Lweza chipapa chakusulo ngwove, ‘Ivwa vyuma nahanjika Yehova. Mwata Wakulitulaho Yehova nambe ngwenyi: “Nanguswamika kakahya muli ove,+ kaha nakocha mitondo yituta namitondo yaumu yosena. Milangi yakakahya kana kaveshi kahasa kukayijimako,+ kaha vihanga vyosena navikavauka kufuma kusulo swi nakunote.
48 Vakwechi mijimba vosena* navakamona ngwavo ami Yehova yami ngunaswamika kakahya kana, kaha kaveshi kahasa kukajimako.”’”+
49 Jino ngwambile ngwami: “Ove Mwata Wakulitulaho Yehova, vali nakuhanjika hali ami ngwavo, ‘Uno keshi nakuhanjika mutushimutwiji kahako nyi?’”
Kwinyikila Chamwishi
^ Hepe., “mbuto.”
^ Hepe., “ngwemikile livoko lyami.”
^ Chipwe “ngwavasondweselele.”
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Kulumbununa, vaIsalele.
^ Kulumbununa, vaIsalele.
^ Kulumbununa, vaIsalele.
^ Hepe., “Oloze meso ami avevwilile.”
^ Kulumbununa, vaIsalele.
^ Hepe., “meso avo akavangijilenga.”
^ Chipwe “lyakusuulwisa; lyakwivwisa kuwaha.”
^ Chipwe “kuzachilanga.”
^ Chipwe “lyakusuulwisa; lyakwivwisa kuwaha.”
^ Hepe., “namukevwila vihanga vyenu unyengwe.”
^ Chipwe “Vatu vosena.”
