Ezekele 36:1-38
36 “Ove mwanamutu, polofweta kujipili jaIsalele ngwove, ‘Enu jipili jaIsalele ivwenu vyuma nahanjika Yehova.
2 Mwata Wakulitulaho Yehova nambe ngwenyi: “Vaka-kole vali nakwamba hali enu ngwavo, ‘Ewa! Vihela vyakulunduka vyakushikulu vinapu jino luheto lwetu.’”’+
3 “Shikaho polofweta ngwove, ‘Mwata Wakulitulaho Yehova nambe ngwenyi: “Hakuwana nge vanaminongesa nakumilukuka kufuma kumitamba yosena mangana mupwenga luheto lwavaka-mafuchi eka vaze vanayovoka,* kaha nawa vatu vali nakuhanjika lika hali enu nakumivangijikila,+
4 ngocho enu jipili jaIsalele, ivwenu vyuma nahanjika Mwata Wakulitulaho Yehova. Mwata Wakulitulaho Yehova nahanjika kujipili jajinene, nakujipili jajindende, nakutulwiji, nakuvinema, nakuvihela vize vananongesa,+ nakujinganda vanaseze jize vanapupu nakutoleka kuli vaka-mafuchi eka vaze vanayovoka nakujingilika jinganda kana.+
5 Mwata Wakulitulaho Yehova nahanjika kuvyuma kanevi ngwenyi, ‘Hamatoto ami,+ nangutenukila vaka-mafuchi eka vaze vanayovoka, navaEtome vosena, vaze vanatambula lifuchi lyami kupwa luheto lwavo. Vanalitambula nakuwahilila, nakasautu+ mangana vahete ulilo walyo nakulipupa.’”’+
6 “Shikaho polofweta kulifuchi lyaIsalele nakuhanjika kujipili jajinene, nakujipili jajindende, nakutulwiji, nakuvinema ngwove, ‘Mwata Wakulitulaho Yehova nambe ngwenyi: “Talenu! Nanguhanjika namatoto nakulundundu mwomwo yakuminyisa kuli vaka-mafuchi eka.”’+
7 “Ngocho Mwata Wakulitulaho Yehova nambe ngwenyi: ‘Nangwolola livoko lyami mwilu nakulishinga ngwami mafuchi aze anamijingilika akiko nawakapwa akwinyisa.+
8 Oloze enu jipili jaIsalele namukasoka mitango nakwima mihako yavatu jami vaIsalele,+ mwomwo kalinwomu vakinduluke.
9 Ami nguli nayenu hamwe, kaha nangutalisa meso ami kuli enu, ngocho navakamilima nakumitumba jimbuto.
10 Nangukavulisa vatu jenu vakuzuvo yaIsalele vosena. Mujinganda namukatwamanga vatu,+ kaha vihela vize vanongesele navakavitungulula.+
11 Nangukavulisa vatu jenu navimuna jenu.+ Navakasema nakusemunwina nakuvula. Vatu navakatwama hali enu nganomu chapwile hakavanga,+ kaha nangukamilingisa mukafukile chikuma kuhambakana kushikulu.+ Ngocho namukatachikiza ngwenu ami yami Yehova.+
12 Nangukalingisa vatu jami vaIsalele vakatambwojokenga hali enu, kaha navakamiheta.+ Namukapwa muuswana wavo, kaha kamweshi kukavalingisa cheka vakazeneke kupwa navanako.’”+
13 “Mwata Wakulitulaho Yehova nambe ngwenyi: ‘Hakuwana nge vali nakumyamba ngwavo: “Enu munapu lifuchi lize lyeji kulyanga vatu nakujiha vana vakumiyachi yenu,”’
14 ‘ngocho kamweshi kulya cheka vatu chipwe kujiha vana vakumiyachi yenuko.’ Omu mukiko mwanambe Mwata Wakulitulaho Yehova.
15 ‘Kangweshi kulingisa cheka vaka-mafuchi eka vamitukane chipwe kulingisa vatu kumilumbilisako.+ Kaha kamweshi kulimbwisa vatu vakumiyachi yenuko.’ Omu mukiko mwanambe Mwata Wakulitulaho Yehova.”
16 Yehova ahanjikile cheka kuli ami ngwenyi:
17 “Ove mwanamutu, omu vaze vakuzuvo yaIsalele vapwile nakutwama mulifuchi lyavo, vapihishile lifuchi kana najijila javo navilinga vyavo.+ Jijila javo japihile kumeso ami kwijiva nge omu eji kupihyanga pwevo ali kukakweji.+
18 Ngocho ngwavasolwelele kulundundu yami mwomwo yamanyinga vamwangilenga mulifuchi,+ nahakupihisa lifuchi namakombelo avo aunyengwe.*+
19 Ngocho ngwavamwangilile kuli vaka-mafuchi eka nakuvasanjila kumafuchi eka.+ Ngwavasopesele kweseka najijila javo navilinga vyavo.
