Ezekele 33:1-33
33 Yehova ahanjikile kuli ami ngwenyi:
2 “Ove mwanamutu, hanjika kuli vana vavatu jove+ ngwove,
“‘Kachi nge nanguneha poko yamukwale halifuchi,+ kaha vatu vamulifuchi vosena hinavatongola mutu apwenga muka-kuvalama,
3 jino mutu kana himwemba luneta nakuhuhumuna vatu omu mwamona poko yamukwale yili nakwiza halifuchi,+
4 weshowo mutu mwevwa chivumo chaluneta, oloze mwaliula kuhuhumuna kana,+ ngocho poko yamukwale hinayiza nakumujiha, mulonga wamanyinga enyi naupwa hali ivene.+
5 Mutu kana evwanga chivumo chaluneta, oloze aliulanga kuhuhumuna kana. Ngocho mulonga wamanyinga enyi naupwa hali ivene. Kachi nge evwililanga kuhuhumuna, kachi nayovola mwono wenyi.
6 “‘Oloze kachi nge muka-kulama mwahona kwimba luneta+ nakuhuhumuna vatu omu mwamona poko yamukwale yili nakwiza, kaha yize poko yamukwale hinayiza nakujiha mutu umwe, mutu kana mwafwa hakuhenga chenyi, oloze manyinga enyi nangukawehula kuli muka-kulama.’*+
7 “Ove mwanamutu, ngunakutongola kupwa umuka-kulama kuzuvo yaIsalele. Ngocho uvahuhumune omu nawivwa vyuma nanguhanjika.+
8 Omu nangwamba kuli muka-kuhuka ngwami, ‘Ove muka-kuhuka, naukafwa chikupu,’+ kahove nauzeneka kuhanjika nakuhuhumuna uze muka-kuhuka aseze vilinga vyenyi vyakuhuka, mutu kana mwakafwa hakuhenga chenyi,+ oloze manyinga enyi nangukawehula kuli ove.
9 Oloze nge ove nauhuhumuna muka-kuhuka aseze vilinga vyenyi vyakuhuka, kaha ikiye kate kuseza vilinga vyenyi, mutu kana mwakafwa hakuhenga chenyi,+ oloze ove nauyovola mwono wove.+
10 “Ove mwanamutu, hanjika kuli vaze vakuzuvo yaIsalele ngwove, ‘Enu muli nakwamba ngwenu: “Kulikanga chetu najishili jetu jinatulemenena nakutuhokamisa,+ kahaze natuyoya lika ngachilihi?”’+
11 Valweze ngwove, ‘Mwata Wakulitulaho Yehova nambe ngwenyi, “Omu ngwayoya tu, kangweshi kwivwila kuwaha kufwa chamuka-kuhukako.+ Oloze ngwasaka muka-kuhuka aseze jijila jenyi+ nakuyoya lika.+ Shikaho sezenu, sezenu vilinga vyenu vyavipi.+ Ikaze namufwila enu vakuzuvo yaIsalele?”’+
12 “Ove mwanamutu, lweza vana vavatu jove ngwove, ‘Muka-kwoloka keshi kuyovokela havilinga vyenyi vyakwolokako kachi nge mwalikanga.+ Muka-kuhuka nawa keshi kulimbuka havilinga vyenyi vyakuhukako kachi nge mwaseza vilinga kana.+ Kaha nawa muka-kwoloka keshi kuyoya lika halikumbi mwalinga shili mwomwo yavilinga vyenyi vyakwolokako.+
13 Omu nangwamba kuli muka-kwoloka ngwami: “Nauyoya lika,” oloze ikiye mwafwelela mukwoloka chenyi nakulinga jino vyuma vyavipi,*+ vilinga vyenyi vyakwoloka vyosena kangweshi kukavyanukako. Mutu kana mwakafwa mwomwo yavyuma vyavipi nalingi.+
14 “‘Omu nangwamba kuli muka-kuhuka ngwami: “Naukafwa chikupu,” ngocho himwaseza shili yenyi nakulinga jino vyuma vyamwaza vyakwoloka,+
15 kachi nge mwakindulwisa chijikilo,+ nakufweta vyuma apupile,+ nakuzeneka kulinga vyuma vyavipi hakukavangiza jishimbi jakuhana kuyoya, mutu kana mwayoya lika,+ keshi kukafwako.
