Ezekele 23:1-49
23 Yehova ahanjikile cheka kuli ami ngwenyi:
2 “Ove mwanamutu, kwapwile mapwevo vavali vakusemuka mujimo limwe.+
3 Vapwile vaka-ujila muEjipitu.+ Valingilenga ujila putu vene omu vapwile vanavamapwevo. Vavakwachilenga hamavele avo nakuwachikita omu vapwile vajike.*
4 Wamukulwane apwile ikiye Ohola,* wakanyike apwile ikiye Oholiva.* Mapwevo kana vapwile vami, kaha vasemene vana vamalunga navava vamapwevo. Ohola ikiye Samaliya,+ kaha Oholiva ikiye Yelusalema.
5 “Jino Ohola aputukile kulinga ujila+ omu apwile wami. Evwilile peha tujila twenyi+ vaAsulya vaze alihachile navo.+
6 Vapwile vanguvulu vaze vavwalilenga uvwalo ulauluka, mihato javatwamina, vaze vapwile vakweze jamalunga vamwaza vaka-kutambukila hatuvalu.
7 Ohola alingilenga lika ujila navana vaAsulya vavalemu, kaha alipihishile+ namakombelo aunyengwe* avaze evwililenga peha.
8 Kalitwaminyine kulinga ujila alingilenga muEjipituko, mwomwo valisavalilenga nenyi putu vene omu apwile mwanapwevo, kaha vapwilenga nakumuchikita hamavele enyi. Valingilenga nenyi ujila.+
9 Ngocho ngwamuhanyine kuli tujila twenyi vana vaAsulya+ vaze evwililenga peha.
10 Vamuzulile nakumuseza uselesele.+ Vakwachile vana venyi vamalunga navava vamapwevo,+ kaha vamujihile napoko yamukwale. Ahukile chikuma, shikaho vamuzangamishile.
11 “Omu ndumbwenyi Oholiva amweneko, peha yenyi yatohwele chikuma, kaha vilinga vyenyi vyaujila vyahambakanyine navize vyandumbwenyi.+
12 Evwilile peha vana vaAsulya+ vaze alihachile navo, vanguvulu namihato javatwamina vaze vavwalilenga uvwalo waulangaji, nakutambukila hatuvalu. Vapwile vakweze vamwaza.
13 Omu alipihishile, ngwamwene ngwami vosena vavali vapwile navilinga vyovimwe.+
14 Oloze avulishile lika vilinga vyenyi vyaujila. Amwene malunga vakusona hambango naulombo uchila vaze vapwile vifwanyisa vyavaKalateya,
15 vaze vavwalile mihya mujimbunda javo, namahina akujinga kumitwe yavo akuzezalala, kaha vasolokelenga nge vaka-kwasa jita. Vosena vafwanyine vaka-Mbavilone vaze vasemukilile mulifuchi lyavaKalateya.
16 Omu avamwene, aputukile kuvevwila peha, ngocho atumine valuwa kuli vakiko muKalateya.+
17 Kaha vaka-Mbavilone vejilenga kuli ikiye nakulisavala nenyi, ngocho vamupihishile naujila wavo. Omu vamupihishile, avevwilile unyengwe nakuvaseza.
18 “Omu alingilenga lika ujila mukuzunguma nakusolola usonyi wenyi hatoma,+ ngwamwivwilile unyengwe nakumuseza ngana muze ngwevwilile ndumbwenyi unyengwe nakumuseza.+
19 Avulishile lika vilinga vyenyi vyaujila+ hakwanuka makumbi aze apwile mwanapwevo omu alingilenga ujila mulifuchi lyaEjipitu.+
20 Avevwilile peha ngana mwamapwevo vaze vakwechi tujila twavo vatwama naulunga nge wachimbulu nakavalu.
21 Ove Oholiva, wafwililile kulinga vilinga vyove vyaunyengwe vize walingilenga omu wapwile umwanapwevo muEjipitu,+ omu vapwilenga nakukuchikita hamavele ove awanawaupwevo.+
22 “Shikaho ove Oholiva, Mwata Wakulitulaho Yehova nambe ngwenyi: ‘Tala, nanguzondola tujila twove+ vaze wevwilile unyengwe nakuvaseza, kaha nanguvaneha kuli ove kufuma kumitamba yosena mangana vakufumbukile.+
23 Nangukunehela vaka-Mbavilone,+ navaKalateya+ vosena, malunga vakuPekote,+ nakuShowa, nakuKowa, navana vaAsulya vosena. Vanapu vakweze jamalunga vamwaza, vanguvulu namihato javatwamina, vaka-kwasa jita vakusakula* vakutambukila hatuvalu.
24 Navakakulukuka namatemba avo ajita natufumbo, namayongomena avaka-jita, najikepwe jajinene, namikingo,* namatepa akukola. Navakakujingilika, kaha nangukavetavisa vakakusopese kweseka nomu navakamwena.+
25 Nangukakukwachila matoto, kaha navakakuzangamisa mwomwo yakulundundu yavo. Navakakuteta muzulu namatwitwi, kaha vaze navakasala muli ove navakalindumuka kupoko yamukwale. Navakambata vana vove vamalunga navava vamapwevo, kaha vaze navakasalaho navakawema nakakahya.+
26 Navakakuzula uvwalo wove+ nakukutambula vimbilingwa vyove vyamwaza.+
27 Ngocho nangukakumisa vilinga vyove vyaunyengwe naujila wove+ uze wafumine nawo kulifuchi lyaEjipitu.+ Kaweshi kukavitala chekako, kaha nawa kaweshi kukanuka Ejipituko.’