20 Oloze omu vahetele kumafuchi kana, vatu vasawile lijina lyami+ lyajila hakuvamba ngwavo, ‘Ava hivatu jaYehova, oloze navafumisa mulifuchi lyenyi.’
21 Ngocho nanguzakama lijina lyami lyajila lize vanasaula vaze vakuzuvo yaIsalele kumafuchi kuze vanayi.”+
22 “Shikaho lweza vaze vakuzuvo yaIsalele ngwove, ‘Mwata Wakulitulaho Yehova nambe ngwenyi: “Enu vakuzuvo yaIsalele, kangweshi kulinga vyumevi mwomwo yayenuko, oloze mwomwo yalijina lyami lyajila lize munasaula kumafuchi kuze munayi.”’+
23 Mwata Wakulitulaho Yehova nambe ngwenyi, ‘Nangujilika lijina lyami lyalinene+ lize munasaula muli vaka-mafuchi eka, lize munasaula muli vakiko. Kaha vaka-mafuchi eka navakatachikiza ngwavo ami yami Yehova+ omu nangukalijilika muli enu kumeso avo.
24 Nangukamimbata kufuma kumafuchi eka, nakumikungulula kufuma kumafuchi osena, kaha nangukamineha mulifuchi lyenu.+
25 Nangukamisapwila meya atoma, kaha namukatoma.+ Nangukamitomesa kuvilinga vyenu vyavipi+ nakumakombelo enu aunyengwe osena.+
26 Nangukamihana muchima wauhya,+ nakuhaka shipilitu yayihya muli enu.+ Nangukamifumisa muchima wakukola nge lilolwa+ nakumihana muchima wauvwovu nge nyama.*
27 Nangukahaka shipilitu yami muli enu nakumilingisa mukakavangize jishimbi jami+ nakulinga mwaya mazu ami akuyula nakuwononoka.
28 Ngocho namukatwama mulifuchi lize ngwahanyine vakakuluka jenu. Namukapwa muvatu jami, kahami nawa nangukapwa nguKalunga kenu.’+
29 “‘Nangukamilwila kuvilinga vyenu vyavipi vyosena. Nangukalweza manona akavule chikuma, kaha kangweshi kukaminehela zala yakalombolomboko.+
30 Nangukalingisa mitondo yikeme mihako yayivulu, nakulingisa nawa mavu akalovole jimbuto jajivulu mangana vaka-mafuchi eka vakazeneke kumisaula cheka mwomwo yazala yakalombolombo.+
31 Ngocho namukanuka jijila jenu jajipi navilinga vyenu vyavipi, kaha namukevwila unyengwe milonga yenu navilinga vyenu vyaunyengwe.+
32 Oloze tachikizenu ngwenu: Kangweshi nakulinga vyumevi mwomwo yayenuko.+ Enu vakuzuvo yaIsalele, ivwenu sonyi nakupwa vakwinyisa mwomwo yajijila jenu.’ Omu mukiko mwanambe Mwata Wakulitulaho Yehova.
33 “Mwata Wakulitulaho Yehova nambe ngwenyi: ‘Halikumbi lize nangukamitomesa kumilonga yenu yosena, nangukalingisa mujinganda mukatwame vatu,+ kaha vihela vize vanongesele navakavitungulula.+
34 Lifuchi lize linapunga ngundu, lize vanamononga vaze vahichilengako, navakalilima.
35 Vatu navakamba ngwavo: “Lifuchi lize linapunga ngundu linafwane jino nge milemba yaEtene.+ Jinganda jize vanongesele, jize vapuzwojwele nakusala ngundu, vanajijingilika jino jikembwe, kaha munatwame vatu.”+
36 Vaka-mafuchi vanasaleho vaze vanamijingilika navakatachikiza ngwavo ami Yehova yami ngunatungulula vize vapuzwojwele, nakutumba muze mwapwile ngundu. Ami Yehova yami ngunahanjika, kaha nangulingamo chikupu.’+
37 “Mwata Wakulitulaho Yehova nambe ngwenyi: ‘Nanguketavisa nawa vaze vakuzuvo yaIsalele vakangwihule mangana ngukavalingile vyuma vino: Nangukavulisa vatu javo nge utanga wamikoko.
38 Jinganda jize vanongesele najikazala navatu+ ngana mwalizavu lyavatu vajila, ngana mwautanga wamikoko uli muYelusalema* halwola lwaviwanyino.+ Kaha navakatachikiza ngwavo ami yami Yehova.’”
Kwinyikila Chamwishi
^ Hepe., “vanasaleho.”
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Kulumbununa, muchima wakusaka Kalunga avatwaminyine.
^ Chipwe pamo, “ngana mwautanga wamikoko navalumba muYelusalema.”
