Ezekele 37:1-28
37 Ngolo jaYehova japwile hali ami, kaha Yehova angumbachile nashipilitu yenyi nakungutwala muchinema+ muze mwazalile vifuwa.
2 Anguhichishile muze muchinema, kaha ngwamwene vifuwa vyavivulu chikuma, vyosena vyapwile vyakuma chau.+
3 Jino angwihwile ngwenyi: “Ove mwanamutu, evi vifuwa vinahase kuyoya cheka tahi?” Kahami ngwamukumbulwile ngwami: “Ove Mwata Wakulitulaho Yehova, ove yove unatachikiza.”+
4 Shikaho ambile kuli ami ngwenyi: “Polofweta nakuhanjika kuli evi vifuwa ngwove, ‘Enu vifuwa vyaumu, ivwenu vyuma nahanjika Yehova:
5 “‘Mwata Wakulitulaho Yehova nahanjika kuli enu vifuwa ngwenyi: “Nanguhaka kuhwima muli enu, kaha namuyoya.+
6 Nangumihaka mishisa namisonyi, nakumiwuva vikova. Nanguhaka kuhwima muli enu, kaha namuyoya. Ngocho namukatachikiza ngwenu ami yami Yehova.”’”
7 Shikaho ngwapolofwetele nganomu vangulwezele. Kahomu ngwapwile nakupolofweta, kwapwile vyema, kaha vize vifuwa vyaputukile kulinunga, chimwe nachikwavo.
8 Jino ngwamwene mishisa nanyama naviza hali vize vifuwa, kaha vikova vyafwikile vize vifuwa. Oloze kavyapwile nakuhwimako.
9 Jino ambile kuli ami ngwenyi: “Ove mwanamutu, polofweta kupeho. Polofweta nakuhanjika kupeho ngwove, ‘Mwata Wakulitulaho Yehova nambe ngwenyi: “Ove peho,* fuma kumitamba yiwana nakuhuhwila hali ava vatu vajihile mangana vayoye.”’”
10 Ngocho ngwapolofwetele nganomu angulwezele, kaha kuhwima* chejile muli vakiko. Vaputukile kuyoya, kaha vemanyine.+ Vapwile lizavu lyalinene chikuma.
11 Kaha ahanjikile kuli ami ngwenyi: “Ove mwanamutu, evi vifuwa vinapu vaze vakuzuvo yaIsalele vosena.+ Vali nakwamba ngwavo, ‘Vifuwa vyetu vinomu, kaha lutalililo lwetu nawa lunakumu.+ Vanatuhandula chikupu.’
12 Shikaho polofweta nakuvalweza ngwove, ‘Mwata Wakulitulaho Yehova nambe ngwenyi: “Enu vatu jami, nangupandumuna muvimbumbe+ vyenu nakumilovolamo, kaha nangumineha mulifuchi lyaIsalele.+
13 Enu vatu jami namukatachikiza ngwenu ami yami Yehova omu nangukapandumuna muvimbumbe vyenu nakumilovolamo.”’+
14 Yehova nambe ngwenyi, ‘Nanguhaka shipilitu yami muli enu, kaha namuyoya.+ Nangumilingisa mutwame mulifuchi lyenu, ngocho namukatachikiza ngwenu ami Yehova yami ngunahanjika, kaha nangulingamo chikupu.’”
15 Yehova ahanjikile cheka kuli ami ngwenyi:
16 “Ove mwanamutu, mbata chitondo usonekeho ngwove, ‘Chitondo chaYuta navaIsalele vaze ali navo.’*+ Mbata nawa chitondo chikwavo usonekeho ngwove, ‘Chitondo chaYosefwe, hichitondo chaEfwalime navakuzuvo yaIsalele vosena vaze ali navo.’*+
17 Jino wanyisa evi vitondo vivali hamwe mangana vipwenga chitondo chimwe mulivoko lyove.+
18 Omu vatu jove* navakwihula ngwavo, ‘Uno kaweshi kutulweza mwalumbunukila vyuma kaneviko tahi?’
19 Ove valweze ngwove, ‘Mwata Wakulitulaho Yehova nambe ngwenyi: “Nangukambata chitondo chaYosefwe chize chili mulivoko lyaEfwalime navaze vakumiyachi yavaIsalele vaze ali navo nakukachinunga kuchitondo chaYuta, kaha navikapwa chitondo chimwe.+ Navikapwa chitondo chimwe mulivoko lyami.”’
20 Vitondo evi nausonekaho vyatela kupwa mulivoko lyove mangana vavimone.
21 “Jino valweze ngwove, ‘Mwata Wakulitulaho Yehova nambe ngwenyi: “Nangukambata vaIsalele kufuma kumafuchi kuze vanayi, nakuvakungulwila hamwe kufuma kumitamba yosena, kaha nangukavaneha mulifuchi lyavo.+
22 Nangukavalingisa kupwa muyachi umwe mulifuchi,+ hajipili jaIsalele. Vosena navakavayula kuli mwangana umwe,+ kaha kaveshi kukapwa cheka miyachi yivali chipwe kulihandununa mumawangana avaliko.+
23 Kaveshi kukalipihisa cheka namakombelo avo aunyengwe,* navilinga vyavo vyavipi, najishili javoko.+ Nangukavapululula kuvilinga vyavo vyakuhenga vanalinginga, kaha nangukavatomesa. Navakapwa vatu jami, kahami nangukapwa nguKalunga kavo.+
24 “‘“Ngamba yami Ndavichi mwakapwa mwangana wavo,+ kaha vosena navakapwa nakafunga umwe.+ Navakalinga mwaya mazu ami akuyula nakulama jishimbi jami.+
25 Navakatwama mulifuchi lize ngwahanyine ngamba yami Yakova, muze vatwaminenga vakakuluka javo.+ Navakatwamanga mulifuchi kana haya myaka yosena,+ vakiko, navana vavo,* navazukulu javo.+ Kaha ngamba yami Ndavichi mwakapwanga mwata* wavo haya myaka yosena.+
26 “‘“Nangulishika navo lushiko lwakuunda.+ Lushiko kana nalukapwa lwahaya myaka yosena. Nangukavatwamisa mulifuchi lyavo nakuvavulisa,+ kaha nangukahaka chihela chami chajila muli vakiko haya myaka yosena.
27 Mbalaka* yami nayikapwa muli* vakiko. Nangukapwa nguKalunga kavo, kaha vakiko navakapwa vatu jami.+
28 Omu chihela chami chajila nachikapwa muli vaIsalele haya myaka yosena, vaka-mafuchi eka navakatachikiza ngwavo ami Yehova yami nguli nakujilika vaIsalele.”’”+
Kwinyikila Chamwishi
^ Chipwe “Ove kuhwima; Ove shipilitu.”
^ Chipwe “kaha shipilitu.”
^ Chipwe “vaze alikata navo.”
^ Chipwe “vaze alikata navo.”
^ Hepe., “Omu vana vavatu jove.”
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Chipwe “chilolo.”
^ Hepe., “navana vavo vamalunga.”
^ Chipwe “Chihela chakutwama; Limbo.”
^ Chipwe “hali.”
