Ezekele 27:1-36
-
Lungungu hawato uze unavombo (1-36)
27 Yehova ahanjikile cheka kuli ami ngwenyi:
2 “Ove mwanamutu, imbila Tule lungungu.*+
3 Amba ngwove,‘Ove watwama kuwingililo wakukalungalwiji,Ove weji kusekasananga navatu veka naveka vahamatungu amavulu,Mwata Wakulitulaho Yehova nambe kuli ove ngwenyi:“Ove Tule, ove unambe ngwove, ‘Ami ngwapwa nguwamwaza chikuma.’+
4 Jingalila jove jatwamina mukachi kakalungalwiji,Kaha vaka-kukutunga vanakuwahisa chikupu.
5 Maliva ove osena apwile aminjunyipe yakuSenyile,+Kaha vitondo vyove vyakukashililako mahina akutambukisa wato vyapwile vyamishitale yakuLevanone.
6 Vilapo vyove vyapwile vyamitondo yayinene yakuMbashane.Jitongo jove japwile jashipulese jakutotela mazo avanjamba akumatungu aKichime.+
7 Lihina lyakukutambukisa lyapwile lyakuEjipitu lyaulombo wakulisezaseza.Chifwiko chove chapwile chawanda ulauluka, nawou waungonyi wakumatungu aElisha.+
8 Ove Tule, vaka-kukuvuwa vapwile vaka-Shitone navaka-Alavate.+Vakuluwa vamuli ove vakiko vapwile vaka-kukutambukisa.+
9 Vakulwane navakuluwa vakuNgevale+ vakiko vajikilenga mumyaji yove.+Mato amukalungalwiji osena navaka-kutambukamo vejilenga kuli ove nakusekasana.
10 Halizavu lyove lyamaswalale hapwile malunga vakuPeleja, nakuLute, nakuPute.+Vasukikilenga jikepwe javo namatepa avo akukola muli ove, kaha wapwile naluvaji.
11 Malunga vakuAlavate vahalizavu lyove lyamaswalale vajingilikile jikembwe jove josena,Kaha vingazule jamalunga valaminenga tuposhi twove.Vasukikilenga jikepwe jamujingulule kujikembwe jove jingulwishi,Kaha vakulingishile uwahe chikuma.
12 “‘“Talashishe+ asekasanyinenga nayove mwomwo yakuvula chavikumba vyove.+ Ambachilenga palata, nafwelu, nashitanyu, nasumbu nakutambasana navyuma vyove.+
13 Yavane, naTuvale,+ naMesheke+ vasekasanyinenga nayove. Vambachilenga vandungo+ navyuma vyaunengu nakutambasana navyuma vyove vyakusekasana.
14 Vaze vakuzuvo yaTongalama+ vambachilenga tuvalu navimbulu nakutambasana navyuma vyove.
15 VaNdetane+ vasekasanyinenga nayove. Wakambile vatu mangana vakusekasanyine hamatungu amavulu. Kaha vakuhanyinenga milambu yamazo avanjamba+ namikushi.
16 Etome asekasanyinenga nayove mwomwo yakuvula chavikumba vyove. Ambachilenga tukuse, nawanda waungonyi, namahina akutonga kanawa, nawanda wamwaza, nakolale, naluve nakutambasana navyuma vyove.
17 “‘“Yuta nalifuchi lyaIsalele vasekasanyinenga nayove. Vambachilenga tiliku yakuMinyite,+ navyakulya vyamwaza, nauchi,+ namaji, nambalasamu+ nakutambasana navyuma vyove.+
18 “‘“Ndamashiku+ asekasanyinenga nayove mwomwo yakuvula chavikumba naluheto lwove. Akulanjishilenga vinyo vyakuHelevone nawanda wakuZahale.*
19 Vetane naYavane vakuUzale vambachilenga fwelu yakufula, nakasha,* nakalamu* nakutambasana navyuma vyove.
20 Ndetane+ akulanjishilenga mahina akutwamaho hakutambuka havimbulu.
21 Wakambile vaAlavya navamyata vakuKetale+ vosena mangana vakusekasanyine vana vamikoko, navizamba jamikoko, navapembe.+
22 Vaka-kusekasana vakuSheva nakuLama+ vasekasanyinenga nayove. Vambachilenga maji akulisezaseza alivumba lyamwaza, namalolwa andando yayinene, naulu nakutambasana navyuma vyove.+
23 Halane,+ naKane, naEtene+ vaze vapwile nakusekasanyina kuSheva,+ nakuAshule,+ nakuKilimate vasekasanyinenga nayove.
24 Muvisakano vyove vasekasanyinengamo uvwalo wamwaza, navikuto vilauluka vyakutonga kanawa, namahina akwala hamavu aulombo wakulisezaseza. Osena apwilenga akujinga akukasa namikole.
25 Mato akuTalashishe+ akiko wambachililenga vyuma vyove vyakusekasana.Kaha wapwile naluheto lwaluvulu* mukachi kakalungalwiji.
26 Vaka-kukuvuwa navakakuneha mukalungalwiji wameya amavulu,Kaha peho yakumututuko nayikakuvombesa mukachi kakalungalwiji.
27 Luheto lwove, navikumba vyove, navyuma vyove vyakusekasana, navaka-kutambuka muli ove, navaka-kukutambukisa,Navaka-kujika mumyaji yove, navaka-kulanda vyuma vyove vyakusekasana,+ navaka-jita vosena,+Liyongomena* lyosena lize lili muli oveNavikalondomana vyosena hakachi kakalungalwiji halikumbi lize naukanonga.+
28 Omu vaka-kukutambukisa navakateta miteto, vihela vyakungenge yakalungalwiji navikandenda.
29 Vaka-kuvuwa mato, navaka-kutambuka mumato, namalunga vaka-kutambuka hatulungalwiji vosenaNavakafuma mumato avo nakwimana hatunda.
30 Navakateta miteto nalizu lyakukanguka hali ove+Nakulishikila mavu kumitwe yavo nakulyalanga muuto.
31 Navakaliteula tukongo nakuvwala vikeleyi.Navakakulila jimbimbi.
32 Omu navakakulila navakakwimbila lungungu ngwavo:‘Iyaze nafwane nge Tule uze naholo kulu mukachi kakalungalwiji?+
33 Omu vikumba vyove vyafuminenga kukalungalwiji, wasuulwishilenga vatu veka naveka vavavulu.+Luheto lwove lwaluvulu navyuma vyove vyakusekasana vyaheteselenga vamyangana vahamavu.+
34 Oholyapwa unavombo jino halijinga lyahakalungalwiji,+Kaha vyuma vyove vyakusekasana vyosena navatu jove vanalondomanyina kumwe nayove.+
35 Vatu vahamatungu vosena navakakutala oku vanalikomokela,+Kaha vamyangana javo navakahomba nakulichikimina nawoma.+
36 Vaka-kusekasana vakumafuchi eka navakalihaha havyuma navikasoloka kuli ove.Kukuma chove nachikeza mukukasumuna,Kaha kaweshi kukapwako chekako haya myaka yosena.’”’”+
Kwinyikila Chamwishi
^ Chipwe “mwaso wakulishona.”
^ Chipwe “nawanda uchiluluka.”
^ Mutondo uze walifwana namutondo wakinamone.
^ Lihongo lyalivumba lyamwaza.
^ Chipwe pamo, “naupahu chikuma.”
^ Hepe., “Chikungulwilo.”
