Ezekele 4:1-17
4 “Ove mwanamutu, mbata kamenga umuhake kumeso ove. Funjikaho nganda yaYelusalema.
2 Yihake muchingombela,+ yitungile kembwe+ nakuyilundwila mulundu.+ Yitungile vilombo, kaha yijingilike makina akupuzwisa jikembwe.+
3 Mbata nawa chifwoyo chakwochela chafwelu, uchihake mukachi kove nayize nganda mangana chipwenga kembwe yafwelu. Jika meso ove hali yize nganda, kaha yisolole nge yili muchingombela. Echi chinapu chinjikizo kuzuvo yaIsalele.+
4 “Kaha usavalila kuluhachi lwove lwachimoswe, umbate kuhenga chavaze vakuzuvo yaIsalele.+ Naukambata kuhenga chavo hamakumbi aze naukasavalila kuluhachi lwove.
5 Nangukakutongwela makumbi 390 akweseka mumyaka yize vanahengesanga vaze vakuzuvo yaIsalele,+ kaha naukambata kuhenga chavo.
6 Makumbi kana ukawakumise.
“Ukasavalila nawa kuluhachi lwove lwachilyo, kaha naukambata kuhenga chavaze vakuzuvo yaYuta+ hamakumbi 40. Ngunakutongwela mwaka halikumbi, mwaka halikumbi.
7 Naukalumuka nakutala Yelusalema yize yili muchingombela+ chakuzeneka kuvwala chuma chimwe kulivoko lyove, kaha ukapolofweta vyuma navikasoloka kunganda kana.
8 “Tala! Nangukakukasa namikole mangana ukahone kwalumukila kuluhachi lukwavo palanga nomu nawakakuma makumbi naukahaka nganda muchingombela.
9 “Mbata tiliku, nambale, namakunde amanene, namakunde eka, namasangu, nasepelete,* uvihake muchuma chimwe chakukwachila. Vikiko nawochanga jimbolo naulyanga. Naujilya hamakumbi 390 aze nausavalila kuluhachi lwove.+
10 Upezalisenga kulya chove, kaha mulyanga kulya chakulema jishekele 20* halikumbi. Uchilyenga halwola vatongola.
11 “Unwenganga nawa meya akuteseka muchimbwa chimwe chakusokesa muvimbwa 6 vyahine.* Uwanwenga halwola vatongola.
12 “Jimbolo ujilyenga ngana muze weji kulyanga jimbolo jambale jamujingulule. Ujochele kumeso avo hatuji twakuma twavatu.”
13 Yehova ambile lika ngwenyi: “Omu mukiko vaIsalele navakalyanga kulya chavo chachipi omu navakatwamanga kumafuchi aze nangukavamwangila.”+
14 Jino ami ngwambile ngwami: “Nduma, ove Mwata Wakulitulaho Yehova, mwomwo kufumisa kuukweze wami palanga nakulelo lino kanda ngulipihisengaho lyehi hakulya kanyama wakulifwila, chipwe uze vanatanye kuli chisumako.+ Kaha nawa mukanwa kami kanda muhitengaho lyehi nyama yayipiko.”+
15 Ikiye angwambile ngwenyi: “Chamwaza, ngunakwitavisa wochenga jimbolo jove hatuji twavangombe mukutela kujocha hatuji twavatu.”
16 Ambile kuli ami ngwenyi: “Ove mwanamutu, nangukehesa kulya chenu* muYelusalema,+ kaha vatu navakalya kulya chavo chakupezalisa nakulizakamina chikuma.+ Navakanwanga nawa meya akupezalisa nachiwomawoma.+
17 Echi nachikasoloka mangana omu navakazeneka vyakulya nameya vakalitale mwavomwavo oku vanafu chishima, kaha navakahokama hakuhenga chavo.
Kwinyikila Chamwishi
^ Sepelete himuyachi watiliku uze valiminenga muEjipitu.
^ Kafwe jingalamu 230. Tala Chihande B14.
^ Kafwe jilita 0.6. Tala Chihande B14.
^ Hepe., “nanguhokola jimbwechi jambolo yenu.” Pamo kutalisa kujimbwechi vatulikililenga mbolo.
