Ezekele 3:1-27
3 Ambile kuli ami ngwenyi: “Ove mwanamutu, lyako chuma kanechi.* Lyako ou mukanda wakuvunga, kaha yako ukahanjike navaze vakuzuvo yaIsalele.”+
2 Ngwasamine mukanwa kami, angulishile uze mukanda wakuvunga.
3 Kaha ambile lika kuli ami ngwenyi: “Ove mwanamutu, lyako ou mukanda wakuvunga nguli nakukuhana mangana uzalise lijimo lyove.” Ngwaulile, kaha mukanwa kami wayekemene nge uchi.+
4 Ambile kuli ami ngwenyi: “Ove mwanamutu, yako kuli vaze vakuzuvo yaIsalele, ukahanjike mazu ami kuli vakiko.
5 Kangweshi nakukutuma kuvatu vahanjika lilimi lyalikalu kwivwa chipwe lize kawatachikizako, oloze nguli nakukutuma kuzuvo yaIsalele.
6 Kangweshi nakukutuma kuvatu veka naveka vahanjika lilimi lyalikalu kwivwa, chipwe lize kawatachikizako, vaze navahanjika vyuma nauhona kwivwa. Kachi nge ngwakutumanga kuvatu kana, kachi navakwivwilila.+
7 Oloze vaze vakuzuvo yaIsalele kaveshi kukakwivwililako, mwomwo kavasaka kungwivwililako.+ Vosena vanapu vakunjinjavala, vakukakama michima.+
8 Tala! Ngunakujikijisa upwenga uwakunjinjila ngana muze vananjinjila vakiko.*+
9 Ngunakujikijisa upwenga uwakukola ngana mwandayamonde yize yakola kuhambakana litale.+ Kanda ukavevwa woma, chipwe kulizuzukila kumeso avoko+ mwomwo vanapu zuvo yavaka-kulikanga.”
10 Ambile cheka kuli ami ngwenyi: “Ove mwanamutu, ivwilila vyuma vyosena nangukulweza nakuvilama mumuchima wove.
11 Yako kuli vatu jove* vaze vali muundungo,+ ukahanjike kuli vakiko ngwove: ‘Omu mukiko mwanambe Mwata Wakulitulaho Yehova,’ chamokomoko numba vakevwilila chipwe vakakana kwivwilila.”+
12 Jino shipilitu yanguzundwile,+ kaha ngwevwile lizu nalilikima munyima yami ngwalyo: “Valisenga upahu waYehova kuchihela chenyi.”
13 Ngwevwile nawa chivumo chamavava avaze vaka-kuyoya aze apwile nakuliveta nawakwavo,+ nachivumo chatufumbo vaze vapwile kujihachi javo,+ nakulilima chachinene.
14 Shipilitu yanguzundwile nakungutwala kweka. Ngwayile namatoto mumuchima wami, kaha ngolo jaYehova japwilenga lika hali ami.
15 Ngocho ngwayile kuvatu vapwile muundungo kuTele-avive, vaze vatwaminenga kukalwiji Kevale,+ kaha ngwatwaminenga navo. Ngwapwile mulihayihayi+ hamakumbi aze ngwatwamine kuze.
16 Omu akumine aze makumbi 7, Yehova ahanjikile kuli ami ngwenyi:
17 “Ove mwanamutu, ngunakutongola kupwa umuka-kulama kuzuvo yaIsalele.+ Ngocho uvahuhumune omu nawivwa vyuma nanguhanjika.+
18 Omu nangwamba kuli muka-kuhuka ngwami: ‘Naukafwa chikupu,’ kaha nge ove nauzeneka kuhanjika nakuhuhumuna uze muka-kuhuka aseze vilinga vyenyi vyakuhuka mangana ayoye,+ mutu kana mwakafwa hakuhenga chenyi,+ oloze manyinga enyi nangukawehula kuli ove.*+
19 Oloze nge ove nauhuhumuna muka-kuhuka, kaha ikiye kate kuseza vilinga vyenyi vyakuhuka, mutu kana mwakafwa hakuhenga chenyi, oloze ove nauyovola mwono wove.+
20 Jino kachi nge muka-kwoloka mwaseza vilinga vyenyi vyakwoloka nakulinga vyuma vyavipi,* ami nanguhaka chimbunji chakumuhukanyisa kumeso enyi, kaha mwakafwa.+ Mutu kana mwakafwa hashili yenyi mwomwo kawamuhuhumwineko, kaha vilinga vyenyi vyakwoloka kangweshi kukavyanukako, oloze manyinga enyi nangukawehula kuli ove.*+
21 Oloze kachi nge ove unahuhumuna muka-kwoloka mangana azeneke kulinga shili, kaha ikiye himwazeneka chikupu kulinga shili, mutu kana mwayoyanga lika, mwomwo unamuhuhumuna.+ Kahove unayovola mwono wove.”
22 Ngolo jaYehova japwile hali ami, kaha ambile kuli ami ngwenyi: “Katuka uyenga kuchana, nangukahanjika nayove kuze.”
23 Ngwakatukile, ngwayile kuchana. Kaha ngwamwene upahu waYehova kuze,+ ngana uze ngwamwene kukalwiji Kevale,+ ngocho ngwafukamine chameso hamavu.
24 Jino shipilitu yengilile muli ami, kaha ngwemanyine.+ Kalunga ahanjikile kuli ami ngwenyi:
“Yako ukalisokelele muzuvo yove.
25 Tala, ove mwanamutu, navakakukasa mikole mangana ukahone kuya kuli vakiko.
26 Nangukalingisa lilimi lyove likakakachile mundakwila, kaha naukahona kuhanjika. Kaweshi kukavahanjikilako, mwomwo vanapu zuvo yavaka-kulikanga.
27 Kahomu nangukahanjika kuli ove, nangukajikula kukanwa kove, ngocho ukavalweza ngwove,+ ‘Omu mukiko mwanambe Yehova Mwata Wakulitulaho.’ Ou mwakevwilila akevwilile,+ kahou mwakakana kwivwilila akakane, mwomwo vanapu zuvo yavaka-kulikanga.+
Kwinyikila Chamwishi
^ Hepe., “lyako echi unawane.”
^ Hepe., “Nangukanyamisa kumeso ove kupwenga nge kumeso avo, nakukanyamisa nawa luholo lwove lupwenga nge jiholo javo.”
^ Hepe., “vana vavatu jove.”
^ Chipwe “oloze nangukakuhana mulonga hamanyinga enyi.”
^ Chipwe “oloze nangukakuhana mulonga hamanyinga enyi.”
^ Chipwe “nakulinga vilinga vyakuhenga.”
