Ezekele 30:1-26
30 Yehova ahanjikile cheka kuli ami ngwenyi:
2 “Ove mwanamutu, polofweta ngwove, ‘Mwata Wakulitulaho Yehova nambe ngwenyi:“Lilenu jimbimbi ngwenu, ‘Mama lelo, likumbi lili nakwiza.’
3 Likumbi lili hakamwihi, likumbi lyaYehova lili hakamwihi.+Nalikapwa likumbi lyamavwi,+ hilwola lwakusopesa vaka-mafuchi.+
4 Poko yamukwale nayikeza haEjipitu, kaha vaEchopa navakevwa woma omu vatu navakalindwomwoka mulifuchi lyaEjipitu,Nomu navakalitambula luheto lwalyo nakukekumuna chihela chalyo.+
5 VaEchopa,+ navaPute,+ navaLute, navatu vakumafuchi eka vosena,NavaKuve, navatu vamulifuchi vaze vali muchivwasano nayami*Navakalindwomwoka kupoko yamukwale.”’
6 Yehova nambe ngwenyi:
‘Vaka-kukundwiza Ejipitu vosena navakalindwomwoka,Kaha ngolo jenyi eji kulisasanga najikakuma.’+
“Mwata Wakulitulaho Yehova nambe ngwenyi, ‘Navakalindwomwoka kupoko yamukwale kufuma kuMingitole+ swi nakuSevene.+
7 Jingundu jenyi najikahambakana jingundu jamafuchi eka, kaha jingundu jajinganda jenyi najikahambakana jingundu jajinganda jeka.+
8 Kaha navakatachikiza ngwavo ami yami Yehova omu nangukaswamika kakahya hali Ejipitu, nomu nangukachika vaze alikasa navo chivwasano.
9 Halikumbi kana nangukatuma valuwa namato kuli Echopa uze alifwelela ivene mangana vakamuchikimise woma. Woma naukamukwata halikumbi lyakunongesa Ejipitu, mwomwo likumbi kana lili nakwiza chikupu.’
10 “Mwata Wakulitulaho Yehova nambe ngwenyi, ‘Nangukazachisa Nevukataneza* Mwangana waMbavilone+ ngukanongese liyongomena lyaEjipitu.
11 Nangukamuneha namaswalale jenyi, vaka-mafuchi vaukenya+ chikuma vakanongese lifuchi kana. Navakasolomona jipoko javo jamikwale nakujiha vaEjipitu, kaha lifuchi kana nalikazala navivimbi.+
12 Nangukomisa tupila twaNyile,+ kaha nangukalanjisa lifuchi kana kuvatu vakuhuka. Nangukazachisa vaka-mafuchi eka vakanongese lifuchi kana navyuma vyosena vilimo.+ Ami Yehova yami ngunahanjika.’
13 “Mwata Wakulitulaho Yehova nambe ngwenyi, ‘Nangukanongesa nawa makombelo aunyengwe* natulunga vamokomoko vamuNofwe.*+ Mulifuchi lyaEjipitu kamweshi kukapwa cheka chiloloko,* kaha nangukevwisa woma vatu vamulifuchi kana.+
14 Nangukanongesa Patalose,+ kaha nangukaswamika kakahya muZowane, nakuzangamisa No.*+
15 Nangukasolola kulundundu yami hali Shine ou napu chihela chaEjipitu chakukola. Nangukanongesa vatu vamuNo vosena.
16 Nangukaswamika kakahya muEjipitu. Shine mwakalizuzukila nawoma, No nawa navakamupupa, kaha Nofwe* navakamulukuka musana weye.
17 Vakweze vamalunga vamuOne* namuPimbesete navakalindwomwoka kupoko yamukwale, kaha vatu vamujinganda kana navakaya muufunge.
18 Likumbi nalikelava wi muTapanese omu nangukahokwojola jitoka jaEjipitu.+ Ngolo jize eji kulisasanga Ejipitu najikakuma,+ mavwi nawakamufwika, kaha vatu vamujinganda jenyi navakaya muufunge.+
19 Nangukazangamisa Ejipitu, kaha navakatachikiza ngwavo ami yami Yehova.’”
20 Mumwaka wakusokesa 11, mukakweji wakulivanga, halikumbi lyakusokesa 7, Yehova ahanjikile kuli ami ngwenyi:
21 “Ove mwanamutu, ngunahokola livoko lyaFwalo mwangana waEjipitu. Kaha kaveshi kukalijichika likayoye chipwe kulikasa mangana likapwe nangolo jakukwata poko yamukwaleko.”
22 “Mwata Wakulitulaho Yehova nambe ngwenyi, ‘Ngunemanyina Fwalo mwangana waEjipitu+ nakole, kaha nangukahokola mavoko enyi osena avali, eli lyangolo nalyeli lyakuhokoka,+ ngocho poko yamukwale nayikaholoka mulivoko lyenyi.+
23 Kaha vaEjipitu nangukavamwangila kuli vaka-mafuchi eka, nakuvasanjila kumafuchi eka.+
24 Nangukajikijisa mavoko* amwangana waMbavilone,+ nakuhaka poko yami yamukwale mulivoko lyenyi.+ Kaha nangukahokola mavoko aFwalo, ngocho mwakalikemenena mikemo nalizu lyakukanguka kumeso amwangana waMbavilone ngana mwamutu uze mwafwa.
25 Nangukajikijisa mavoko amwangana waMbavilone, oloze mavoko aFwalo nawakazeya. Ngocho navakatachikiza ngwavo ami yami Yehova omu nangukahaka poko yami yamukwale mulivoko lyamwangana waMbavilone, nomu mwakayolwela halifuchi lyaEjipitu.+
26 VaEjipitu nangukavamwangila kuli vaka-mafuchi eka, nakuvasanjila kumafuchi eka.+ Ngocho navakatachikiza ngwavo ami yami Yehova.’”
Kwinyikila Chamwishi
^ Pamo kutalisa kuli vaIsalele vaze vapwile muchivwasano naEjipitu.
^ Hepe., “Nevukataleza,” kusoneka chikwavo.
^ Chipwe “mwatako.”
^ Chipwe “vamuMemefwise.”
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Ikiko Tevese.
^ Chipwe “Memefwise.”
^ Ikiko Helyopolise.
^ Chipwe “Nangukavulisa ngolo.”
