Ezekele 22:1-31
22 Yehova ahanjikile cheka kuli ami ngwenyi:
2 “Ove mwanamutu, kutala unalizange kusopesa* eyi nganda yili namulonga wamanyinga,+ nakuyilweza vyuma vyaunyengwe vyosena yili nakulinga nyi?+
3 Yilweze ngwove, ‘Mwata Wakulitulaho Yehova nambe ngwenyi: “Ove nganda uli nakumwanga manyinga,+ ove ukwechi lwola lwove luli nakwiza,+ ove uli nakutenga makombelo aunyengwe* mangana ulipihise nawo,+
4 uli namulonga wakumwanga manyinga,+ unapihi namakombelo ove aunyengwe.+ Unanguhwisa makumbi ove, kaha mwaka wakukuzangamisa uneza. Shikaho nangukulingisa vakuhende kuli vaka-mafuchi eka, nakukusaula kumafuchi osena.+
5 Ove ukwechi lijina lyove linapihi, ove unazale napindangano, mafuchi aze anakuhate nawaze ali kwakusuku nawakusaula.+
6 Tala! Vamyata javaIsalele vosena vaze vali muli ove vali nakuzachisa ngolo javo vamwange manyinga.+
7 Vatu vali muli ove vali nakusaula masevo namanevo.+ Kaha vali nakulyapula vamwiza nakuyanjisa vana vakuzeneka masevo* navatuliwe.”’”+
8 “‘Uli nakulumbilisa vihela vyami vyajila, nakujilulula jisambata jami.+
9 Muli ove muli vaka-lusongi vaze vafwila kumwanga manyinga.+ Muli vatu vaze vali nakulya vimuna vakuvatwila hajipili, nakulinga vilinga vyaunyengwe.+
10 Muli ove muli vatu vali nakusaula tuhela twamasevo,*+ nakupihisa pwevo uze napihi hakupwa kukakweji.+
11 Muli ove muli lunga umwe uze ali nakulinga vyuma vyaunyengwe napwevo lyamukwavo.+ Muli nawa lunga mukwavo uze ali nakupihisa pwevo lyamwanenyi,+ nalunga weka uze ali nakupihisa ndumbwenyi wapwevo, mwanaise.+
12 Muli ove muli vatu vali nakutambula maswekeza mangana vamwange manyinga.+ Uli nakulevanyisa hasaku,+ chipwe kulevanyisa uwanyineho nganyo, kaha uli nakutambula jimbongo javakwenu.+ Unanguvulyama chikupu.’ Omu mukiko mwanambe Mwata Wakulitulaho Yehova.
13 “‘Tala! Ngunalingi pu mumavoko ami mwomwo ngunakwivwila unyengwe havyuma unanganyala mulizangamina, nahavilinga vyove vyakumwanga manyinga.
14 Kutala naukomika nakupwa nangolo omu nangukakuzangamisa nyi?+ Ami Yehova yami ngunahanjika, kaha nangulingamo.
15 Nangukakumwangila kuli vaka-mafuchi eka, nakukusanjila kumafuchi eka,+ kaha nangukakumisa vilinga vyove vyavipi.+
16 Vaka-mafuchi eka navakakusaula, kaha naukatachikiza ngwove ami yami Yehova.’”+
17 Yehova ahanjikile cheka kuli ami ngwenyi:
18 “Ove mwanamutu, vaze vakuzuvo yaIsalele vanapu nge vizozo vyamokomoko kuli ami. Vosena vanapu unengu, nashitanyu, nafwelu, nasumbu vize vili mulilungu. Vanapu vizozo vyapalata.+
19 “Shikaho Mwata Wakulitulaho Yehova nambe ngwenyi: ‘Hakuwana nge muvosena munapu nge muvizozo vyamokomoko,+ ngocho nangumikungulwila muYelusalema.
20 Nganomu veji kukungulwilanga palata, naunengu, nafwelu, nasumbu, nashitanyu mulilungu mangana vavihehe nakakahya viyengunuke, mukiko nangumikungulula nayenu namatoto nakulundundu yami, kaha nangumiheha muyengunuke.+
21 Nangumikungulwila hamwe nakumiheha nakakahya kautenu+ wami, kaha namuyengunukila muYelusalema.+
22 Namuyengunukila muYelusalema nganomu yeji kuyengunukanga palata mulilungu. Kaha namukatachikiza ngwenu ami Yehova yami ngunamisolwela kulundundu yami.’”
23 Kaha Yehova ahanjikile cheka kuli ami ngwenyi:
24 “Ove mwanamutu, mulweze ngwove, ‘Unapu ulifuchi lize kaveshi kukatomesa chipwe kunokesamo vula halikumbi lyautenu wamiko.
25 Vapolofweto jove vanalikase punga,+ vanapu nge ndumba wakutahwoka ali nakutanya kanyama wamukoka.+ Vali nakujiha vatu,* kaha vali nakutambula luheto lwavatu navyuma vyavo vyandando yayinene. Vanavulisa vatuliwe muli ove.
26 Vapilishitu jove vanahokola jishimbi jami,+ vali nakulumbilisa vihela vyami vyajila.+ Kaveshi kuhandununa vyuma vyajila navyevi vyakuzeneka kujilako,+ kaha kaveshi kulweza vatu vyuma vyavipi navize vitomako.+ Kaveshi kulama jisambata jamiko, kaha nawa vali nakungusaula.
27 Vilolo jove vanapu nge tungunge vakutanya kanyama wamukoka. Veji kumwanganga manyinga nakujiha vatu* mangana vawanyineho nganyo.+
28 Oloze vapolofweto jove vanasweke vilinga vyavo vyavipi ngana muze mutu mwasweka mwaji hambango hakukwitaho pemba. Veji kumonanga vyakumwenesa vyamakuli nakutaha vyakwonga,+ kaha vali nakwamba ngwavo: “Mwata Wakulitulaho Yehova nambe ngwenyi,” okunyi Yehova kahanjikile navimweko.
29 Vatu vamulifuchi vali nakulyapula vakwavo, nakupupa vyuma vyavakwavo,+ nakuyanjisa vaka-kukalikiza navaka-kuhutwa. Vali nakulyapula mwiza nakuzeneka kumulingila mwaya chiyulo.’
30 “‘Ngwapwile nakutondatonda lunga muli vakiko uze mwatungulula kembwe yamalolwa chipwe uze mwemana kumeso ami mulihanya mangana emanyineko lifuchi vahone kulinongesa,+ oloze kangwamuwanyineko.
31 Ngocho nanguvasolwela utenu wami nakuvanongesa nakakahya kautenu wami. Nanguvazangamisa havilinga vyavo.’ Omu mukiko mwanambe Mwata Wakulitulaho Yehova.”
Kwinyikila Chamwishi
^ Hepe., “kutala nausopesa, nausopesa.”
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Chipwe “nakuyanjisa vanginga.”
^ Hepe., “vali nakuzula masevo.”
^ Chipwe “myono.”
^ Chipwe “myono.”
