Ezekele 39:1-29
39 “Jino ove mwanamutu, polofweta vyuma navisoloka kuli Ngonge+ nakumulweza ngwove, ‘Mwata Wakulitulaho Yehova nambe ngwenyi: “Nangukufumbukila ove Ngonge, ove mukulwane wavamyata* jaMesheke naTuvale.+
2 Nangukakupingulula nakukutwaminyina kufuma kujingalila jakunote+ jakusongosongo nakukuneha hajipili jaIsalele.
3 Nangukaveta kuuta wove wamanana uli mulivoko lyove lyachimoswe, kaha naukaholoka hamavu. Nangukalingisa nawa mivwi yili mulivoko lyove lyachilyo yikaholoke hamavu.
4 Ove namaswalale jove vosena, navatu veka naveka vaze vali nayove namukalindwomwokela+ hajipili jaIsalele. Nangukamihana kutujila vaze veji kulyanga nyama vosena nakuli visuma vamuchipapa vakamilye.”’+
5 “Mwata Wakulitulaho Yehova nambe ngwenyi, ‘Naukalindumukila muchipapa+ mwomwo ami yami ngunahanjika.’
6 “‘Nangukatuma kakahya muMangonge nahali vaze vali nakutwama hamatungu mukuunda,+ kaha navakatachikiza ngwavo ami yami Yehova.
7 Nangukajimbula lijina lyami lyajila muli vatu jami vaIsalele, kaha kangweshi kukechelela lijina lyami lyajila vakalisaule chekako. Ngocho vaka-mafuchi eka navakatachikiza ngwavo ami yami Yehova,+ Ou Wajila muIsalele.’+
8 “Mwata Wakulitulaho Yehova nambe ngwenyi, ‘Chuma kana chili nakwiza, kaha nachitesamo. Eli likiko likumbi ngunavulukanga.
9 Vatu vamujinganda jamuIsalele navakalovokamo nakuwika kakahya navitwa. Navakawika kakahya namikingo,* najikepwe, namata amanana, namivwi, najimbwechi jakuzungisa kujita, namakunga. Navakawikanga kakahya+ navitwa kana hamyaka 7.
10 Kaveshi kukambata mitondo muchipapa chipwe kuchava jikunyi mumusengeko mwomwo navakawikanga kakahya navitwa.’
“‘Navakapupa vyuma vyavaze vapupile vyuma vyavo, nakukatambula vyuma vyavaze vavatambwilenga vyuma vyavo.’ Omu mukiko mwanambe Mwata Wakulitulaho Yehova.
11 “‘Halikumbi lize, nangukahana Ngonge+ chihela chakumufunda muIsalele, muchinema chavaze veji kuhitanga kumutamba wakalungalwiji wakumututuko, kaha chihela kana nachikajika jila yavaze veji kuhitangamo. Kuchihela kana kukiko navakafunda Ngonge naliyongomena lyenyi, kaha navakachivulukanga ngwavo Chinema chaHamone-Ngonge.*+
12 Vaze vakuzuvo yaIsalele navakafunda Ngonge naliyongomena lyenyi hatukweji mangana vakatomese lifuchi.+
13 Vatu vamulifuchi vosena navakafunda Ngonge naliyongomena lyenyi, kahechi nachikavafumakanyisa halikumbi lize nangukalitohwesa ami ivene.’+ Omu mukiko mwanambe Mwata Wakulitulaho Yehova.
14 “‘Vatu navakavahana mulimo wakuhitangana mulifuchi lize nakufunda mijimba yize nayikasala mulifuchi mangana vakatomese lifuchi. Navakahitangana nakutondatonda vivimbi hatukweji 7.
15 Omu vaze navakahitangananga mulifuchi navakamona chifuwa chamutu, navakahakaho chinjikizo. Kaha vaze navakahana mulimo wakufunda navakafunda chize chifuwa muChinema chaHamone-Ngonge.+
16 Nakukapwa nawa nganda yize navakavuluka ngwavo Hamona.* Ngocho navakatomesa lifuchi.’+
17 “Ove mwanamutu, Mwata Wakulitulaho Yehova nambe ngwenyi: ‘Hanjika kutujila vamiyachi yosena nakuli visuma vamuchipapa vosena ngwove, “Likungululenu muvosena mwizenga. Likungulwilenu kuwana wami uze nguli nakumiwahishila, wana waunene chikuma hajipili jaIsalele.+ Namulya nyama nakunwa manyinga.+
18 Namulya nyama yavindume nakunwa manyinga avamyata vahamavu vaze vanapu vimuna vakununa vakuMbashane. Vanapu vizamba jamikoko, navana vamikoko, navapembe, navakuji javangombe.
19 Namulya maji nakwikuta, nakunwa manyinga palanga nomu namupenda wana uze ngunamiwahishila.”’
20 “Mwata Wakulitulaho Yehova nambe ngwenyi, ‘Namulya kumesa yami nakwikuta nyama yatuvalu, navaka-kutambukisa matemba, navindume, navaka-kulwa jita vosena.’+
21 “‘Nangukasolola upahu wami muli vaka-mafuchi eka. Kaha vaka-mafuchi eka vosena navakamona kusopesa chami chize ngunavasopesa, nangolo* ngunavasolwela.+
22 Kufuma halikumbi kana, vaze vakuzuvo yaIsalele navakatachikiza ngwavo ami yami Yehova Kalunga kavo.
23 Kaha vaka-mafuchi eka navakatachikiza ngwavo vaze vakuzuvo yaIsalele vayile muufunge mwomwo yakuhenga chavo nakuhona kushishika kuli ami.+ Shikaho ngwavaswekelele chihanga chami+ nakuvahana kuli vaka-kole javo.+ Kaha vosena vafwile kupoko yamukwale.
24 Ngwavazangamishile kweseka navilinga vyavo vyavipi nakuzombwojoka chavo jishimbi. Ngocho ngwavaswekelele chihanga chami.’
25 “Shikaho Mwata Wakulitulaho Yehova nambe ngwenyi: ‘Nangukakindulwisa vatu jaYakova+ vaze vali muufunge nakutetela vaze vakuzuvo yaIsalele+ vosena. Kaha nangukahakwila lijina lyami lyajila.+
26 Omu navakalinga hivanavevwisa lyehi sonyi havilinga vyavo vyakuhenga vyosena vize vanalinginga kumeso ami,+ navakatwamanga jino mulifuchi lyavo mukuunda, kaha naumwe wauchi mwakavevwisa woma.+
27 Omu nangukavakindulwisa kufuma kuvatu veka naveka, nakuvakungulwila hamwe kufuma kumafuchi avaka-kole javo,+ nangukalijilika mukachi kavo kumeso avaka-mafuchi eka vavavulu.’+
28 “‘Navakatachikiza ngwavo ami yami Yehova Kalunga kavo omu nangukavatwala muufunge kuli vaka-mafuchi eka, nomu nangukavakindulwisa jino mulifuchi lyavo chakuzeneka kusezaho numba umwe.+
29 Kangweshi kukavaswekela cheka chihanga chamiko+ mwomwo nangukahingunwina shipilitu yami hali vaze vakuzuvo yaIsalele.’+ Omu mukiko mwanambe Mwata Wakulitulaho Yehova.”
Kwinyikila Chamwishi
^ Chipwe “mukulwane wavilolo.”
^ Jikepwe jajindende jize vambachilenga vaka-kwasa mata amanana.
^ Chipwe “Chinema chaMayongomena aNgonge.”
^ Ulumbunwiso, “Mayongomena.”
^ Hepe., “nalivoko.”
