Ezekele 24:1-27
24 Yehova ahanjikile cheka kuli ami hamwaka wakusokesa 9, mukakweji wakusokesa 10, halikumbi lyakusokesa 10 ngwenyi:
2 “Ove mwanamutu, soneka likumbi lino,* likumbi vene lino lyalelo. Mwangana waMbavilone naputuka kulukuka Yelusalema likumbi lyalelo.+
3 Hanjika kashimutwiji* kakupandama kuli vaze vakuzuvo yakulikanga ngwove:
“‘Mwata Wakulitulaho Yehova nambe ngwenyi:“Hakenu ndeho* halijiko nakuhingunwinamo meya.+
4 Hakenumo jitumba janyama+ jamwaza jalihinji nalivoko,Kaha yizalisenu navifuwa vyakusakula.
5 Mbatenu mukoko wamwaza hautanga.+ Hakenu jikunyi kundeho kana jingulwishi,Kaha telekenu jitumba navifuwa vilimo.”’
6 “Ngocho Mwata Wakulitulaho Yehova nambe ngwenyi:‘Lamba hanganda yakumwanga manyinga+ yize yinapu ndeho yashingwe yikwechi shingwe yayo vanahono kufumisa!Fumisenu jitumba jilimo, yimwe nayimwe.+ Kanda namuzachisa tutachikijilo hakujifumisamoko.
7 Mwomwo manyinga ayo ali mukachi kayo.+ Nganda kana yamwangilile manyinga halilolwa lyapwile hatoma.Kayamwangilile manyinga kana hamavu nakushikilaho mavuko.+
8 Hakusaka kusangumuna kulundundu yami ngulinge sambanjinga,Ngunahake manyinga ayo halilolwa lyakuvyakuma lili hatomaMangana vazeneke kuwafwika.’+
9 “Ngocho Mwata Wakulitulaho Yehova nambe ngwenyi:‘Lamba hanganda yakumwanga manyinga!+
Nangulumbika mulumba wajikunyi waunene.
10 Vulisenu jikunyi, wikenu kakahya,Telekenu nyama yihyenga kanawa. Zuzenumo musoji mangana vifuwa viweme.
11 Tumbikenu ndeho yamupolongwa hamakala akakahya yizume hyangu,Kaha unengu wayo nawenyaNakuyengununa majilo alimo,+ nakufumisamo shingwe.
12 Namwivwa chipekete nakuzeyaMwomwo shingwe kayeshi kufumako.+Imbilenu mukakahya nashingwe yayo.’
13 “‘Ove nganda, vilinga vyove vyaunyengwe+ vikiko vinakupihisa. Ngunesekanga kukutomesa, oloze kawatomene kukupihya choveko. Kaweshi kutomako palanga nomu nawakuma matoto ngunakukwachila.+
14 Ami Yehova yami ngunahanjika, kaha nangutesamo. Nangulingamo chikupu, kaha kangweshi kwivwa keke chipwe kuliveyako.+ Navakusopesa kweseka najijila jove navilinga vyove.’ Omu mukiko mwanambe Mwata Wakulitulaho Yehova.”
15 Yehova ahanjikile cheka kuli ami ngwenyi:
16 “Ove mwanamutu, nangukutambula ou wazanga+ mukukasumuna. Kanda naulishona,* chipwe kulila, chipwe kusotola masojiko.
17 Lishimwoke uholela, kaha kanda naulishona hali vafuko.+ Lijinge lihina kumutwe wove+ nakuvwala mendelo.+ Kanda naufwika wevu wahamuvumbo wove waheluko,+ chipwe kulya mbolo navakunehelako.”*+
18 Ngwahanjikile kuvatu nachimene, kaha kuheta nachingoloshi pwevo lyami afwile. Ngocho nachimene ngwalingile nge muze vangulwezele kulinga.
19 Jino vatu vangwihwile ngwavo: “Uno kaweshi kutulumbunwina vyumevi uli nakulinga mangana tumone omu vinapandama kuli etuko tahi?”
20 Kaha ngwavakumbulwile ngwami: “Yehova nahanjika kuli ami ngwenyi,
21 ‘Lweza vaze vakuzuvo yaIsalele ngwove: “Mwata Wakulitulaho Yehova nambe ngwenyi, ‘Kalinwaha ngujilulule chihela chami chajila+ chize mweji kulivwimbilanga, chize mwazanga nakufwila mumichima yenu. Vana venu vamalunga navava vamapwevo vaze munaseze navalindwomwoka kupoko yamukwale.+
22 Ngocho namulinga ngana muze nalingi Ezekele. Kamweshi kufwika wevu wahamivumbo yenu yahelu, chipwe kulya mbolo navaminehelako.+
23 Namulijinga mahina kumitwe yenu, nakuvwala mendelo kuvilyachilo vyenu. Kamweshi kulishona chipwe kulilako, oloze namuhokama hakuhenga chenu,+ kaha muvosena namulikemenena mikemo.
24 Ezekele napu chinjikizo kuli enu.+ Namulinga ngana muze nalingi ikiye. Kahomu navisoloka vyuma kana, namukatachikiza ngwenu ami yami Mwata Wakulitulaho Yehova.’”’”
25 “Ove mwanamutu, omu nangukavatambula chihela chavo chakukola, chize veji kwivwilanga kuwaha, chize vazanga nakufwila mumichima* yavo, nomu nangukavatambula vana vavo vamalunga navava vamapwevo,+
26 navakeza nakukwambulila kuli ou mwakayovoka.+
27 Halikumbi kana naukalokolola mukanwa kove nakuhanjika kuli ou nayovoka, kaha kaweshi kukahona kuhanjika chekako.+ Naukapwa uchinjikizo kuli vakiko, kaha navakatachikiza ngwavo ami yami Yehova.”
Kwinyikila Chamwishi
^ Hepe., “soneka lijina lyalikumbi lino.”
^ Chipwe “chishimo.”
^ Chipwe “ndeho yakanwa kakanene.”
^ Chipwe “nauliveta hatulo yove.”
^ Hepe., “mbolo yamalungako.”
^ Chipwe “mumyono.”
