Ezekele 32:1-32
32 Mumwaka wakusokesa 12, mukakweji wakusokesa 12, halikumbi lyakulivanga, Yehova ahanjikile cheka kuli ami ngwenyi:
2 “Ove mwanamutu, imbila Fwalo mwangana waEjipitu lungungu* ngwove,‘Wapwile nge umwevu wandumba muli vaka-mafuchi eka,Oloze vanakuholesa kulu.Wapwile nge ukanyama wamunene wamukalungalwiji,+Kaha watambwojokelenga mutulwiji twove, nakuvundula meya namahinji ove, nakupihisa tulwiji.’*
3 Mwata Wakulitulaho Yehova nambe ngwenyi:‘Nangukazachisa lizavu lyavaka-mafuchi eka vakakutele lyoji lyami,Kaha navakakufuta mulyoji lyami lyachikokela.
4 Nangukakuseza hatunda,Nangukakumbila muchipapa.Nangukakungulula tujila vakutuka mwilu vosena vakawile hali ove,Kaha visuma vamuchipapa nangukavekuchisa nanyama yove.+
5 Nangukambila nyama yove hajipili,Nakuzalisa vinema nanyama yove yakupola.+
6 Nangukazovesa lifuchi namanyinga ove swi nakujipili,Kaha nawakazalisa tulwiji.’*
7 ‘Omu nangukakunongesa,* nangukafwika melu nakwilavisa vatanganyika.Nangukafwika likumbi namavwi,Kaha kakweji keshi kukamunyikako.+
8 Nangukelavisa vyakumunyika vyamumelu vyosena mwomwo yayove,Kaha nangukaneha milima halifuchi lyove.’ Omu mukiko mwanambe Mwata Wakulitulaho Yehova.
9 ‘Omu nangukatwala vafunge jove kumafuchi eka aze kawatachikizako,Nangukanyengetesa michima yavatu veka naveka vavavulu.+
10 Nangukalingisa vatu veka naveka vavavulu vakalikomokele,Kaha vamyangana javo navakalichikimina nawoma hali ove omu nangukahelengenyesa poko yami yamukwale kumeso avo.Halikumbi lize naukalindumuka,Vosena navakalichikimina lika mwomwo yawoma wakufwa.’
11 Mwata Wakulitulaho Yehova nambe ngwenyi:‘Poko yamukwale yamwangana waMbavilone nayikeza hali ove.+
12 Nangukalingisa liyongomena lyove likalindumuke kujipoko jamikwale javaka-kwasa jita vangolo,Vaka-mafuchi eka vaukenya vosena.+Navakenyisa lifuchi lyaEjipitu, nakunongesa liyongomena lyalyo.+
13 Nangukanongesa vimuna jalyo vosena vaze vali kumeya amavulu,+Kaha kakweshi kukapwa chilyachilo chamutu chipwe lusende lwachimuna luze nalukavundula cheka meyako.’+
14 Mwata Wakulitulaho Yehova nambe ngwenyi, ‘Halwola kana nangukalingisa meya akayowelele,Kaha meya amutulwiji nawakatambuka kwijiva nge maji.’
15 ‘Navakatachikiza ngwavo ami yami Yehova+Omu nangukalingisa lifuchi lyaEjipitu kupwa ngundu nakufumisamo vyuma vilimo vyosena,+Nomu nangukajiha vatu valimo vosena.
16 Elu lukiko lungungu, kaha vatu navakalwimbanga chikupu.Mapwevo vamulifuchi navakalwimbanga.Navakalwimbilanga Ejipitu naliyongomena lyenyi lyosena.’ Omu mukiko mwanambe Mwata Wakulitulaho Yehova.”
17 Jino mumwaka wakusokesa 12, halikumbi lyakusokesa 15 mukakweji, Yehova ahanjikile kuli ami ngwenyi:
18 “Ove mwanamutu, lila jimbimbi haliyongomena lyamulifuchi lyaEjipitu, nakushikumwina lifuchi kana kwishi yamavu hohamwe navatu vakumafuchi eka angolo navaze vali nakushikumuka muwina.*
19 “‘Wapwa uwamwaza kuhambakana iya? Shikumuka kumavu ukasavale kuze vasavala vilima.’
20 “‘VaEjipitu navakalindwomwokela hali vaze vanajihi napoko yamukwale.+ Lifuchi lyaEjipitu vanalihane kupoko yamukwale. Kokela lifuchi kana naliyongomena lyalyo kuweluka.
21 “‘Vaka-kwasa jita vangolo navakahanjika kuli Fwalo muFuka* nakuli vaka-kumukafwa. Navakalindumuka kupoko yamukwale, kaha navakashikumuka kwishi yamavu nakusavala nge vilima.
