Ezekele 34:1-31
34 Yehova ahanjikile cheka kuli ami ngwenyi:
2 “Ove mwanamutu, polofweta vyuma navisoloka kutufunga twavaIsalele.+ Polofweta nakulweza tufunga ngwove, ‘Mwata Wakulitulaho Yehova nambe ngwenyi: “Lamba kuli tufunga twavaIsalele vaze vali nakulilisa vavene! Kutala mulimo wakafunga kawapwa wakulisa utanga wamikokoko numba?+
3 Muli nakulya maji nakuvwala uvwalo wamangona amikoko. Muli nakujiha vimuna vakununa,+ oloze kamweshi nakulisa utangako.+
4 Kamwajikijishile vaze vanazeye chipwe kuka vaze vanaviji, chipwe kujichika vaze vanalemana mangana vayoyeko. Kamwakindulwishile vaze vanahanduka chipwe kutondatonda vaze vanajimbalako.+ Oloze muli nakuvayula mujila yautenu naukenya.+
5 Ngocho vanalimwange mwomwo kaveshi nakafungako.+ Vanalimwange nakupwa kulya chavisuma vamuchipapa.
6 Mikoko jami vali nakulumbwangila hajipili jajinene nahajipili jajisuku josena. Vanalimwange kumavu kwosena, kaha naumwe wauchi ali nakuvatalatala chipwe kuvatondatondako.
7 “‘“Shikaho enu tufunga, ivwenu vyuma nahanjika Yehova:
8 ‘Mwata Wakulitulaho Yehova nambe ngwenyi, “Omu ngwayoya tu, hakuwana nge mikoko jami vali nakuvalya kuli visuma vamuchipapa hakuzeneka kafunga, mwomwo tufunga twami kavatondele mikoko jamiko, oloze vali nakulilisa vavene mukutela kulisa mikoko jami,”’
9 shikaho enu tufunga, ivwenu vyuma nahanjika Yehova.
10 Mwata Wakulitulaho Yehova nambe ngwenyi: ‘Ngunemanyina tufunga nakole, mikoko jami nanguvehula kuli vakiko. Kangweshi kuvetavisa valise* cheka mikoko jamiko,+ kaha kaveshi kulilisa cheka vaveneko. Nangupululula mikoko jami kutunwa twavo, ngocho kaveshi kuvalya chekako.’”
11 “‘Mwata Wakulitulaho Yehova nambe ngwenyi: “Talenu, nangutondatonda mikoko jami, kaha nanguvazakamanga ami yivene.+
12 Nanguzakama mikoko jami ngana muze kafunga mwalisa mikoko jenyi vakulimwanga vaze nawane.+ Nanguvapululula kweshokwo vanalimwangila halikumbi lyamavwi namilima.+
13 Nanguvafumisa kuvatu veka naveka nakuvakungulwila hamwe kufuma kumafuchi eka. Nanguvaneha mulifuchi lyavo, nakuvalishila hajipili jaIsalele,+ nakutulwiji, nakuvihela vyeka vyosena vyamulifuchi kana.
14 Nanguvalishilanga kuulilo wamwaza, navalilanga hajipili jaIsalele jajisuku.+ Navautamanga kuulilo wamwaza+ nakulila kuulilo wamwaza wahajipili jaIsalele.”
15 “‘Mwata Wakulitulaho Yehova nambe ngwenyi, “Ami yivene nangulisa mikoko jami+ nakuvautamisa.+
16 Nangutondatonda vaze vanajimbala,+ nakukindulwisa vaze vanahanduka. Nangujichika vaze vanalemana, nakujikijisa vaze vanazeye. Oloze nangunongesa vaze vakununa navaze vangolo. Kuvazangamisa chikiko nachikapwa kulya chavo.”
17 “‘Jino enu mikoko jami, Mwata Wakulitulaho Yehova nambe ngwenyi: “Nanguyula mukachi kamukoko namukoko, namukachi kavizamba jamikoko navizamba javapembe.+
18 Kutala kachapwile chuma chachinene kuli enu kulila kumaulilo amwazako tahi? Kutala mwatela kulyatangila nawa kumaulilo enu eka namahinji enu nyi? Omu munanu lyehi meya amwaza, kutala mwatela kuvundula meya kana namahinji enu tahi?
19 Kutala mikoko jami vatela kulila jino kuulilo uze munalyatangila namahinji enu, chipwe kunwa meya munavundula namahinji enu nyi?”
20 “‘Shikaho Mwata Wakulitulaho Yehova nambe ngwenyi: “Talenu, nanguyula mukachi kamikoko vakununa namikoko vakuhokama,
21 mwomwo mwashinjejekelenga vaze vakuviza najihachi navifwiji vyenu, nakuvapupa najimbinga jenu palanga nomu mwavasanjilile kumafuchi eka.
22 Ngocho nanguyovola mikoko jami, kaha kaveshi kuvakwata cheka nakuvalyako.+ Nanguyula mukachi kamukoko namukoko.
23 Nanguvatongwela kafunga umwe,+ ngamba yami Ndavichi+ uze mwavalisanga. Ikiye mwavalisanga, kaha mwapwanga kafunga kavo.+
24 Ami Yehova nangupwa nguKalunga kavo,+ kaha ngamba yami Ndavichi mwapwa mwata wavo.+ Ami Yehova yami ngunahanjika.
25 “‘“Nangulishika navo lushiko lwakuunda,+ nakufumisa visuma+ vosena mulifuchi mangana vatwamenga mupambo nakusavala muchipapa mukuunda.+
26 Vakiko hohamwe navihela vinajingilika pili yami nangukavilingisa vikanehe kisu.+ Kaha nangukanokesa vula hangonde yayo. Jikisu najikanoka nge vula.+
27 Mitondo yamumande nayikemanga mihako, mavu nawakalovola jimbuto,+ kaha navakatwamanga mukuunda mulifuchi. Navakatachikiza ngwavo ami yami Yehova omu nangukahokola jitoka javo+ nakuvapululula kuli vaze vavakwata undungo.
28 Vaka-mafuchi eka kaveshi kukavakwata cheka nakuvalyako, visuma nawa kaveshi kukavalyako. Navakapwanga vakukingiwa, kaha naumwe wauchi mwakavevwisa woma.+
29 “‘“Nangukavatumbila litepa lyapuho,* kaha kaveshi kukafwa cheka kuzala yakalombolombo mulifuchi+ chipwe kuvenyisa kuli vaka-mafuchi ekako.+
30 ‘Ngocho navakatachikiza ngwavo ami Yehova Kalunga kavo nguli navo hamwe, kaha ava vakuzuvo yaIsalele vanapu hivatu jami.’+ Omu mukiko mwanambe Mwata Wakulitulaho Yehova.”’
31 “Mwata Wakulitulaho Yehova nambe ngwenyi, ‘Enu mikoko+ jami ngweji kuzakamanga, enu munapu muvatu, kaha ami ngunapu nguKalunga kenu.’”
