Ezekele 29:1-21
29 Mumwaka wakusokesa 10, mukakweji wakusokesa 10, halikumbi lyakusokesa 12, Yehova ahanjikile kuli ami ngwenyi:
2 “Ove mwanamutu, talisa meso ove kuli Fwalo mwangana waEjipitu nakupolofweta vyuma navisoloka kuli ikiye nahalifuchi lyaEjipitu lyosena.+
3 Hanjika ngwove: ‘Mwata Wakulitulaho Yehova nambe ngwenyi:“Ngunakwimanyina nakole ove Fwalo mwangana waEjipitu,+Ove kanyama wamunene wamukalungalwiji, ove uli kuvana vakalwiji kove Nyile,+Ove uli nakwamba ngwove, ‘Kalwiji Nyile napu wami.Ami yami ngwamufulile.’+
4 Oloze nanguhaka malovo mujimbangi jove nakulingisa vaishi vamukalwiji kove Nyile vakakachile kumavanda ove.Nangukuzambula mukalwiji kove Nyile hohamwe navaishi vosena vaze vanakakachila kumavanda ove.
5 Kaha nangukakuseza mulikundu navaishi vamukalwiji kove Nyile vosena.Naukaholokela hamavu, kaha kaveshi kukakwanda nakukufundako.+Nangukakuhana kuvisuma nakutujila vakutuka mwilu vakakulye.+
6 Ngocho vatu vamuEjipitu vosena navakatachikiza ngwavo ami yami YehovaMwomwo vapwile nge lihongo valijikililileho vaze vakuzuvo yaIsalele.+
7 Omu valikwachililile kulivoko lyove, wapazukile,Kaha wavalemekele havifwiji vyavo.Omu valijikililile hali ove, wahokokele,Kaha wavalingishile vapelyangile.”+
8 “‘Mwata Wakulitulaho Yehova nambe ngwenyi: “Tala, nanguneha poko yamukwale hali ove,+ kaha nangujiha vatu natunyama muli ove.
9 Lifuchi lyaEjipitu nalisala ngundu.+ Ngocho navakatachikiza ngwavo ami yami Yehova mwomwo ove unambe ngwove,* ‘Kalwiji Nyile napu wami. Ami yami ngwamufulile.’+
10 Shikaho ngunakwimanyina nakole nakalwiji kove Nyile, kaha nangulingisa lifuchi lyaEjipitu lisale ngundu,+ kufuma kuMingitole+ swi nakuSevene+ swi nakungiza yaEchopa.
11 Kamweshi kukahita mutu numba kanyamako.+ Namukahita myaka 40 chakuzeneka kutwamamo vatu.
12 Ngundu yalifuchi lyaEjipitu nayikahambakana jingundu jamafuchi eka. Jinganda jayo najikasala ngundu hamyaka 40,+ kaha jingundu jajo najikahambakana jingundu jajinganda jeka. VaEjipitu nangukavamwangila kuli vaka-mafuchi eka, nakuvasanjila kumafuchi eka.”+
13 “‘Mwata Wakulitulaho Yehova nambe ngwenyi: “Omu nayikakuma yize myaka 40, nangukakungulula vaEjipitu kufuma kuvatu veka naveka kuze nangukavamwangila.+
14 Nangukakindulwisa vafunge vavaEjipitu mulifuchi lyaPatalose+ muze vafumine, kaha wangana wavo kaweshi kukapwa waulemu kuzeko.
15 Ejipitu mwakapwa wakwinyisa hamawangana akwavo, kaha keshi kukapwa nangolo hamafuchi akwavoko.+ Nangukavakehesa mangana vakahone kufungulula vaka-mafuchi eka.+
16 Vaze vakuzuvo yaIsalele+ kaveshi kukafwelela cheka lifuchi lyaEjipituko, oloze nalikavanukisa upi wavo valingile hakuya kulifuchi kana livakafwe. Kaha navakatachikiza ngwavo ami yami Mwata Wakulitulaho Yehova.”’”
17 Jino mumwaka wakusokesa 27, mukakweji wakulivanga, halikumbi lyakulivanga, Yehova ahanjikile kuli ami ngwenyi:
18 “Ove mwanamutu, Mwangana waMbavilone Nevukataneza*+ azachishile lizavu lyenyi lyamaswalale milimo yayinene hakulwa naTule.+ Ngocho mitwe yamaswalale kana yasevele lwanja, vifwiji vyavo vyapwesukile. Oloze ikiye namaswalale jenyi kavatambwile fweto hamilimo vazachile yakulwa naTuleko.
19 “Ngocho Mwata Wakulitulaho Yehova nambe ngwenyi, ‘Lifuchi lyaEjipitu nangulihana kuli Nevukataneza* Mwangana waMbavilone.+ Mwakambata luheto lwalyo nakupupa vyuma vyalyo. Kaha navikapwa fweto yamaswalale jenyi.’
20 “Mwata Wakulitulaho Yehova nambe ngwenyi, ‘Nangumufweta lifuchi lyaEjipitu hamilimo yenyi azachile hakulwa naTule mwomwo ikiye namaswalale jenyi vanguzachilile ami.’+
21 “Halikumbi kana nangukasokesela vaze vakuzuvo yaIsalele lumbinga,*+ kahove Ezekele nangukakuhana lwola lwakuhanjika navo. Ngocho navakatachikiza ngwavo ami yami Yehova.”
Kwinyikila Chamwishi
^ Hepe., “mwomwo ikiye nambe ngwenyi.”
^ Hepe., “Nevukataleza,” kusoneka chikwavo.
^ Hepe., “Nevukataleza,” kusoneka chikwavo.
^ Chipwe “nangukahana vaze vakuzuvo yaIsalele ngolo.”
