Ezekele 21:1-32
21 Yehova ahanjikile cheka kuli ami ngwenyi:
2 “Ove mwanamutu, talisa meso ove kuYelusalema uvilike vyuma navisoloka kuvihela vyajila, nakupolofweta vyuma navisolokela lifuchi lyaIsalele.
3 Lweza lifuchi lyaIsalele ngwove, ‘Yehova nambe ngwenyi: “Nangukufumbukila, kaha nangusomona poko yami yamukwale muchindalo chayo+ nakujiha vaka-kuhuka hohamwe navaka-kwoloka.
4 Hakuwana nge nangujiha vaka-kwoloka navaka-kuhuka, ngocho nangusomona poko yami yamukwale muchindalo chayo mangana ngujihe vakwechi mijimba vosena* kufuma kusulo swi nakunote.
5 Vatu vosena navakatachikiza ngwavo ami Yehova ngunasomona poko yami yamukwale muchindalo chayo, kaha kayeshi kukindulukamo chekako.”’+
6 “Ove mwanamutu, lishimwoke oku uli* nakulichikimina. Lishimwoke chikuma kumeso avo.+
7 Kachi nge navamba kuli ove ngwavo, ‘Uli nakulishimwoka ika?’ Ove vakumbulule ngwove, ‘Nguli nakulishimwoka havyuma ngunevu.’ Vyuma kana navitesamo, kaha michima yavatu nayiyengunuka nawoma, navalizuzukila, shipilitu yavo nawa nayizeya, kaha vosena navalizovesela hamambuli avo.*+ ‘Tala! Vyuma kana navitesamo, navisoloka.’ Omu mukiko mwanambe Mwata Wakulitulaho Yehova.”
8 Yehova ahanjikile cheka kuli ami ngwenyi:
9 “Ove mwanamutu, polofweta ngwove, ‘Yehova nangulweze ngwenyi: “Amba ngwove, ‘Poko yamukwale! Poko yamukwale+ vanayihotola nakuyitumuna.
10 Vanayihotola mangana yijihe vatu vavavulu, vanayitumuna mangana yivese nge muveso.’”’”
“Kutala katwatela kuwahililako numba?”
“Kutala nayiteta* mbwechi yamwanami,+ ngana muze yeji kutetanga mitondo yosena nyi?
11 “‘Poko kana vanayihane mangana vayitumune nakuyikwata mulivoko. Vanayihotola nakuyitumuna vayihane mulivoko lyachitapanga.+
12 “‘Ove mwanamutu, teta miteto nakulila jimbimbi,+ mwomwo poko yamukwale yineza hali vatu jami, yineza hali vamyata javaIsalele vosena.+ Vatu kana navafwa kupoko yamukwale hohamwe navatu jami. Ngocho veta hatungi yove nakulishona.
13 Poko kana vanayikekesa,+ kaha vyuma muka navisoloka nge nayiteta mbwechi? Mbwechi kana nayinonga.’+ Omu mukiko mwanambe Mwata Wakulitulaho Yehova.
14 “Ove mwanamutu, polofweta nakulinga pu mumavoko ove. Hanjika mapapa katatu ngwove, ‘Poko yamukwale!’ Yinapu poko yakujihisa, yinajihi vatu vavavulu, kaha yinavajingilika.+
15 Michima yavo nayiyengunuka nawoma,+ kaha vatu vavavulu navalindwomwokela havikolo vyajinganda javo. Nanguvajiha napoko yamukwale. Poko kana yili nakuvesa nge muveso, vanayitumuna mangana yijihe vatu.
16 Ove poko yamukwale, yako kuchilyo uvatwojole. Alumukila nawa kuchimoswe. Yako kweshokwo unatale uvela wove.
17 Nayami nangukalinga pu mumavoko ami nakutulisa kulundundu yami.+ Ami Yehova yami ngunahanjika.”
18 Yehova ahanjikile cheka kuli ami ngwenyi:
19 “Ove mwanamutu, funjika jila yize nayifuma kulifuchi limwe. Jila kana yilihandunune nakupwa jijila jivali. Kaha mwangana waMbavilone uze ali nakwiza napoko yamukwale mwakasakula jila yakuya munganda ali nakusaka. Hamakanyiko ajijila kana uhakeho chinjikizo* chize nachisolola jila yakuya munganda kana.