22 Kwakuze vene kukiko ali Asulya nalizavu lyenyi. Vimbumbe vyavo vinamujingilika, vosena valindumukile kupoko yamukwale.+
23 Vimbumbe vyavo vili muwina* wausuku chikuma, kaha lizavu lyenyi lyosena lize vajihile napoko yamukwale linajingilika chimbumbe chenyi, mwomwo vevwishilenga vatu woma omu vapwile vavatonyi.
24 “‘Kwakuze vene kukiko ali Elame+ naliyongomena lyenyi lize linajingilika chimbumbe chenyi. Vosena valindumukile kupoko yamukwale, kaha vashikumuka kwishi yamavu naulima wavo. Vevwishilenga vatu woma omu vapwile vavatonyi. Navapwa jino vakwinyisa hohamwe navaze vali nakushikumuka muwina.*
25 Kahela kenyi vanakahake muli vaze vanajihi hohamwe naliyongomena lyenyi lize linajingilika chimbumbe chenyi. Vosena vanapu vilima, kaha vanavajihi napoko yamukwale mwomwo vevwishilenga vatu woma omu vapwile vavatonyi. Navapwa jino vakwinyisa hohamwe navaze vali nakushikumuka muwina.* Vanamuhake muli vaze vanajihi.
26 “‘Kwakuze vene kukiko ali Mesheke naTuvale+ namayongomena avo.* Vimbumbe vyavo vinavajingilika. Vosena vanapu vilima, vanavatuvasana napoko yamukwale mwomwo vevwishilenga vatu woma omu vapwile vavatonyi.
27 Kutala kaveshi kusavala hohamwe navilima vaka-kwasa jita vangolo vaze vanalindumuka, vaze vashikumukile muFuka* navitwa vyavo vyajitako numba? Jipoko javo jamikwale navakajihaka kumitwe yavo,* nakuhaka nawa jishili javo havifuwa vyavo, mwomwo ava vaka-kwasa jita vangolo vevwishilenga vatu woma omu vapwile vavatonyi.
28 Oloze ove navakakuchika muli vilima, kaha naukasavala kuze vasavala vaze vajihile napoko yamukwale.
29 “‘Kwakuze vene kukiko ali Etome+ navamyangana jenyi navamyata jenyi vaze vasavalile kuze vasavala vaze vajihile napoko yamukwale numba tuhu vapwile nangolo. Navakiko navakasavala kuze vasavala vilima+ navaze vali nakushikumuka muwina.*
30 “‘Kwakuze vene kukiko vali vamyata* vakunote hohamwe navaka-Shitone+ vosena vaze vanashikumuka kwishi yamavu nasonyi yavo navaze vanajihi, numba tuhu vevwishilenga vatu woma hangolo javo. Navasavala kwishi yamavu naulima wavo kuze vasavala vaze vajihile napoko yamukwale, kaha navapwa vakwinyisa hohamwe navaze vali nakushikumuka muwina.*
31 “‘Fwalo mwakamona vyuma vyosenevi, kaha navakamuvendejeka havyuma vyosena vyasolokelele liyongomena lyenyi.+ Fwalo namaswalale jenyi navakavajiha napoko yamukwale.’ Omu mukiko mwanambe Mwata Wakulitulaho Yehova.
32 “Mwata Wakulitulaho Yehova nambe ngwenyi, ‘Hakuwana nge Fwalo naliyongomena lyenyi vevwishilenga vatu woma omu vapwile vavatonyi, ngocho navakavasavalika kwishi yamavu kuze vasavala vilima vaze vajihile napoko yamukwale.’”
Kwinyikila Chamwishi
^ Hepe., “nakupihisa tulwiji twavo.”
^ Chipwe “mwaso wakulishona.”
^ Hepe., “Kaha tulwiji navakazala nove.”
^ Chipwe “nangukakujima.”
^ Chipwe “mufuka.”
^ Chipwe “muSheyole,” kulumbununa fuka yavatu vosena. Tala Mukana waMazu.
^ Chipwe “mufuka.”
^ Chipwe “mufuka.”
^ Chipwe “mufuka.”
^ Hepe., “enyi.”
^ Chipwe “muSheyole,” kulumbununa fuka yavatu vosena. Tala Mukana waMazu.
^ Pamo kutalisa kuli vaka-jita vaze vafunjile najipoko javo jamikwale, hakusaka kuvahana kavumbi.
^ Chipwe “mufuka.”
^ Chipwe “vatwamina.”
^ Chipwe “mufuka.”
