Ezekele 35:1-15
-
Upolofweto wavyuma navikasoloka kujipili jaSeile (1-15)
35 Yehova ahanjikile cheka kuli ami ngwenyi:
2 “Ove mwanamutu, talisa meso ove kungalila yajipili yaSeile+ upolofwete vyuma navisoloka kuyikiko.+
3 Hanjika kuyikiko ngwove, ‘Mwata Wakulitulaho Yehova nambe ngwenyi: “Ove ngalila yajipili yaSeile, ngunakwimanyina nakole. Nangwolola livoko lyami nakukuzangamisa nakukulingisa kupwa ngundu.+
4 Jinganda jove nangujinongesa, kaha nausala ngundu.+ Ngocho naukatachikiza ngwove ami yami Yehova,
5 mwomwo wemanyinyine vaIsalele nakole+ nakuvahana kupoko yamukwale halwola lwaluyando lwavo, halwola lwakuvazangamisa chamakumishilo.”’+
6 “Shikaho Mwata Wakulitulaho Yehova nambe ngwenyi, ‘Omu ngwayoya tu, nangulingisa manyinga ove vawamwange, kaha kufwa* nachikuhangasana.+ Hakuwana nge wahungile manyinga aze wamwangile, ngocho kufwa nachikuhangasana.+
7 Ove ngalila yajipili yaSeile, nangukulingisa kupwa ngundu,+ kaha nangunongesa weshowo mwahita chipwe kukinduluka muli ove.
8 Nanguzalisa kujipili jove navivimbi. Vaze vanajihi napoko yamukwale navalindwomwokela hajipili jove, namuvinema vyove, namutulwiji twove vosena.
9 Nangukulingisa kupwa ngundu haya myaka yosena, kaha mujinganda jove kamweshi kukatwama vatuko.+ Ngocho naukatachikiza ngwove ami yami Yehova.’
10 “Hakuwana nge wambile ngwove, ‘Eyi miyachi yivali nawawa mafuchi avali anapu ami jino, kaha natuheta osena avali,’+ numba tuhu Yehova mwapwile,
11 ngocho Mwata Wakulitulaho Yehova nambe ngwenyi, ‘Omu ngwayoya tu, nangukulinga kweseka nautenu nalwiso wasolwele mwomwo yakuvahunga.+ Nangulijimbula kuli vakiko omu nangukusopesa.
12 Ngocho naukatachikiza ngwove ami Yehova ngunevu kusaula unasaulanga jipili jaIsalele ngwove: “Jipili vanajilingisa kupwa ngundu, kaha vanatuhanejo tujinongese.”*
13 Walitukwojwelenga kuli ami nakuhanjika vyuma vyavipi vyavivulu hali ami.+ Kaha vyosena ngwavivwile.’
14 “Mwata Wakulitulaho Yehova nambe ngwenyi: ‘Vatu vosena mukaye navakawahilila omu nangukakulingisa kupwa ngundu.
15 Hakuwana nge wawahililile omu uswana wavaze vakuzuvo yaIsalele wasalile ngundu, ngocho nangukuzangamisa.+ Nangukulingisa kupwa ngundu ove ngalila yajipili yaSeile, ove Etome+ yosena. Ngocho navakatachikiza ngwavo ami yami Yehova.’”