20 Solola jila yimwe nayikahita poko yamukwale yize nayikanongesa Lava+ yavaAmone, najila yikwavo nayikahita poko yamukwale yize nayikanongesa Yelusalema+ yakujingilika kembwe muYuta.
21 Mwomwo mwangana waMbavilone mwakemana hamakanyiko haze hanalihandunwina jijila jivali nakutaha vitaho. Mwakanyengesa mivwi, nakwihula makombelo* enyi, nakukekesa lisuli.
22 Chitaho chamulivoko lyenyi lyachilyo nachikenyika kuYelusalema mangana akaye nakuhaka makina akupuzwisa kembwe, nakuhana lushimbi lwakujiha vatu, nakuvilika luvila lwajita, nakuhaka makina akupuzwisa vikolo vyakembwe, nakulundula milundu, nakutungila kembwe nganda kana mangana vayihake muchingombela.+
23 Oloze kutaha kana nachikasoloka nge chamakuli kuli vaze* valishingile navo lushingo.+ Chipwe ngocho, mwangana mwakanuka kuhenga chavo nakuvakwata.+
24 “Shikaho Mwata Wakulitulaho Yehova nambe ngwenyi: ‘Munalingisa kuhenga chenu vachanuke hakusolola hatoma vilinga vyenu vyakuzombwojoka jishimbi najishili jenu. Hakuwana nge vanamyanuka, navamikwata.’*
25 “Ove mwata waIsalele wakuhuka vanalemeka, likumbi lyove lineza,+ lwola lwakukuzangamisa lunahete.
26 Mwata Wakulitulaho Yehova nambe ngwenyi: ‘Zula lihina lyakujinga kumutwe namuchama.+ Vyuma vinalumuka jino.+ Zezula ou napunga wakwinyisa,+ nakwinyisa ou napunga wakuzezula.+
27 Muchama kana nanguunongesa, nanguunongesa, nanguunongesa. Kaveshi kukauvwala kuli mutu numba umweko palanga nomu mwakeza ou vahana lisesa lyakuuvwala,+ kaha nangukamuhanawo.’+
28 “Jino ove mwanamutu, polofweta ngwove, ‘Evi vikiko nahanjika Mwata Wakulitulaho Yehova hali vaAmone nahakasautu kavo.’ Amba ngwove, ‘Poko yamukwale! Poko yamukwale vanayisomona mangana yijihe vatu. Vanayitumuna mangana yinongese nakuvesa nge muveso.
29 Chamokomoko navyakumwenesa vyamakuli nakutaha chakulyonga vali nakumitahila, navamijiha nakumilumbika hamijimba* yavatu vakuhuka vaze vanajihi vakwechi likumbi lyavo lineza, nalwola lwakuvazangamisa lunahete.
30 Poko yamukwale yikinduluke muchindalo chayo. Nangumisopesela kuchihela chize mwasemukilile, kulifuchi lize mwafumine.
31 Nangumisolwela matoto ami, nakumihwimina kakahya kautenu wami, kaha nangumihana kuvikenya vaze vapwa vakuluwa vaka-kunongesa.+
32 Namukapwa nge jikunyi hakakahya,+ manyinga enu nawakamwangala mulifuchi, kaha kaveshi kukamyanuka chekako mwomwo ami Yehova yami ngunahanjika.’”
Kwinyikila Chamwishi
^ Chipwe “vatu vosena.”
^ Hepe., “oku jitungi jove jili.”
^ Kulumbununa, navalisushila mwomwo yawoma.
^ Kulumbununa, poko yamukwale yaYehova.
^ Hepe., “uhakeho livoko.”
^ Hepe., “vatelafwime.”
^ Kulumbununa, vatu vamuYelusalema.
^ Hepe., “navamikwata namavoko.”
^ Hepe., “hajishingo.”
