Ezekele 26:1-21
26 Mumwaka wakusokesa 11, halikumbi lyakulivanga mukakweji, Yehova ahanjikile kuli ami ngwenyi:
2 “Ove mwanamutu, hakuwana nge Tule nambe kuli Yelusalema+ ngwenyi, ‘Ewa! Chikolo chavatu chinapuzuka!+ Vyuma vyosena navipwa jino vyami, kaha nanguheta luheto omu vanamunongesa,’
3 ngocho Mwata Wakulitulaho Yehova nambe ngwenyi: ‘Ove Tule, ngunakwimanyina nakole, kaha nangukunehela vatu vakumafuchi amavulu, ngana muze kalungalwiji eji kunehanga makimba.
4 Navapuzula jikembwe jove, nakushiula tuposhi twove,+ nakukonga mavu ove mangana usale nge lilolwa lyakuvyakuma lili hatoma.
5 Naukapwa uchihela chakwanyikila moji achikokela mukachi kakalungalwiji.’+
“Mwata Wakulitulaho Yehova nambe ngwenyi, ‘Ami yami ngunahanjika, kaha vaka-mafuchi eka navakapupa vyuma vyove.
6 Vatu vamumembo* ove navakavajiha napoko yamukwale, kaha vatu navakatachikiza ngwavo ami yami Yehova.’
7 “Mwata Wakulitulaho Yehova nambe ngwenyi: ‘Ove Tule, nangukunehela Mwangana Nevukataneza* wakuMbavilone kunote,+ mwangana wavamyangana+ uze akwechi tuvalu,+ namatemba ajita,+ navaka-kutambukila hatuvalu, nalizavu lyamaswalale* vavavulu.
8 Mwanongesa vatu vamumembo ove napoko yamukwale. Mwakutungila kembwe, nakukulundwila mulundu, nakukuzundwila kepwe yayinene.
9 Mwachika jikembwe jove namakina enyi, kaha mwapuzula tuposhi twove najingimbu jenyi.*
10 Tuvalu twenyi navavula chikuma, ngocho lukungu lwavo nalukufwika, kaha kulilima chakutambuka chatuvalu, natufumbo, namatemba ajita nachinyikisa jikembwe jove omu mwengila muchikolo chove kwijiva nge malunga vaze vanalukuka nganda yikwechi kembwe yakupuzuka.
11 Jisende jatuvalu twenyi najilyatangila jijila jove josena.+ Mwajiha vatu jove napoko yamukwale, kaha jipanda jove jajinene najilindwomwoka hamavu.
12 Navapukula vikumba vyove nakupupa vyuma vyove vyakusekasana,+ kaha navapuzula jikembwe jove najizuvo jove jamwaza. Malolwa ove, navyuma vyove vyakusonga, namavu ove navavimbila mumeya.’
13 “‘Nanguholesa vyema vyamyaso yove, kaha vivumo vyatulyalya twove kavyeshi kukevwakana chekako.+
14 Nangukakulingisa kupwa nge lilolwa lyakuvyakuma lili hatoma. Naukapwa uchihela chakwanyikila moji achikokela.+ Kaha kaveshi kukakutungulula chekako mwomwo ami Yehova yami ngunahanjika.’ Omu mukiko mwanambe Mwata Wakulitulaho Yehova.
15 “Mwata Wakulitulaho Yehova nahanjika kuli Tule ngwenyi: ‘Kutala matungu kaweshi kukandenda nalushindo lwakulindumuka chove, namikemo yavaze vali nakufwa,* nomu navakajiha vatu muli oveko nyi?+
16 Vilolo* vakukalungalwiji vosena navakafuma hamatanda avo nakuzula vikuto vyavo* nauvwalo wavo wakutonga kanawa, kaha woma naukavakwata.* Navakatwama hamavu nakulichikimina, kaha navakakutala oku vanalikomokela.+
17 Navakakwimbila lungungu*+ ngwavo:“Ove nganda valishilenga, ove wapwilenga navatu vakufuma kutulungalwiji, unanongo mwamupi!+Ove navatu jove* mwapwile muvakukangana hakalungalwiji,+Kaha mwevwishilenga woma vatu vosena hamavu.
18 Matungu nawakandenda halikumbi lize naukalindumuka.Matungu ahakalungalwiji nawakalizuzukila nawoma omu naukanonga.”’+
19 “Mwata Wakulitulaho Yehova nambe ngwenyi: ‘Omu nangukakunongesa nakukuseza kwijiva nge jinganda jize kajatwama navatuko, nomu nangukakunehela meya amavulu, nakukufwika nameya angolo,+
20 nangukakufunda hohamwe navatu vaze vali nakushikumuka muwina* muze vaya vatu vakushikulu. Nangukakuhaka kwishi yamavu hohamwe navatu vaze vali nakushikumuka muwina,+ ukapwe ngana mwavihela vyakushikulu vize vanongesa lyehi, mangana vatu vakahone kutwama cheka muli ove. Kaha nangukazezula vatu vavatonyi.’
21 “Mwata Wakulitulaho Yehova nambe ngwenyi, ‘Nangukakunehela lupi, kaha kaweshi kukapwako chekako.+ Navakakutondatonda, oloze kaveshi kukakuwanako.’”
Kwinyikila Chamwishi
^ Hepe., “Vana.”
^ Hepe., “Nevukataleza,” kusoneka chikwavo.
^ Hepe., “lyavatu veka naveka.”
^ Chipwe “najipoko jenyi jamikwale.”
^ Hepe., “vali nakujiha.”
^ Chipwe “Vamyata.”
^ Chipwe “jindeleji javo jakuzeneka mavoko.”
^ Hepe., “naukavafwika.”
^ Chipwe “mwaso wakulishona.”
^ Hepe., “Ikiye navatu jenyi.”
^ Chipwe “mufuka.”