16 Jishili jenyi josena alingile kangweshi kukamusopeselajoko.+ Mwayoya lika mwomwo yakulinga vyuma vyamwaza vyakwoloka.’+
17 “Jino vatu jove vali nakwamba ngwavo, ‘Jila yaYehova kayasungamineko.’ Olozenyi jila yavo yikiko kayasungamineko.
18 “Kachi nge muka-kwoloka mwaseza vilinga vyenyi vyakwoloka nakulinga vyuma vyavipi, mutu kana afwenga mwomwo yavyuma vyavipi nalingi.+
19 Oloze kachi nge muka-kuhuka mwaseza vilinga vyenyi vyakuhuka nakulinga jino vyuma vyamwaza vyakwoloka, mutu kana mwayoyanga lika hakulinga vyuma kana.+
20 “Oloze muli nakwamba ngwenu, ‘Jila yaYehova kayasungamineko.’+ Ngocho enu vakuzuvo yaIsalele nangumisopesa mutu himutu kweseka najijila jenyi.”
21 Jino mumwaka wakusokesa 12 muundungo wetu, mukakweji wakusokesa 10, halikumbi lyamuchitanu, lunga umwe uze ayovokele omu vanongesele Yelusalema ejile kuli ami+ nakungulweza ngwenyi: “Nganda vanayinongesa!”+
22 Jino ngolo jaYehova jejile hali ami nachingoloshi, kaha ajikwile kukanwa kami shimbu kanda uze lunga ayovokele ezenga kuli ami lichako nachimene. Ngocho kanwa kami kajikukile, kaha ngwaputukile jino kuhanjika.+
23 Yehova ahanjikile kuli ami ngwenyi:
24 “Ove mwanamutu, vatu vamulifuchi lize vananongesa+ vali nakuhanjika halifuchi lyaIsalele ngwavo, ‘Apalahama apwile uka wenyi, oloze ahetele lifuchi.+ Kahetu tuvavavulu, ngocho lifuchi vanatuhanelyo chikupu lipwenga luheto lwetu.’
25 “Shikaho valweze ngwove, ‘Mwata Wakulitulaho Yehova nambe ngwenyi: “Muli nakulya nyama namanyinga ayo,+ nakufwelela makombelo enu aunyengwe, nakumwanga lika manyinga.+ Kaha mwomwo ika namuhetela lifuchi?
26 Munafwelela hapoko yenu yamukwale,+ nakulinga vilinga vyaunyengwe,* mutu himutu muli enu nawa ali nakupihisa pwevo lyamukwavo.+ Kaha mwomwo ika namuhetela lifuchi?”’+
27 “Hanjika kuli vakiko ngwove, ‘Mwata Wakulitulaho Yehova nambe ngwenyi: “Omu ngwayoya tu, vaze vali nakutwama mulifuchi lize vananongesa navakalindwomwoka kupoko yamukwale, vaze vali muchipapa nangukavahana kuli visuma vakavalye, kaha vaze vali muvihela vyakukola nakumena navakafwa kumusongo.+
28 Nangukalingisa lifuchi kupwa ngundu,+ kaha ngolo veji kulisasanga najikakuma. Jipili jaIsalele nangukajinongesa,+ ngocho naumwe wauchi mwakahitamo.
29 Ngocho navakatachikiza ngwavo ami yami Yehova omu nangukalingisa lifuchi kupwa ngundu+ mwomwo yavyuma vyaunyengwe vyosena vanalingi.”’+
30 “Ove mwanamutu, vatu jove vali nakuhanjika mwavomwavo hali ove kujimbango namuvikolo vyajizuvo javo.+ Vali nakuhanjika mwavomwavo, mutu himutu kuli ndumbwenyi ngwenyi, ‘Twayenu twivwenga vyuma ali nakuhanjika Yehova.’
31 Navalikungulula nakutwama kumeso ove nge vatu jami, kaha navevwa vyuma nauhanjika, oloze kaveshi kuvilingako.+ Navakwonga natunwa twavo, oloze mumichima yavo vafwila kulinganyalisa vavene.
32 Tala! Vakiko vali nakukumona nge umuka-kwimba mwaso wazangi uze navemba nalizu lyamwaza nachisaji chamikole. Navevwa vyuma nauhanjika, oloze kaveshi kuvilingako.
33 Vyuma kana navikatesamo chikupu, kahomu navikatesamo navakatachikiza ngwavo muli vakiko mwapwile kapolofweto.”+
Kwinyikila Chamwishi
^ Chipwe “oloze nangukahana mulonga muka-kulama hamanyinga ayauze mutu.”
^ Chipwe “nakulinga jino vilinga vyakuhenga.”
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