28 “Mwomwo Mwata Wakulitulaho Yehova nambe ngwenyi: ‘Kalinwaha ngukuhane kuli vaze unahungu, vaze unevwila unyengwe nakuvaseza.+
29 Navakakuzangamisa mwomwo yakukuhunga, kaha navakakutambula vyuma vyosena unakilikichila,+ nakukuseza uselesele. Ngocho usonyi wove, navilinga vyove vyaunyengwe, naujila wove navikasoloka hatoma.+
30 Navakalinga vyuma vyosenevi kuli ove mwomwo yakukava vaka-mafuchi eka kwijiva nge umuka-ujila,+ nakulipihisa namakombelo avo aunyengwe.+
31 Unalingi ngana mwandumbwove,+ kaha nangukahaka lupasa lwenyi mulivoko lyove.’+
32 “Mwata Wakulitulaho Yehova nambe ngwenyi:‘Naukanwa mulupasa lwandumbwove lwakukunama lwalunene,+Kaha navakakuseha nakukutoleka mwomwo mulupasa kana muli vyuma vyavivulu.+
33 Naukapenda nakulyonyingaNalupasa lwandumbwove SamaliyaLwachiwomawoma nakunonga.
34 Naukalunwa nakulumanyisa,+ naukapazula uma walupasa kana namazo ove,Kaha naukalipula hamavele ove.Mwata Wakulitulaho Yehova nambe ngwenyi: “Ami yami ngunahanjika.”’
35 “Shikaho Mwata Wakulitulaho Yehova nambe ngwenyi: ‘Hakuwana nge unanguvulyama nakunguleununa,*+ nangukuzangamisa havilinga vyove vyaunyengwe naujila wove.’”
36 Jino Yehova ambile kuli ami ngwenyi: “Ove mwanamutu, uno unalizange kusopesa Ohola naOholiva+ nakuvalweza vilinga vyavo vyaunyengwe tahi?
37 Vanalingi ujila,*+ kaha nawa vali namulonga wamanyinga. Kavalingile ujila namakombelo aunyengwe kahako, oloze vali nakulumba nawa vana vavo mukakahya vaze vanaseme nayami nakuvalingisa kupwa kulya chamakombelo avo.+
38 Kaha nawa evi vikiko valingile: Valumbilishile chihela chami chajila halikumbi kana, nakujilulula jisambata jami.
39 Omu valingile hivanajihi vana vavo nakuvahana kupwa wana kumakombelo avo aunyengwe,+ vengilile muchihela chami chajila nakuchijilulula+ halikumbi vene lize. Evi vikiko valingile muzuvo yami.
40 Vatumine nawa muluwa ayenga nakusanyika malunga vakwakusuku.+ Kahomu vapwile nakwiza, ove Oholiva wasanyine nakuliwahisa kumeso ove, nakuvwala vimbilingwa.+
41 Watwamine hakahela kamwaza,+ kaha kulutwe lwakahela kana kwapwile mesa+ yize watumbikile vyuma vyami vyalivumba lyamwaza+ namaji ami.+
42 Kwapwile vyema vyalizavu lyamalunga vaze vapwile nakulya nakunwa. Halizavu kana hapwile navitakwa vaze vafumine mupambo. Vavwikilenga ava mapwevo vavali maseka kumavoko namichama yamwaza kumitwe yavo.
43 “Jino ngwahanjikile hali uze pwevo apapukile naujila ngwami: ‘Ou mwalinganga lika ujila.’
44 Ngocho vayilenga lika kuli ikiye ngana muze veji kuyanga kuli pwevo muka-ujila. Omu mukiko vayilenga kuli Ohola naOholiva, mapwevo vavilinga vyaunyengwe.
45 Oloze malunga vaka-kwoloka navakamusopesa nge kutesa namulonga waujila+ namulonga wakumwanga manyinga.+ Mapwevo kana vanapu vaka-ujila, kaha nawa vali namulonga wamanyinga.+
46 “Mwomwo Mwata Wakulitulaho Yehova nambe ngwenyi: ‘Liyongomena lyavaka-jita nalikavafumbukila mangana vakavalingise kupwa chuma chakwivwisa woma nakuvapupa vyuma vyavo.+
47 Liyongomena kana nalikavasa malolwa+ nakuvavatwojola najipoko javo jamikwale. Navakajiha vana vavo vamalunga navava vamapwevo+ nakwocha jizuvo javo.+
48 Nangukakumisa vilinga vyaunyengwe vyosena mulifuchi, ngocho mapwevo navakalinangulaho chuma chimwe, kaha kaveshi kukalinga vilinga vyenu vyaunyengweko.+
49 Navakamizangamisa havilinga vyenu vyaunyengwe nahajishili munalinginga hakulemesa makombelo enu aunyengwe. Kaha namukatachikiza ngwenu ami yami Mwata Wakulitulaho Yehova.’”+
Kwinyikila Chamwishi
^ Lizu lyachiHepeleu vazachisa hano lyalumbununa mapwevo vaze kanda valisavaleho lyehi namalunga.
^ Ulumbunwiso, “Mbalaka Yenyi.”
^ Ulumbunwiso, “Mbalaka Yami Yili Muli Ikiye.”
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Hepe., “vakusanyika.”
^ Jikepwe jajindende jize vambachilenga vaka-kwasa mata amanana.
^ Hepe., “nakungumbila kunyima yove.”
^ Kulumbununa, ujila wakushipilitu.
